Zawhngeu ngawng ah long awksak ni ~ Zam Sian Sum

Zawhngeu ngawng ah long awksak ni ~ Zam Sian Sum

Zawhngeu te’n zusa nene mawk ahih manin zusate zong thuak zo nawnlo in kipawlkhop ding hong ngaihsun uh hi. Tua ciangin akua maciat kizasak in meeting khawmpi neihding pulaak uh hi. Tua khawmpi ah zusa ahih thei zahzah kah ahih manun tampi pha uh hi. Innzusa, gamlak zusa, ciikpi leh zulei te nangawn thu kikum dingin pai neinai uh hi. Ahi zongin tua kikhopna ah zusa apil, ahai, ahau azawng, athudik agilo, etc. cih bangdan in akibanglo tampi kihel uh ahih man un thuzong hoihtak kikum theilo in amau tumtek in pau sapsap geuh uh hi.

Tua ciangin khat hong dingto in, “Guai aw hibang nianua tawh vai kihawm theilo ahih manin apil asiam pawlkhat makai dingin iteel kul ding hi” acih leh avekvua thukim pah bilbel uh hi. Tua ciangin makai vaihawm ding hong kiseh pah ziahziah uh a honpikhat mah hong teelkhia thei uh hi. Tua makai lakah hun-uk ding khat kiseh in kikupna hong kipan ta uh hi.

Hun-uk zusa zong hong dingto a, “Ei teng lakpan gennop pulaaknop vewvew anei i omleh hun themkhat pia ni” acihleh honkhat dingto pah a zawhngeu tungah alumkim lohna te uh suutsuk deudeu pah uh hi. Pawlkhat bangin zawhngeu in hong thatpah lo-in ideeksi hongdawn phot in tua khitteh isih masiah hong mawlpihpih photse pen na salua ing ci uh hi.

Tualeh adangte zong hong ding ngeingai in amau thuakna leh atuahkhak thute uh hong pulaak latlat ciang un meeting kah zusa khempeuh kisatsuah gawp uh hi. Thangpai lua uh ahih manun phuu la ding aci tawh, miksi bang kaneu zenzen hang saipi zong kikta keng aci tawh, tha leh tha kisisak ding aci tawh diang ngeingai in pawlkhat bang amai vua tutphah khawng sat dapdap liang uh hi. Tua ciangin hun-uk pa hong dingto in, “Guai aw thangah thei mahmah hang. Tu a bangding mah hi. Ahi zongin tunah bang sem masading cih kikum phot ni,” acih ciangin damdam in hong daikik uh hi.

Tua ciangin lehdo ding hihang, thatding hihang, haltum ding hihang ci-in ngaihsut piakna hong nei ziahziah uh hi. Ahi zongin makai pawlkhat te in amau dinmun leh gaalvante angaihsut uh ciangin tua ngahsut piakna te pen hoihsa napi un piangthei sa nailo uh hi. Pawlkhat te hehpah uh hi. Tua laitak athu muzaw deuh khat hong dingto in, “Guai aw, tua that ding haltum ding nacih te uhpen tulai ei dinmun tawh hithei pak nailo banah tua dan paizia pen anunung pen a zatding hipan hi.

Amasa in ei leh ei ih kidal phot kul ding hi. Ei leh ei ih kidal nading in tua zawhngeu lah thazawh nailo ihihteh asi ngam pawlkhat kipia khia in zawhngeu ngawng ah long awksak leng ahoih keiding hiam. Tua hileh zawhngeu paipai na ah ging langlang ding ahih manin zawhngeu hong muh ma-in ivek in kihem thei pah ding hihang,” acihleh avetvua hi sapah lian uh hi.

Tua khit ciangin avekpi un, “Zawhngeu long awksak ding” cih thukimna hong neita uh hi. Tua leh makai khat hong dingto in, “Zawhngeu long awksak dingin kua kipia khia ngamding ihiam?” ci-in adawt ciangin kuamah apau aham om peuhmah lo aimitdeh bangin dai dipdep gai uh hi.

Tualai tak zawhngeu cidamlo zusa zong aman zo nawnlo akang liangliang apai khat tua zusate kikhopna gei vanawk kha sese hi. Tua leh zusate zong kiphawng gawp kithehthang gawp in akhepi masuan ciatvuah taikek gawp uh hi. Tua bangin akithehthang gawpna hang un kuamah ki en kikhual zo nawnlo in ki palkha gawp kituanciil khagawp uh ahih man un atai zo nawnlo pawlkhat cianlai uh hi.

Tua acianlai sunh tengzong aki et ciang un apil athahat zawdeuh teng leh denlam a si ngam ing ci a tutphah khawng asat dapdap tepawl mukha nawnlo uh hi. Makai pawlkhat zong kimu zo nawnlo hi. Tua aom lai sunhteng in zong ithukimna kheel kik ding ihiam, ahih keileh bangcih mawkding ihiam ci-in nasiatak in hong kikum leuleu uh a, atawpna ah kheel dahni in puahpha ni ci-in hi bangin khensatna la-uh hi, “Zawhngeu in zusate hong neekneek mawkpen kiheh mahmah hi. Tua ahih manin zawhngeu ngawng ah long awksak ding hoih kisa hi” cihciang tawh thukhupna nei in amau munciat ah kikhen kik uh hi.

Theihding: Hih atung a tangthu pen ciamnuih kawm kipuahkawm cih ngimna tawh akiphuak tawm hi. Ataktak banga sanding leh ngaihsut ding hilo hi. Zam Sian Suum – Zomi Daily