Pacific Tuipi Kantan In Leeng
Narita Vanleng tual pan ka lenkhiat zawh uh a sawtlo khuavak lai mah in Pacific tuipi kantan ding ka kipan pah uhhi. Tutna mai ciatah ka tuntunna uh a zawi leh ahun local time tawh bang tawh hong kilak suaksuak ahih manin, bangtan vei pai lai ding tai bangzah gamla lai cihna dongin hong lak diudeu hi. Ihmut cimtaktak theih na dong dingin nuam tak phatak in ki-ihmu thei khollo a mengmesa vive in kituangsuak suak hi.
Ni tawh ki-maingat a paipai ka hi leuleu uh a, zingsang lam nai 6:30AM khawng mah ciangin tuipi tung mahah ni ka gal muh uhhi. Ni hong sang tektek a, LA vanleng tukna (LAX) ka tun taktak ciangun amau gamah August 14, ni mah zingsang nai 11:30AM in ka tung uhhi.
Maymyo Pan Rev Khai Khen Thang
Yangon vanleeng tual pan pekmah in PyinOoLwin (Maymyo) pan Rev Khai Khen Thang tawh ka kimu uh a, ka kidot uh ciangin amah tawh ka paina ding uh akibang linlian na hihi. Bangkok tun ciangin ko innkuan leh amah a pai suaksuakna ding vanleng a zawi a paidan (route) leh ahun kibanglo ahih manin, amah Bangkok Airport ah zankhat hong tam hi.
A zingteh ko sun thapai Narita International Airport ah vanleeng ka ngak uh a, Narita pan ka tuanna vanleng uh kibang ta leuleu in, LA ah amah leh ko innkuan thum ka tung ton uhhi.
Welcome To America!!
Thursday, August 14
Immigration Gate ka tun uh ciangin gate tampi na om a, ko innkuan lutna ah mikangte a thaupian iim eem khat na omin maitai takin; Welcome to America!! hongci in ko na leng ka mai uh hong tai sak zo lai mawk hi.
Ka passportte uh a et zawh ciangin dotna dang tampi hong dong thuah nawn het lo a, bangtan vei om sawm nei vuam ci’n hongdot ciangin, kei a’dingin a ol gige hi napi, amau gam luttheihna ding hi zahta a, ahaksat sak vial mahmah uh, sawtveipi ut ing ci leng kisathei semsem lua kha’nteh ci in, ka lungsim in galdo in ka langpan pong mawk tazen dihdih a, kha thum hi leh pha zo!
Ka ci suk phuau hi. Ka nget zah mah hong piapah lian hi. Ka nuphalte’n kha guk bang ci lel in cia hong vaikhak tangtang khol mah uh hi ven, a taktak ciangin a tuampi khat hong suak hi.
Azom omlai…
Agelh: Awn Za Pau
Comment piaknop aomleh...