ZBC ma kum tulval lai-in ‘Zomi’ cih laimal omzo ~ Dr. Dongno

ZBC ma kum tulval lai-in ‘Zomi’ cih laimal omzo ~ Dr. Dongno

I Zomi sung ong khoih zeuhzeuh thei thu khat om aa tua-in, mi pawl khatte-in 1953 kum ZBC kibawl ma-in “Zomi cih kammal ki ciaptehna record om lo hi” acih uh ciangin pawlkhatte-in “ZBC ma-in Zomi om lo hi” aci sa-in abil uah thalkiat pah ahih manin kinialna tampi ong piang zeelzeel hi. Hih tegel thu tuam tuak hi aa, kibang lo hi. Akul lo ki ko ki ngawhna piang sak ahih manin hoihtak ngaihsut ding kisam ka sa hi.

Pu Khupkhan Thang Taithul-in, “ZOMI BEK ZOMI BEK” sung ah Zomi tawh kisai ciaptehhuai thu tampi khil diudeu-in gatang ong kaai aa theihhuai thu tampi ong lui khia hi. Tua sung ah, “Zomi” cih “kammal” aki ciaptehna masapen, 1953, ZBC ciangin ong piang pan aa, tua ma-in “Zomi” cih kammal ki-atna laibu, magazine, lai kihawmte sung ah om lo hi “ ci-in gen hi. Amah bek hi lo, Col. Khen Za Moong leh Pu Lian Uk in zong tua ciang mah kan zo uh ahih ciangin, ZBC mah ah na dinkhawl ciat uh hi.

Hih pen “ZBC ma-in Zomi om maw om lo” cih thu hi lo-in “Zomi cih kammal lai tawh ki-atna record [(Roman) Mang laimal-in)] om maw, om lo” cih thu hi aa mikim adingin tel hak akisa thei ding thu khat hi mah hi.

I tel ding thu akisam pen, “Zomi” cih Mang laimalin ZBC ma-in record om kei” aci uh ahi hi. A taktakin thukhen mangte mai ah thu kinial ding hi leng, upadi a-yah in maan uh hi. Banghang hiam cihleh “ZBC ma-in ‘Zomi’ ci aa ki-at liinlian laimal lah theih ding, tetti athauh-ahta – documentary evidence English tawh ki at tangthu laibu sung ah om lo hi” aci ahi uh hi. Jo, Yo, Dzo, Zhou, Zahou, Zou, Cho, Asho, Khumi cihte Zomi cihna vive mah ahih hangin, “Zomi” liinlianin ki at lo ahih ciangin, upadi mai ah hihte tetti-in kisang thei lo kha mah ding hi.

Hih lai ah, amau English tangthu laibu sung teng bek na zong kha uh ahih manin, “Zomi” cih laimal na mu lo uh hi. “Zomi” cih kammal pen, English bek hi lo-in, Bhrami script, Sanskrit, Paucinhaulai, Senlai, banglai-banglai hitaleh a kiciaptehna peuhpeuh laak theih ahi hi.

Tua ahih manin, ken “ZBC pian maa, kum 51 lai pek, 1902 in Pu Pau Cin Hau-in “Zomi” ci-aa ama ‘lim-laimal’, ka cih, logographic script tawh na ciamteh khin zo hi” ci aa ka prove-na ka at Pu Khupkhan Thangin limtak na sim lo kha-ahih manin, tua ka cih pen“Ken ka sang zo kei hi “ ci-in hih bangin ZOMI BEK ZOMI BEK, p. 2 ah ong gelh hi.

“Dr. Suan Za Dong, M.B., B.S, D.O. in Laipian “Pau Cin Hau lai” in, (Roman alphabet a’ kihello) “ZOMI” cih “Word” at thei ahih man’ in, nidang pek (Pau Cin Hau lai) a pian ma pek in “ZOMI” cih kammal “Terminology” or minam min om khin hi ci in gen hi. Ke’n tua ka sang zo kei hi. Bang hanghiam nacih uh leh, “ZOMI” cih kammal  or terminology or minam min a om khit ma’n aa, Pau Cin Hau lai in, “ZOMI” cih laimal “Word” a at-thei hizaw lo in, lai bucing ahi man’ in “ZOMI” cih kammal (Word) a at-thei hizaw hi ka ci hi.” (A cih nopna ah, “Paucinhau lai tawh ZOMI ki at thei cihna hi bek aa Paucinhau hun lai-in Zomi cih kammal om khin cih theih nang om lo hi “aci ahi hi.)

