Zomi te’n ih neihsun ZCD party tungah lunggulh deihsak pulaakna

Zomi te’n ih neihsun ZCD party tungah lunggulh deihsak pulaakna

Minam Party ih neihsun ZCD( Zomi Congress for Democracy) tetung hibangin, lunggulh leh deihsak pulaakna ka neihpen, ong thei khatlehnih naom uhhang, “Hipa kua himawkmawk zawzen ahia?” ong ci’a ong theilo tamzaw dingin, lamen kahihman in, keilehkei ong kipulaak masa nuam ing. Ahangpen, tulaitak party vai pulaak tampitak pen, a party genloh iZomi kipawlna tebeek ah a kihel mello mipil pawlkhat nei ihhihman in, tuate dan ong kisakding ka utlohman ahihi. Ke’nbel tuate pen bullah neimello dawnlah neimello “vansam” tawh kibang kasa hi.

Kong ki introduce napen ong sauzaw phamahmah incin, ZCD party tungah lunggulh leh deihsakna pulaakna ong sau khollo leldinghi.

1988 buaipi khitciangin, “Party ” ki phuanthei ci’n, galkap kumpi te’n ong taangko takciangin, tu’a NLD ( National League for Democracy) mah ah mikhempeuh “Huu” kisa in, member kilutpah ziahziah hi. Ahangpen, Pi teeknu, U Aung Gyi leh U Tin Oo ( G 3) te kigawmkhawm a, ong phuh uh himawk aihcianga, tualai a Masahlah leh paaltanteng losiah phial Kawlgambup aki lutpah ngeingai phial mawk hi in, azum munpen ahihleh tu a University Avenue a, Pi teeknu inn mah ahihi.

Ko lawmta teng 1. Tg. Thanglianpau(tulaitak President of ZRA), 2. Tg. Ginkhankhai (Giakhai-(Siapi Tateng tapa) lammangpi, ong nusiakhin) leh Keimah Tg. Pumzakhai tezong vakitulmawh in, member kalutpah simzawzen uhhi. Kopen Tedim township pana lut kahihman un, NLD membership card khattek kangah pah uhhi. A card pen hoihpeuhmah in, a utonglim bang apuamto (ေဖါင္းႂကြ) tawh akibawl hizen hi.Tedim township NLD ah,ana kinak bul mahmah ngei hiven.

• 1. Tg. Thanglianpau
• 000001.
• 2. Tg. Ginkhankhai
• 000002.
• 3. Tg. Pumzakhai
• 000003.

Bangmahpi a, kiman’na aomlohhang, cihdan teng nahi keeisam ung.Minam party thupisakzaw ka hihman un, NLD ah ana kipsuaklo kahi uhhi. *Party numbat te ah, abem (zero) mal phazah ciannawn keng. Khialthei, maanthei.

Tuakhitteh hun ngahsim a, zum phazel pong. Ka etet uhcianga NLD(Ygn) ah mualtungmi na tamhiaulo in, kawlte bebek ahihlam kaphawk uhteh ka kan kawikawi uhleh mualtungmi te’n pen, amau minam party ciat a phut diimdiam tek uh nahimawk. Tua ahihmanin ka lawmta tengvua thukawng hekkik in, minam party khat phuhding kikumkik. Tualaitak ka zintun’na hotel Thiriyeihmon aa, Pu Pumzalian room ah alunglut teng kikum kimutuah in, ZNC party aphut kahi uhhi.Hiteng kong gelh deudau napen, ZNC ki phuhkhit thubek ki zangei a, ZNC ki phuhma Kawlgam political party ah ei Zomi te tawm khacik kihelkiauna,mipite kong hawpsawnnop man ahihi.

Pi teeknu tawh ki muhding hoih kisa in,ki muhtheih nading ka kan uhciang, akimu nuam party pen kigual ngeingai a, appointment lakkul senh anahimawk hi. A kimu nuamte minutes 10-15 sungbang kimu thei cih katheih uhciang kozong ZCD party mintawh kimuhding kanget uhleh minutes 15 sung kimuhtheih nading hun ongpia uhhi. Ani akha bel theinawn lianlo. Tuani a, apaiteng, 1. Pa Pumzakap, 2. Tg. Thanglianpau, 3. Tg. Ginkhankhai leh keimah 4. Tg. Pumzakhai te ka hiuhhi. Pi teeknu leh u Kyi Mg na om uh.

