ZCD pan Anthony Kap Khan Khual tawh holimna

ZCD pan Anthony Kap Khan Khual tawh holimna

ZDC (Representative Person) pan Anthony Kap Khan Khual tawh holimna
British Prime Minister David Cameron i April 2012 Kawlgam hong pai na ah, kimuhkhopna ah Zomi nambup aitang in Zomi Congress for Democracy (ZDC) Party (Tua hun lai in Zomi National Congress) pan Anthony Kap Khan Khual na kihel thei hi. Amah tawh kiholimna a nei Zingsol tanu Tg Sian Pu (Siamsin) i thupuakna anuai a bang ahi hi.

Zingsol: U Khual aw, nungin British Prime Minister David Cameron tawh holimna nei khawm cih na za ung…?

U Khual: Aw…he… April 13, 2012 ni 5:00 PM pan 6:00 PM hun sung teng kimuhkhopna nei mah ung ei. CRPP (Committee Representing the People’s Parliament) kipawlna sung akihel teng hi ung. Tua kipawlna sungah National League for Democracy (NLD), Zomi National Congress (ZNC), Shan National League for Democracy (SNLD), Arakan League for Democracy (ALD), Mon National Democratic Front (MNDF) teng kihel hi.

Abangci deuh teng hong sam a, mibangzah kihel thei a, eimi bang zah kihel ahia?

Khangno lai hi-in Gamvai nasem kum 35 nuai siah Party tuamtuam pan kigawm mi 16 pha ung. Eimi bel kei bek hi ing.

PM pa in bang teng hong dong a hia? Nang bang ci dawn kik, nong gen thei dia?

Aw, kingah lua ei…Prime Minister David Cameron in hong dot thu in “Banghangin no khangnote-in gamvai (politics) ah kihel na hi uh hiam?” ci-in hong dong hi. Ken ka dawngkikna ah nam 3 tawh dawng ing.

(1) Dictatorship ki-ukna tawh cikmah ciang Gamsung khangto ngeilo ding hi. Tua hangin zong 2007 Mipi Lungphona tawh Mualtung mi Gamvai nasem teng kiman hi ung. January 23 ni-in suakta thei pan ung.

(2) Gamsuang kilemna (Peace) kisam hi. Hih pen Gamvai bek tawh kilemtheizobek ing hi. Gamsung kilemna (Peace) pen Democracy le Federal ki-ukna tawh kalsuan leng lemthei pan ding hi.

(3) Gam mite pen theihsa bangin zawng mahmah hi ung. Hih pen Gamvai bek mah tawh lemtheih sawmin amciam toto leng damdamin hong beilel ding hi, cih nam 3 tawh ka dawng hi.

Tua leh U Khual aw… ZNC’ taangmi khat na hihna tawh thu gensakna hun hong pia hiam? Na neih leh bang teng gen cih nong gen thei dia?

He… Hun hong pia mah ei. Tua sungah zong nam 2 tawh thugenna na nei ing.

(1) Kei pen ZNC pan hi ing. Tua Party pen 1990 kum a Election lut Party khat hi. 2008 kum Constitutions sungah ka san theihloh uh nam 3 om ahimanin 2010 kum Election ah lutlo hi ung.

Ahizongin tun Constitutions pawl khat kikhelna hangin ko ZNC Party zong hong uk thuneite tungah Register ka lutkik laitak uhi.

(2) Ko pen Zomi kici ung. Ahihangin midang ten Official lianin Chin ci-in hong sam uhi. Chin cih kammal pen ko khamtung mite adingin Chin cih pen khiatna omlo hi. Zo cihna in Mun le Mual cihna hi. Mi cih kammal ii akiatna in Mihingte cihna ahimanin Zomi kici hi ung.

Sianpu (Siamsin)
Yangon

Source: Zingsol