Ken, hih bangin ka at kei hi. A nuai aa ka at original, hiah kong belh (paste) hi. Zomi: Tangtawng Tibet gam pek pan aa kiko awging . . . page 4, b. na ah hih bangin ka at hi, “b. Pu Pau Cin Hau Hun : 1859-1948 :- Zomi cih kammal pen Pu Pau Cin Hau-in ZBC om maa kum 51 lai, AD 1902 kumin ama bawlsa Paucinhau Lai tawh na ciamteh khin zo hi. ‘Zomi’ cih kammal phuaktawm hi lo-in, ama’ bawl, Lai tawh tua hun lai aa nisim aa kizang kammal, ‘Zomi’ na ciamteh hi. Paucinhau Lai tawh Zomi ki atna hiah kong lak khia hi. (Courtesy : Rev. Thang Khawm Pau , Tedim )” ci-in ka at hi. [Zomi: Tangtawng Tibet gam pek pan aa kiko awging – Dr J Suan Za Dong (2017-2018) ]

“Ki at thei” ka ci thiam bek kei hi. “na ciamteh khin zo hi” ka ci hi. Hihte nih akhiatna van-leh-lei in kilamdang hi. 1902 kumin Zomi cih kammal ki at khin hi. Hih atung aa ‘lim-laimal pen Pu Pau Cin Hau-in Zomi acihna aa abawl ngiat ahih ciangin, tua lai abawl hun laitak, 1902 kumin ‘Zomi’ cih kammal kizang ahihna siangtakin kilang sak hi. Amah lo midangin hih lim-laimal bawl lo ding hi.

Paucinhaulai pen alphabet, tempongzi bangin deih bang aa mal kigawm thei laimal hi lo-in ‘kammal khat-lim khat’, hipah lian ahih ciangin, ‘Zomi’ cihna atuam vilvelin lim-laimal na bawl hi. Lim-laimal i cih mah bangin pictural writing hi aa, laimal kigawm khawm cihbang hi thei lo hi. Tua Paucinhaulai aa ki at pen,“Zomi” cih loh adang hi thei lo hi.

Tua bek hi lo-in, ZBC ma kum tul leh sawm kua lai-in, Sen lai tawh zong “Zo” kici mite akiciaptehna anuai a bangin om hi.

ZBC pian ma, kum 1091, AD 862 kumin Sen gam Tang Dynasty hun aa diplomat, (ambassador) Fen Cho-in, “Chindwin Valley ah a kumpite leh ukpite, ‘Jo’ akici, kumpigam khat om hi. ” ci-in, ‘The Manshu – Book of the Southern Barbarians’ laibu sung ah Sen lai-in (Paucinhau lai tawh Zomi akiciapteh mah bangin) na ciamteh hi.

Sen lai zong Paucinhaulai mah bangin, kammal khat-laimal khat, logographic script ahi hi. Tua laibu English in aki tei ciangin English ah ‘Z’ awsuah pen, ‘J’ vive zangh uh ahih ciangin “Jo” in na at uh hi. (Gtn. Joseph pen ei lai-in Zawsep i cih bang). Senlai-in zong “Z” kilimzat ahih ciangin, Fan Cho’ at Sen laibu pen Senmite khatin romanised-in na letkhia hi zenzen leh, “Jo” ci lo-in “ Zo” na ci ding hi. Tu mahmahin, tua Sen lai let khia leng “Zo” mah i ci ding hi.