Thugen tepawl theihlaiteng genleng ong tamveve dinghi. Aihhang ka ciapteh vilvel khatpen” NLD leh ZNC pen alliance ihhihi. ZNC kuangluina ah NLD in, ong luilo ding hiung” ongci napi 1990 kum kitel ciangin, ZCD te luina ah NLD te’n luilua kisa keibang, ka hausapa uhtawh ki hehsuah in, lawmte’n ong khenkeileh akisual dektak ka hiuhi. Aihhang 2015 election ciang Pu Chinsianthang kuanglui nadinun ah NLD in, ongluilo ahihman in, tualai pepek a, ong kamciam tu’n ong taangtungsak aitaam maw, kacisim gige hi.

ZNC party zong phutkhin, gamsung khualzin gamvakna tezong aki zin ziahziahkik theih takciang, Lawmte pawlkhat vaciah in, Kawlpi, Tedim, Tonzang tengah ZNC signboard suang in, party nadingsak uhhi.Kei bel vaineilai kahihmanin Ygn ah sawtsim ka taamsuak laihi.

Ka vai asian’khit Tedim ka ciahtoh leh lawmte’n tualaitaka kumpi bank building (Council zumkhang) atungbup ah,zum nahong uhin, mipibangpen sungtum pusuak natamkeei in, lawpin, thazong ka ngah mahmah hi. Panmunzong na hawm ngeingai khin uhhi. ZNC phuhlai inbel “Mailam ah apil asiam, minam it, azomto nuam aomleh tuate khualna a, aki phut ahihi” cih ki thukimna khat kana nei uhhi. Tua mahbangin, ZNC phuhcil a, lawmlehgual tesungpan, akihel nawnlo zong tampi naom hi.

A kihellai katheihte ahihleh, Pa Suanthang, Pa Pumkap leh Tg. Thanglianpau cihtenghi’n, tuatakpan, Pa Chinsianthang, Pa Ginkamlian, Tg. Zamkhansuan leh khangno mipil misiam Tg. Gosawmkhup, Tg. Vungzapau cih tepawl, honkhat tawh na kilam uh ahihmanin thangahhuai mahmahhi. Keibel tuapan kipan kihahhel zonawnlo in, ahihhang, ka hihtheih tantan ka support veve hi.1990 kum Party campaign na ah, ka nau’ mawtaw mahzangin, Singgial Cikha, Zampi, Tonzang cihte ah kakihel kawikawilai hi.

Akuamatek hanciamna mahtawh kitelpi ahzong Tedim leh Tonzang munkhattuak ah kicing pahhi. Ka phawkkik vat ka mangngilh ngei nawnloh dingkhat ah!March 2nd 1989 ni a,ka mopawi unzong, lamen ngam hetlo napi’ng, Tedim ZNC pan lawmlehgual tampi takte’n letsong tampi tawh onglawm ngeingai uh ahihmanin nuamin, ka aangtang mahmahhi.

***Khat leuleu kaphawkkik vatkhat “Koipan nazakhiam?”ci’n ong kidong leh ka ngawhding bel theinawn hetkei nave’ng in, tualai in, ZNC ah Pu Khenzamoong leh Pu Dr. Zamkhenthang te’nzong kuang ongluiding cihkhat kiza a, keibang tha angah khemahmah mankeei hive’ng. Pu Zamkhenthang inbel, York Rd. a, Pa Pumkap te innah, ZNC leh Australia palai te kimuhkhopna interview ah, ong kihel in, kam ong phensak bel thei ing.***

1992 ciang galkap kumpi’n party honkhat ong suphiatna ong taangko uh a, tualak ah ZNC zong ong kihel hi. Radio pa news ka zakna pen, Pansodan a, Pi Mankaihniang te inn ahihi. Hehtawh dahtawh thangpaihtawh kithuah ngeingai in, cihdandinglah idea kineilo mawk ahihmanin keibang ka hici omsuak maita hi. Aihhang Pu Chinsianthang te sungta inbel alauhuai mahmah kawmkal ah ahithei bangin, party nadin’pih uhin, Pu Chinsianthang bangpen thong na kiatlawh ngekngek hi. Gamleh minam adinga aki piakhia teuh ahihmanin hih ka laigelh kawm mahin, “Zahtakna” ka piahi. A mau hanga ZNC/ZCD tudong ading ahi hi,cileng kikhial kilkello hi. 1997 ciangin, Pasian lamhon’sakna tawh gamdang ka paikhiata hi.

Gamdang tunkhit ciangzong, ahitheithei in, hanciam in, Zomi it, lawmlehgual akuamahtek tawh kikum in, Florida Zomi Innkuan ci in, 2000 kum thawhkik nipini in, Sakollam a, Sia Golianthang thupha piakna tawh kaphuh uhhi.

