Kap Za Dongh (Kum 26) thu kitelta
A min: Kap Za Dongh
Apa min: Phian Deih Thang
Anu min: Huam Ping
Akhua: Phinkhongyi
Minam: Falam/ Ngawn
Atung a thu tawh kizui in Kap Za Dongh (Kum26) ii luang hawm kivuina thu leh man (photo) facebook panin kimu khia hi. Thu piang a ki theih ciangin ZAM panin kikan pah a 19/4/2015 Sunday ZAM Thu puak panin ki suaksak pah hi. Amah kua hi cih tello pi in Zomi min a it pawl khat kisel in makai te na-ngawn konlawh in upmawhna tek gen ngeingai uhhi. ZAM zumpi panin ih sisan pih takpi mah hiam ci-in ki lung himawh a, Genvai lampan in kicing takin hong kan khiazo ta hi.
Kap Za Dongh (Kum 26) pen Malaysia ah kum 10 val om khin a, kham theih guih theih tawh kidiah in khua sungah a zalen mikhat hi ci-in a sanggamte in suakta takin gen khia hi. 2013 kum in FCC Pawlpi veina leh deihsakna tawh Bible Camp ah paipih uh a, Camp hun zawhma ni khat sapin na vakkhia aa tua pen a kimuh nunung pen hipah hi. 26/12/2013 ni-in Lenggeng Camp /Thong lut hi ci-in Palik te in ciamteh hi. Thongsung pan asih ciangin Thongcing te in inntek kumpi Immigration te ap uh a, Immigration te in Kepong phualsat Kawlte Genvai kipawlna a koh ciangun Kepong Genvai te in 16/4/2015 ni-in Cheras Hanmual ah mei tawh halna nei uhhi.
Tua ahih manin hih bang thuging leh min leh puam kitello thukhat/vai khat peuh ih muh ciangin deihkaih lua in, ih pau khiatpah ngeingai loh ding Falam mi, Kap Za Dong (Kum 26) luanghawm in Zomi te thu hong hilh ahi hi. Zomi te zumpi bek ahi lo Pawlpi ahi a, Khua kipawlna zongin kipawlna khat peuhpeuh in zuih ding thukhun om gige a hihi.
ZAM zumpi panin Genvai lam vaipuak nasem te in Zomi sinsen luang (157) vui khin uh aa, tua thu te mipi in phawk khalo uh hi. Hi zahta kivui Zomi te dahpihna zong kipuak ngeilo hi mah leh information manlo leh thu kicianlo thu te ah manlang takin kampau aa laiat giapgiap Zomi te in mailam hun te ah lungngai masa in laiat, kampau ding hi hang cih ih ki phawksak hi. Zomi te Topa’n hong dam sak hen. ZAM Thupuak
Comment piaknop aomleh...