ZCD Party MP Candidates teeldan thusunna ~ Go Sawm Khup

ZCD Party MP Candidates teeldan thusunna ~ Go Sawm Khup

Minam Party, Zomi Party, Zomi min suang Political Party hihna tawh leitung muntuam tuam a om Zomi khempeuh in muan leh suan in aneih Zomi Congress for Democracy (ZCD) Party in zingmah thaimah ciangin Khawmpi khat bawl ding hi cih thu ahong ginkhiat a kipan in Party Kivaipuakzia puahpha ding ci a lam-etna anei a om bangin, 2020 Kiteelpi ciang ZCD Party min tawh Kuanglui ding MP Candidates kiseh ding cih lam-etna anei ki-om in ka mu hi. Political Party cihciang Election ah lut a kiteelna tuh dingzong maban lianpen khat himah hi. Lam khat panin Party phungvuh ding sangin MP Candidates vai tawh Khawmpi a kibawl ahih ding pen khasiat huai in ka um hi.

Party Kivaipuakzia puahphatna ding mimal ngaihsutna ka sunna tungtawn in khat leh nih in hong kupkikna sung ah, Party leh MP-te kizopna thukhun limtak khun huai hi ci inzong hong kum om a, tuamah bangin, Part MP Candidates bangci kiteel ding hiam cih dotna hong dong zong ki-om hi. Khawmpi sung ah MP Candidates kiseh ding vai a kipan, Party leh MP-te kizopna, MP Candidates teel dan cihte tawh kisai keima ngaihsutna leh tu khang hun tawh kituak, Democracy dan azui Party-te kalsuan zia pawl khat ka hong luikhia nuam hi.

A masa in, Political Party a kiphuh ciangin Ngimna Bulpi kinei a, tua Ngimna Bulpite a tangtun zawhna dingin tua Party sung a Thuneihna anei Pawl-te (ZCD-NC dan) lamlahna (Direction) tawh Executive Committee (ZCD-CEC dan) pawlin madawk (Initiative) in ma pang hamtang hi. Tua Party in Kiteelpi sung ah teelcing in MP/MLA panmun angah uhleh, Party Ngimna Bulpite a tangtung sak dingin, Madawk CEC teng ban-ah, MP/MLA-te in ma pangkhawm theipah uhhi. CEC pawl in madawk in ma apan sangin, teelcing MP/MLA aneih ciangun Party Ngimna Bulpite lawhcingbaih zaw hi.

Tua ahih manin, Party khatin teelcing MP/MLA aneih aleh, Party CEC Pawl in MP/MLA tawh ma pangkhawmbek hilo, akisapna bangin a panpih kul hi. Tuaban ah, MP/MLA-te in Party Ngimna Bulpite atangtun theihna ding sem maw, semlo cihpen limtak encik in, Ngimna Bulpite atangtun theihna ding Maban tuamtuam, Gamvai tuamtuam asep theihna dingun thu apiak (Direct/Command) kul hi. Tua hileh Political Party cidam theipan hi.

Tua ahihteh, Zomi-te Party, ZCD Party in a Kivaipuakzia puahpha dingin kithawi ahihteh, bangci bangin MP Candidates teel ding a, teelcing MP-te in Party CEC pawl tawh bangci bangin kizom ding hiam cih thute limtak in khun huai mahmah hi. Tuabang thukhun kician omlopi in, ZCD Party ih kalsuan aleh lampi omlo a kalsuan Minam Party suak ding a zum huai mahmah ding hi. Tua sangin asuksia zaw ding thu in, MP Candidates sehna ah, bangci bangin teel ding cih thukhun omlo ahih manin, Makaipi thunei, adiak in, President leh General Secretary in ama mimal deihna tawh, Dictator bang danmah in avaihawm hun tung theizel ding hi.

Tua ahihteh, Democracy hun ah, ZCD Party in MP Candidates teel dan ding Thukhun sung ah limtak in khung masa a, tua khitciang MP Candidates teel ding kisam peelmawh hi. Ahih theih aleh Party sung mahmah ahzong Democracy zia leh tong zui in, Party Members-te, Mipite thuneihna zahtakna tawh MP Candidates ding teel ding, thusim omlo a mipi lungkimna leh theihpihna (Transparency) tawh kalsuan ding kihanthawn ni.

Kei mimal ngaihsutna leh ka deihsakna zui in, ZCD Party MP Candidates teel dan ding anuai a bangin kalsuan zia hong khungsuk ning.

