I khuasung cidam nading a kisam – Drainage and Sewerage System

I khuasung cidam nading a kisam – Drainage and Sewerage System

Pumpi cidam lo khempeuh , lungsim damlo a hihpah loh hang’ pumpi cidam in thahat leh lungsim zong cidam in, hatzaw hamtang hi. Khuami khatciat a cidam ciangin, khuasung cidam I ci hi.

Khuasung cidam nang’ zia leh tong tampi lak pan; Annek tuidawn ding lung-himawh kawmkawm mah-in, anbuk leh awngbuk sung aa I paih te pan-in kingah thei gilsung laisung leh a kilawhthei natna lauhuaite tawmtuam leh mibang-in I khuasak theih nading a kisam khat in, I niin te bangci kep leh paihding a hihi.

Khuasung ah, niin kimu kei leh lungsim siangtho-tuam pha mahmah aa, pumpi zong hong damsak tuam hi. A hizong, hunkhat lai-in, Yangon khuapi bang-ah inn-nunglam niinbung in kizang thei aa, lah kikhawm mello a hih man-in, thosii thovai in bawm zuahzuah mawk hi. Theihloh kal in, natna a ki kaikhawmkhawm tawh kibang hi. Tungsiah te bekbek zong mawhsak dending hipah lo aa, ei leh ei septheih tampi tak a om hi.

Nidang lai-in, niindum neihding hong kihanthawn aa, ekbuk aa ding zong, thobit ding ci-in UNICEF pan tuikuang/zawl hong kipia hi. UNICEF te’n hong pia nawnkei phial zong, innkhempeuh phial-in kizangzo ta hi. Tua dungzui in, a piantheihna te-ah khangtogamte tawh kibang in, hawktui (Drainage System) leh inntui-niin (Sewerage System) te limtak in a kineih theihnang hanciamtoh huai hi.

Zomi te, khat in pan leh a kizui, nungzui hoihte I hih man in, kipat nading lampi zong-in, pat photphot ding a hi hi. Mikaang te’n, ‘There is a WILL, there is a Way’ ci. A ki hanciam zawhleh namdang-te nangawn in, etteh-in hong neiding uh hi.

Banghang in maw?

Gamdang khangto gam pan-in khual hong zit ding uh ciang, a zinnading-uh gamdung zui in natdalna tuamtuam tawh kigingkhol den uhhi. Tuamah bangin, Kawlgam pan gamdang lutding te zong cidamna ki encik a hihi. Banghang in, a mau cidam tuan se hiam? A dang tampi lak pan Nek leh Dawn, Nasep-Silbawl, Inn leh Lo, Nisim nuntaakzia cihbangte ento pak leeng;

Nek leh Dawn:

Tanglai- vaimim leh gataam tawh I kivak lai-in, sathau meh kiza ngei-in ka um kei hi. I pu leh pa te cidam mahmah in I thei hi. Tunbel Zomi te sathau nezo kei leeng, tualniam I kisa mahmah thei hi. Nek leh Dawn etcingna hang-in, ki cidam tuam pha mahmah hi. Mangkaang te’n, ‘You are what you eat,’ ‘Na nek bang na hi,’ ci thei uh hi.

Nasep silbawl:

Nasep silbawl te’ a pumpi uh gamtaangden a hih man-in, cidamzaw kici hi. Lokhawh singpuak tawh I nuntak lai-in, kithau tuaklua samlo hi. Tulai aa minthang mihau-natna khawng omtuak lua khollo hi. Naham semnawn lo mikhangto deuh a kici te-in, pumpi tawlnga saklo veve hi.

Tunai Kawlkumpi makaihna a hoih bilbel khat, phalbi sung in, khuabup zinglamsiau ding cih hi aa, zingsang in kisa khengkhang in, a tholo a pailo te na ngawn khanglo sak gawp hi. Pumpi gamtatna hangin, pumpi cidam tuamzaw hi.

Inn leh Lo:

Inn leh lo hoih neihna hang-in nuntaakzia kilam dangmah hi. A diakdiak in, innsung innpua tuizatna nuamzaw hi. A zangte a siangtho zawh kei leh cidamna huhtuam lualo hi. mikhat ciat gamtat zia in thugen a hihi. Neizo leng hoih napi, inn hoih hang-in ki cidam zaw tuanlo hi. Cidam thahat in, inn leh lo hoih hanciam in zatsiam ding a hihi.

Nisim nuntaak zia:

Mihing khat I hihna I cidamna pen a tamzaw in, nisim I nuntaakzia, kikepzia-in thugen pha mahmah hi. A tamzaw ei leh ei hih theih vive hilel aa, pawlkhat bel mitawh vaihawm khop, kipawl khop theih zong a om hi.

Zomi te lungsim siangtho vabang pil nang’ Sianmang laukha tawh kop-in I gamsung, khuasung, pumpi leh lungsim cidam ding hanciam ni e. Nantal’suan