Tuabang tengtawh ka omtohtoh laitak in, Singapore pan Tg. Gosawmkhup US ong tun takciangin, “Pu Thang hamsatna te onggen a, a pocket money ding ih vaihawm sakzel kuldinghi” cihthu ong zaksak ciangin, tua akipan $10,20 cihbang ZNC tawh aki paaikaan ngei zawdeuh tengin, ka theihneih zel uhhi.Keibang tamveipi theihneih zokeng. Nihvei thumvei vallo dingin, um ing.

Tuakhitteh 2005 takciangin, ZIUSA ong kiphuh zoleuleu in, tuatung tawnin, makaipi te’n vaihawm siamna tawh kumkhat khit kumkhat taangzai takin, na ong semthei toto in, ZNC pan ZCD akilaihkhit ciang party makaipi tengzong, ahithei bangbangin, ahithei zahzah ZIUSA Khawmpi te ah Zinmangpi dingin, kisamzel ahihmanin, Pu Chinsianthang, Pu Ginkamlian leh MP tetawh kisawhkha kik in, ihZomi party neihsun pen ih vei mahmah leh ih it mahmahsa ahihna tawh pilna siamna leh muhna bangmah neilo pipi mahin, nasetakin ngaihsutna, deihsakna tezong, azakdah phialzah dingun ki saila khazel mah hi.

2015 kum kitelpi takciangin zong minam it’ ana kitam mahmahna agah kimukhia a, Pasian panpihna tawh, eiZomi te tangthu ah aom ngeilo gualzawh lawhcin’na ihZomi partyZCD in ong lokhia zihziah hi.Tua a, kipan tuniciangdong, ihZomi MP te, amau munciat vuah mailam Zomi leh Zogam khantoh nading bangci kalsuanding cihte vaantek in, aom dimdem laitak uh ahihi.

Tungawngaw inbel ZCD tung lunggulhna leh deihsakna pulaakna hisak tani.

1. Advisor neiding

Apil asiam bek hilo ahau lai a, President din’mun angah US kumpi te nangawn in, thudot tangtang Advisor pi nanei sam uh aihteh telcing, ihZomi MP khempeuh ahikei zongin, abulpi ahideuh President leh Secretary inbel naneih hamtang dinguh, kong deihsak mahmahhi. Tua Advisor dingte pen, no thuzawh dingte hikei henla, pilna siamna nei a, mipi’n azahtak leh Zomi Zogam avei te telhuai hi.
Gentehna in,

• 1. Dr. Rev. Dosuanmung.
• 2. Dr. Rev. Paukhankhai.
• 3. Dr. Rev. Nanglyankap.
• 4. Dr.Rev. Gocinzam.

Cihte akipan gualtung tuang leh minam it amuanhuai Zomi tampi ihnei a, tuate kiangpan kalsuanzia ding, ngaihsutna nget denkeeiding, ka hong deihsak mahmahhi. Amau tepen lungsimkawi neilo banah, apualam pan, ong mutawngtung teuh ahihmanin eitawh kituak idea hoihnono ong piatheilua mahmah dinghi cih 100 ah 100 ka muanghi. Kawlgam Zogam ah masuan kician leh athupi anei teuh ahihmanun gamdang khawng apai uhciangzong, ataamtaam te hilo uhhi. Adang Pastor gamdangpai tampi tedana nipini tunkik ding, ciimzeen nguizeen a, kha gukguk ngakte hilo uhhi.

2. “Mipi te’n ihZomi ait manvua telcing ihhihi” cih na phawk’den dinguh kong deihsak hi.

Ih 914 vai asat mahmah khit asawtlo a, election pi ong omto pah ahihmana tua in, tampitak ong tawsawnto in, hizaha lawhcin’na ah % tampi akihel higige hi cihzong naphawk dinguh kong deihsak hi. 2020 election ciang tuadan ong tawsawn ding bang ihnei hiam? Tuading ih kiging naihiam? Kawlgam bek hilo in, Leitungbup a, akizel Zomi Zogam itlehvei te ii ihZCD tungah upna leh muan’na ong kizom suaksuakzo takpilai diam? cih tepawl serious takin, nangaihsut vua, na kikup dinguh ka lunggulh mahmah hi.

3. Zomi leh Zogam phattuam nading ahihnak leh Haka, Falam, Tedim dongngiat ah ngapngap in, President leh Secretary te’n tuamun a thunei tekiangah, vathuum a, vanget dingpen, hamsa nasak hetloh dinguh ngaihsutna ongpia nuam ing. Guallelhna Tokaaina dan in, sehlo a, minam leh gam’ phattuam nading ahihnak leh ngapngap in, nana vaan kawikawi dinguh kong deihsak mahmah hi. Tua banga na vaansate uhzong, ngahding ngahloding akitel mateng, eknusiatlo in, processing bangtan tungta hiam cih na nungzuih tanghtangh laidinguh thupi mahmah laidinghi.