Tua ahih ciangin, ZBC pian ma, kum 1091 lai-in Kawlgam Chindwin kuam ah Zo kumpite leh ukpite, Zo kingdom ci-in na maang khin uh hi. Tua Zo kumpite leh a mite, Zomite ahi uh hi. Tua maa kum bangzah sung Zomi na kici khin ding uh hiam? (Tibet ciang…..hiah i kikum to nawn kei ding hi)

Zomi cih kammal ciaptehna ZBC pan hi phiingphiing lo Tua maa pekin, Zo tuallai leh Sen lai-in ki-at khin

1. 1953 kumin English alphabet tawh : Zomi Baptist Convention, ZBC kiphuan khia aa Zomi kici kammal Roman laimal tawh ki ciamteh hi. Tua ma, 1910 pan Zolai kibawl ta ahih ciangin 1953 tawh kikal sung Roman alphabet tawh Zomi ci aa lai ki-at, diary, laikhak tampi om khin ding hi napi i mu pak nai kei hi. I muh loh manin “om lo” kici thei lo hi. Kimu kik thei lai ding hi.

2. ZBC ma, kum 36 lai-in ‘Zomi’ cih kammal kizangh : Paucinhau lai tawh ZBC ma, 1917-18 hun sungin, “Piancit paite-in innlam tawh Paucinhau lai-in ‘Ei Zomi-te… tua zahin…tua lai ah… ka sem uh hi’ ci-in lai khak uh hi” ci-in Piancit pai, akhangmoipen, Bo Pau Za Gin-in gen hi. England Kumpipa George V tawh makai sawmte March 11, 1918 ni-in Buckingham Palace ah akimuh uh ciangin zong,” Zomi kahi uh hi” ci-in kigen uh hi.

3. ZBC ma, kum 51 lai-in ‘Zomi’, lim-laimal tawh ki at zo : Pu Pau Cin Hau-in 1902 kumin lim-laimal (tuallai) abawl ciangin, Zomi cih lim-laimal (atung a kilak bangin) na bawl ahih ciangin, ZBC pian maa kum 51 hunin ‘Zomi’ cih kammal, om zo hi. Hih pen a kip mahmah Zo tuallai-in record om zo ahi hi.

4. ZBC ma, kum 94, 1859 kumin Pau Cin Hau suak aa ama suah hun leh tua ma-in zong Zomi cih kammal kizang khin ding cih ki thei thei hi. Tua hi a, “Zomi” cih kammal, ZBC pian ma, kum 94-100 lai-in kizang khin kici thei hi.

5. ZBC ma, kum 1091 lai-in Sen lai tawh Zo kici kumpi gam Kawlgam Chindwin kuam ah kiphut aa a mite Zomi ahihna i gen khin zo hi.

“Zo” liinlianin akigelh loh hangin, ‘Zo’ cihna mah ahi, Jo, Yo, Dzo, Zhou, Zahou Zou, Asho cihbangin ZBC pian ma, kum 445 lai pekin Sir Henry Yule in 1508 kumin ahi zongin, tua zawh European mipil tampite-in amau zak dan, awsuah tek tawh atung aa bangin na ciamteh ciat uh hi. Bangbang hileh Zomi liinlianin na at lo uh ahih ciangin, i thulu tawh kizui-in tuate hiah i hel kei phot ding hi.

Hih pen Zomi etymology bang daan khat hi aa, mipi nautangin haaizan hak asak ding thu ahih mah bangin kitel khialhna apiangsak thei thu khat ahi hi. Zomi cih laimal om taleh om takei leh Zomi i kicih pen Tibet pek pan ahihna zong i sim zeel aa, ( asim nuam a om leh [email protected] ah kingen thei) i pu i pate’n zong “Ei Zomite…” mah ana kicih tangtangh uh i zaza hi.

Tua ahih ciangin, English aa kiciamteh bek record i sak leh bel athu tuampi hi ding aa, Zo tuallai leh Sen lai aa omte zong record mah hi veve ahih ciangin ‘Zomi’ cih kammal pen, i Zo tuallai, Paucinhaulai tawh ZBC ma kum 51 lai-in na om khin aa, Sen lai tawh zong ZBC ma kum 1091 lai pekin om khin zo ahi hi. Dr James Suan Za Dong (May 2020)