ZCD Khawmpi & All D pahtawina pan ka muhkhiat

ZCD Khawmpi & All D pahtawina pan ka muhkhiat

October 23, 2019 ni Cope Centennial Jubillee Hall, Tedim, Zogam a kibawl ZCD khawmpi leh tan 10 All D ngahte pahtawina pawi pan ka muhkhiat thu:

Zomi sungah Minam Itna lian mahmah lai hi. Zomi movement thanem deksuai nailo hi cih ka mukhia hi. Khua 76 pan in delegate 859 pai hi. Akisam zah sang in tampai zaw a, apainuam apai kha/zo lo zong tam mahmah hi. A utpeuh paiding kici hi leh Tedim khuapi vukcip zoding hi.

ZBCA leh ZBCM makaite zong thupi kasa mahmah hi. Vai tampi nusia in US pek pan a hong pai vingveng uh himawk ahih man in zahtak huai kasa hi. Vanleng tuan khawng abaihloh dan atuang ngei te’n thei hi. Nai 1 nai 2 sung tuan lel bel phamawh khollo a, nai 10 val vanleng tuan pen kigim mahmah hi.

Nai 20 val sung vanleng tuang in hong pai uh a, ih Zogam ah All D ngahte pahtawina amau mahmah in hong piakngiat uh pen thupi kasa hi. Kawlpi pan in zong ZBCM makai te uniform tawh etlawm tak in honpi khat hong kuanto uh ahih man in pawi thupi saktuam mahmah hi.

Atom in: 22 ni a ZCD pan CEC member 14 te’n Tedim Guest House ah ZCD maban ding deihtak akikupna uh pan un:

• Constitution etphatna leh puahphatna nei ding in tua pen 2020 kum February kha a kipsak ding.
• Tua thukhun zui in National Committee (NC) or Central Committee (CC) member mi 45 tawh kiphuan khia ding
• Tua mi 45 te’n CEC puahpha ding
• Thukhun tawh kituak in MP candidate ding telkhia ding
• 2020 kum Zomi Nam Ni tawh kituak in ZCD Youth Conference Tedim ah thupi tak in bawl ding.

cih ahih hi. Mipi in Zomi party it mahmah in lam-en mahmah hi. Mipi’ muanna ngah mahmah lai hi. Cih ka mukhia hi. Lungdam hang, Mung Laan Thang (Tonzang, Zogam)

Tuni ZCD Meeting Kipan

Tuni ZCD CEC meeting Tedim ah kipan ding hi. Zomite’ mailam ading in meeting thupi mahmah khat ahi hi. Tutung meeting ah Party maban leh Minam maban ding hoihtak in hong vaihawm theih vua leh akilap liailiai hi a, hong vaihawm kei mawk vua leh ih ki bungbu tun ding a, Zomite akhang a sim ih ziakai ta ding hi. Kipuah phat hun mahmah ta ahih lam ih theih tek hi. Thuhoih pen ih lam et mah bang in thusiapen zong hong piang thei ding hi. Kiukhat pan, Mung Laan Thang (Tonzang, Zogam)