ZCD Party MP Candidates Teel Dan Kalpite (Steps)

1. Tu tung Khawmpi sung ah ZCD Party Kivaipuakzia puahphatna limtak in kikum in, ZCD Party buppi tawh kisai Party Thukhunpi zui in Thuneihna asang pen anei ding National Committee (NC), Gambup Kawmiti (Makai Pawl/ Upa Pawl / NaiNganLong SaiYa Kawmiti) kician khat lam/teel hamtang ding,

2. Khawmpi sung ah ZCD Party Thukhunpi akim in a kikipsak zawh naikei aleh NC in Pi Mang thusun tungtawn in kikupna leh khensatna bawl ding, tua Party Thukhunpi zui in, NC in amanlang theipen in CEC Paw athak khat teel ding, Gentehna in 2020 February kha lapin Party CEC athak khat teelkhia ding,

3. ZCD Party CEC athak in, ZCD Party min tawh 2020 Kiteelpi atuh nuam, Kuanglui nuam MP Candidates khempeuh kaikhawm ding,

4. ZCD Party CEC in MP Candidates ding a ut, Kuanglui nuam Party Members khempeuh limtak sittel ding, muan huai maw muan huailo kan ding, akisap aleh thudotna (Interview) leh sittelna (Scrutiny) nei ding, tua tungtawn in CEC Pawl in MP Candidates ding a kilawm Party Members teng, Bial (Constituency) khat ah atawm pen Candidates (2) peuhmah tengkhia ding,

5. ZCD CEC Pawlin atenkhiat MP Candidates teng khempeuh ZCD Party National Committee (NC) ah puakto (Nominate) ding. ZCD NC in Secret Vote zangin ZCD Party MP Candidates ding teel ding, (Hih pen Primary Election hipah ding hi),

6. ZCD Party NC in ateel ZCD Party MP Candidates teng pen 2020 Kiteelpi ciangin ZCD Party min tawh kiteelna atuh dingin kiciamna, kipsakna bawl ding,

7. ZCD Party min tawh MP Candidates dingin NC in ateel Makaite ZCD Party CEC a kipan Party buppi in tha neihzah tawh panpih ding…

Atung a bang danin Minam Party Candidates ding pen Mipi leh Party Members-te thuneihna leh theihpihna tawh kiteello hileh, Party pen nidang a BSPP (MahSahLah) hunlai a Dictatorship kimakaihna tawh akalsuanlai suakmawk ding hi. Democracy zia leh tong a deihpen, Party min mahmah ahzong Zomi Congress for Democracy acingiat, Democracy ading a kiphut Party khatin MP Candidates ateelna ah Democracy zia zuilo a, lam hong pial in, nidang a zia leh tong Dictatorship zia hong zuihlai aleh, tua bang zia leh tong adeih Makai ahi a, Party Members ahizong, manlang takin a kihepkhiatna dingin mipi tha tawh kalsuan ding kisam ding hi. Tu laitak a Party Makaite sung ah kuamah peuhmah in Dictatorship deih peuhmahlo ding a, Democracy deih vive hiding hi cihpen akua mahpeuh in kithei hi. Ahi zongin, ih kalsuan zia ding, Thukhun kician om nailo ahih manin, lam kikhial theilai cih dingbek ahi hi.

Tua ahihteh, tutung ZCD Party Khawmpi sung ah Party Kivaipuakzia limtak in kikum in, akin theipen in kipsakna khat bawl a, National Committee phuh zawh ding kisam hi. Tuakhit ciang, NC in CEC manlang takin teel in, MP Candidates ding hong kaikhawm panleh Kawl Gam sung ah apicing pen Political Party khat bangin kikalsuan theipah ding hi. NLD Party nangawn in hong etteh ding hi.

Atung a bangin ih kalsuan zawh aleh Zomi buppi in hong muang semsem ding a, tu laitak a ZCD MP teng inzong a kingaplai uhleh MP hong ngakkik hamtang zaw ding uhhi ci in ka um hi. A thupi pen in Democracy dan, Transparency, Party Members Rights cihte ahi hi. A kideihlo pen in Dictatorship ahi hi. Dictatorship dan zatloh a phamawhzel lohna dingin Khawmpi sung ah Party Thukhunpi leh Kivaipuakzia limtak in khung ni. Pu Go Sawm Khup