Vietnam ah mopi dingin apai mawtaw tuahsia, zineidingpa leh adang mi 13 si

Vietnam ah mopi dingin apai mawtaw tuahsia, zineidingpa leh adang mi 13 si

Vietnam gamsung ah mopawi bawlding leh pawisiim dingin apaikhawm mawtaw khat tuahsiat in mi 14 si cih AFP pan kiza hi. Tua asi mi 14 te lakah zineiding tangvalpa zong kihel a, tuaban ah adang asi mi 13 tepen innkuankhat meltheih tanaukhat vive ahi uhhi.

Vietnamese Police te genkhiatna ah hih tuahsiatna pen zanni Monday ni in Central Vietnam ah thupiang hi a, mopawi bawldingin apai tepen Van mawtaw sungah atuangkhawm uh hi in, Containter Truck khattawh ki phukha cihi.

Vietnam gamsung ah lamzikpi tungah zuihding thukhun “Traffic Laws” tepen limtak in kizuilo banah lamzikpi te ginalo “Road infrastructure” hoihlo ahih manin mawtaw tuahsiatna tammahmah in, mi tampi in sihlawh pahpah uhhi.

Police Officer khatin AFP te tungah agenkhiatna ah tuahsiatna munpen Quang Nam Province sung cihi. Monu te omna khualam zuanin mopiding in Van mawtaw tawh apai ngeingai laitak un lamkal ah atuahsia hi a, zineiding tangvalpa zong lamkal ah asi ahihi.

Tua Van mawtaw pen mi 16 atuangthei 16-seater khat hi a, Container Truck tawh aki phutkhak ciangin aphual ah mi 13 sipah hi. Adang aliam khatpen zato ah sileuleu ahih manin, asi bekbek akigawm in mi 14 aphato ahihi.

Mopawi bawlding atuahsia asi te ii aluanghawm pen amau omna khua ah akivui dingin ki ciahpihkik hi. Asi khinsa te banah aliamzong adang pawlkhat om in tuate pen Local Hospital ah zatui zaha akibawllaitak ahihi ci’n Police Officer khatin genkhia hi.

Local Authorities te’n hih mawtaw tuahsiatna ahangpen akician takin kansan uhhi.

More: Australia, Adelaide ah Zomi khat mawtaw tuahsia in hongnusia (Mangpi, kum 42)

Abeisa nungkum kumkhatsung bekbek inzong Vietnam gamsung ah Traffic Accident hangin asipen mi 8200 bang pha hi. Tuapen atawmzaw hilai a, tuama in kumkhasung Traffic Accident tawh asipen mi 8600 ahihi. Tuabangin lamzikpi tungah tuahsiatna panin asi tamzaw pen Motorcycle tawh tuahsiatna hizaw hi.

Adiakdiak in Hanoi City leh Ho Chi Minh City te ah khuasung kuacik in, Motorcycle kilimzat mahmah sawnsawn hi. Motorcycle leh Car te kidembawl in kinawktheizel a, khetawh apai Pedestrian te leh lamgei ah vanzuak Vendors te’nzong tuahsiatlawh theizel uhhi. Sawltak #zomidaily