4. Zinsuk zintohna ah ahihtheih liai nakleh hunla in, Zomi kipawlna aom khempeuh ahithei zahzah tawh kilawmtatna(Hlawtdaw vaite hawpsawnna te akipan thutuamtuam ki share na) neihzelzel dingzong nong thupi ngaihsut nadinguh zong ka lunggulhna lian mahmah khat ahihi.(Fellowship).

Atunga ka lunggulhna kong pulaakna tepen, matlehzeta hihding aommah bangin, kumkhat khatvei khawngbek vaandingzong omlel hi. Atawmpenpen, hiteng hih zeuhzeuhzo leng ih lawhcin’ kik nading 80% bang ong support dingin ka umhi.

MP luiding telna ah

Nung ZCD Tedim khawmpi lai a, President Pu ong thusun’ penbang asang theilo ka hihi. A tapa Pa Kamlamkhup pen aki nominate leh a qualify man hihenla President ii tapa cihhang hikei zawleh. President tapa ahihhang a qualify lopi peuhmah ih luisak hetlohding leh ki maitang zahtak ki aana na cihtepawl ong omsak kilkel kei un, cih, ka lunggulhna ong pulaak leuleu ing. 2015 kum inzong Tongzangah party phuhcil akipan tuni ciangdong asem suaksuak hi cih deihsakna tawh a qualify keeilo khat ih luisak kha a, tua khawk ih suplawhpah tepawl phawkhuai mahmah tahi.

Kum leh lai pilna

Kum 60 val tengin, ong luinawnkei unla, Shan te makaipi pa danin, vaangnei takin party ii patron din’mun ah omin, party ii akisam vaan dingte management nonglet hiithiat leldinguh kong deihsak hi.Aihhang khatah Siapi Vungcinthang leh Siapi Thangzatuan te apilna asiamna acihtakna acidam laina teuh kumpi te’n iplah in pension cingkhin napi kumsawtpi asepsak laite dan in, ih party sungah iplahlai aomlehbel thukhat cini.

Adiakdiak in, President pu leh Secretary Pu tepen, alauhuai mahmah hunlaitaka, thongkia, anngawl, bawlsiat thuak cihdan ahamsa mahmah pumpi tawh thuakna nawkna te na thuakkhin diipdeepkhin nahihman un, athakin, khatvei “Zahtakna” ongpia leuleu ing. Tuhun leuleuciang pumpi tawh nawk teltalhun ong hinawnlo leuleu a, “Khuak” tawh nawk hun ah ong kikhel leuleu ta ahihmanin, akhuak hat, akhuaktai leh Kawlpau mangpau mitheih dinga pauthei, computer siam khangno te, hangsan takin, ih kipatsakding, ong vaihawm un, cihzong ong deihsak in, lunggulh mahmah ing.

Pilna lam ahpen, University college khat pepeuh pan graduate hi hamtangh henla, akah tanghtangh (day student) temah ong himasa leh lunggulh huai kasa hi.

Party term beima a, a resign nuam nemnumte hilo in kuhkal taka asemsuakding aangsung atheilo dingte mah tel tanghtangh leng cihhteng lunggulh leh deihsakna kong sunghi.

Hiteng kong sun’ngam zihziahna pen IhZomi party neihsun ZCD leitung beidong damsuak in, phungpha semsem lehcih ka lunggulh man ahihi. ZCD pan adang Party lunggulh tuan peuhmah sawmlo kahihman zong ahihi. Mimal in va ki involve theilo ka hihmanin, ZCD agualzawhna leh alawhcin’na teuh ka zakleh ka omomna pan khut kana bengbeng dinga na aangtang mahmah in, lungdam kana koko dinghi. Tuamahbangin, guallelhna leh lawhsapna ongneihna uh ka zakleh kana dahmahmah dinghi.

Hih kong pulaakna tehangin, ZCD pan ahizongin mimal khat pepeuh pan ahizongin,kipampaihna khat pepeuh aomphial lehzong, ZCD pen ka nusiatsawm tuankei hi. Party vai ah nuak philphul, kizol lunglung cihkhawng kadan hilo hi.Tua bangdan ahiphial zongin, party dangte ka lunggulh khatzong aomtuankei hi. Lawmte pawlkhat dana media khawng talk show khawngah gensia pah nelgawipah ngekngek ding cihte pawl ka hisuk keidinghi. Abeidong nongsimsak lungdam lua. Pum Khai