ZIS min tawh Lai siangtho hawmkhiatna vai zaksakna

ZIS min tawh Lai siangtho hawmkhiatna vai zaksakna

A thu: “Tedim Lai siangtho buu hawmkhiatna vai zaksakna

A tunga thu tawh kisai-in Zomi Innkuan Singapore (ZIS) te’ deihsakna leh vaihawm siamna tawh Tedim Lai Siangtho (or) Ih Zo Lai Siangtho buu 1100 pen Kawlgam a om Zomi ZCLS tawh a kizom teng omna ah kipawlte leh inn phazah tawh kizui-in ZCLS te in hawmkhiatsakna kinei hi.

1. TEDIM AH HAWMKHIATNA:

March 25, 2015 (Thursday) ni-in ZIS te’ hong apna tawh kizui-in ZCLS min tawh tangmi 4, Revd Mang Suan Khup (President), Revd Hau Khen Kham (Executive Secretary), Upa Kam Za Kham (Treasurer) leh Peter Dai Suan Kham (Secy.Communication Committee) & Video cihbang teng ka va pai thei uh a, Sezang panin Revd Kai Za Cin (Secy.Literature Committee) teng Tedim ah LST buu 688 teng tawh kipaito hi.

Tedim tunkhit phet mah, 1:00 hunin CMBC zuminn sungah hawmkhiatna kinei hi. Tedim, Tonzang leh Cikha gam teng panin taangmi hong pai uh a, tuateng tungah apkhiatna hun kinei hi.

Hih Lai Siangtho buu pen Bible Society of Myanmar pan a hong bawlkhiat pen uh hi a, innkim in kingah zo nai lo ding ahih manin a nei zo lo diak leh piakhuai a sak teng uh makai te in amau mun ciat ah a na hawm ding uh ahi hi. Tuaban ah Revd Dr.Gin En Cin’ hong bawlkhiat ahi, Lai Siangtho Thuciam Thak Audio zong tawh kihawmkhia ahi hi.

Tedim panin Zin hong do na te uh hih bang ahi hi.

(1) Zingan pen CMBC Pawlpi min tawh Ansai ah hong nesak uh a, Pawlpi keem, Sia Khen Pau in hong paipih ngiat hi. (Aman bel hong nekpih lo).

Tuabek hilo-in VIP Zintun nading a a lam ngiat uh, Nelson topa phawkna tawh a lamh uh, inn thak sungah hong giaksak uh a, zat ding kisam teng tawh Hotel level in zin hong do uh ahih manin ZCLS min tawh lungdamkohna mipi tungah zong hong zasak ka hi uh hi.

(2) Hunman teh Tedim Section Zum ah ka va hawhpak vua leh Revd Lian Za Tuang (Superintendent) leh a naseppihte’ thusiamna tawh Cooker Cola, Cold Drink leh Moh lim mahmahte tawh lengla hong do uh hi.

(3) Nitak an pen, Upa Dam Khaw Zam (CMBC), tunung diak a Motor tuahsiana tawh hong nusia, Pa Munglek te innkuan in Shwe Naga Ansai minthang khatah hong nesak uh hi.

2. KALAYMYO AH HAWMKHIATNA:-

March 29, 2015 (Sunday) ni sun, 1:00 PM hunin Kawlzang nuaisiah teng ading LST bu hawmkhiatna pen Agape AG (AMC) biakinn zumkhan sungah kinei hi. Tuahun sungah ZCLS makai teng mah in hun hong makaih uh a, Lai Siangtho bu leh Thuciam Thak Audio hawmkhiatna kinei a, kilungdam thei ciat mahmah ahi hi.

Innteek AMC Pawlpite’ hong dindona ahi, Cold Drink tuamtuam, Shark, Sprite, 100 Plus cihte a kipan a limnono hong pia uh a, laibu hawmkawm kawm mahin kidawn ziahziah hi. Hun man ciangin a pai teng group photo kila a, hiah kong khakte uh ahi hi.

NB: Hih LST bu hawmkhiatna in ZCLS tawh a kizom teng hi a, inn 10 ciangin bu 1 a tangzo ding suak phot uh ahih manin mailam ah a maban a zom nuam te’n zophuai mahmah hi, cih zong i kitheisak nuam hi. Gen khialh a om leh puah ciatin, a kisam lai a om leh damin kizasak kik ni.

(ZIS) te’n nasep hoih a tuamtuam nei zel uh a, Pasian nasem masa lam leh pawlkhat innkuan 30 val bang kha thum simin panpihna sum, Ks.tul 60-70/- bang pia den uh a, tua lo a tuamtuam ah zong mapan na nei zel uh ahih manin a ettehtaak mahmah uh ahi hi).

Na hoih na pha a sem ZIS teng tungah Lei thupha, Van thupha ih biak Pasian in na tungsak ta hen! Amen.

Thupuak,
Peter Dai Suan Kham (a) Peter Khampu
Secy, C/C, Kalaymyo.