Zavom Update ~ Pu Thangboi

Zavom Update ~ Pu Thangboi

Tulaitak Zavom (poppy) apalte kilala ta hi. Tawi 1 ciang in Ks. 3,500,000/ bang khawng uh ahih man in aciingte tuuk atun laitak ahi hi. Gamlapi ah vazuak zong kullo in aphual mahmah ah kitanh ziahziah lel hi.

Kipatna

Zogam ah Zavom akiciin phadiakna mun pen Tonzang gam ahi hi. Ne Win te’ BSPP hunlai pek in zavom ciin kipan khin hi. Ahizong in tua hunlai in lauhuai lai ahih man in aciing tam nailo hi

Tam Tektek

Meitei singnuaimi te’n Tonzang gam abelh uh sawt mahmah ta hi. 2003 kum a kipan kawl galkapte tawh kitheih siamna (MoU) bawl uh hi. Tua a kipan hong pung uh hi. Amau apun zah khat mah in zavom ciinna zong hong khang mahmah hi.

Zavom pan Zakang Ah

Meitei singnuaimite leh Kawl galkapte’ ki uituina hong khang tektek in Zavom pan in Zakang ah ki khangto ta hi. Meiteite pen Sen kumpi dong tawh kizom uh ahih man in aban uh sau gawp hi. Wa te’ kiang’ pan in zavom, zakang, WY bawldan pilna tampi ngah uh hi. Sente’n India gamgi dalna khat a akhawi uh ahi hi

Tulaitak Dinmun

Naypyitaw ah kawl galkap te’n kumpi tutna hong lakkik vua kipan buaina hong kipanto litlit in suuk tektek hi. Tonzang Gam nangawn ah palik te’ thuneihna om nawnlo ahih man in tukum pen zavom ciing tading in kumhoih mahmah khat hong suak hi. Palikte tax (siah) piakha nawnlo uh ahih man un nuamsa mahmah lel uh hi.

Tulaitak Zavom ciinna lam ah saikel (bike) atul a sim in om a Tonzang khuapisung sang in mi tamzaw khading hi. Saikel koihman (parking fee) khat ciang in Ks. 5,000/ la uh a aphual ah antang tuibuk leh datsi zuak pah uh ahih man in sumbawlna hoih mahmah khat suak hi. India sum zong ki limzat mahmah a voksa seh khat Rs. 600 manh hi.

Mipi’ Siatna

Zuhang man sang in zakang man niamzaw ahih man in zakang zang mi tam mahmah hi. Suakta tak in kilei, kizuak, kizangh thei lel hi. Khangno kipawlna te’n kham ding in kipan sun leh zong minam vai kisuah lianlian mawk ahih man in laklawh mahmah hi.

More: A gammang dektak Zomi te ~ Khup Lian Thang

Zovom lei ah nasep kuan leng nitha tungzaw ahih man in nasep dang ki ut nawn phalo hi. Kawlpi leh Tedim Gam pan in zong mi alomlom in hong kuan hi. Khua pawlkhat bang ah pastor tading atuam in aciinsak ngiat tawh Zavom sehsuah pia tawh bang tawh omta hi. Ih gam tu a dan abat leh Zovom in nakpi in hong siasak beh lai ding hi. Phawk khak pak teng hi ei, Mung Laan Thang (Tonzang, Zogam)