Innkuan khatsungpan zatui zatvaitawh unau 7 tak kiman

Innkuan khatsungpan zatui zatvaitawh unau 7 tak kiman

Malaysia, Perlis State sung aom Kangar khuasung ah unau numei 3 tak guihtheih khamtheih zatui Drug zanguh ahih manin kiman hi. Tuazawh kha 3 khitciangin asanggam te pasal vive 4 tak zatui zatvai mahbang ki matbeh leuleu uh cih Berita Harian pan kiza hi.

Tua anunung akiman unau pasalte pen kum 17 panin kum 30 kikal hi uh a, National Anti-Drugs Agency (Nada) te’n abeisa Monday nitaklam in amatkhiat uh ahihi.

Hihte unau in Drug zang uhhi ci’n thusim kipuak om ahih manin, nitaklam 11pm hunpawl in amau lametloh laitakding in aki buluhkhia ahihi ci’n Perlis Nada director Azizah Ahmad in genkhia hi.

Tuaciang in innsung aom unau pasal 4 te Drug azang takpi uhhiam ci’n Drug Test kibawl a, Methamphetamine zatui azatlam uh ki mukhia hi.

Abeisa October khasung inzong hih innsung mahah Drug vaitawh ki buluh in, unau numei 3 te Methamphetamine zatui zang uh cih kimukhia ahih manin, akimankhin uh ahihi.

Hih Drug zatvai tawh akiman unau 7 te ii anu pen kum 60 aphakhin khat hi a, atate Drug zatvai vive tawh akimat ngekngek ciangin lungkham mahmah, khakham veimahmah hi.

Hih unau te banah National Anti-Drugs Agency te’n Kuala Perlis, Batu Pahat, Utan Aji, Kampung Binjal, Behor Mali, Permatang Kersikadang cih khuasungteng panin Drug azang mi 12 zong mankhia uhhi. Tua akimante pen kum 17 panin kum 50 gualpawl vive ahi uhhi.

More: Myanmar gampan in vankham agilsung ah apua pasal khat kiman

Hihbangin guihtheih khamtheih azangte matkhiattheih nadingin Malaysia Border Security Agency (Aksem) teleh National Anti-Drugs Agency (Nada) te kipawlkhawm in, ni 2 sung Raid akibawl ahihi ci’n Perlis Nada director Azizah Ahmad in genkhia hi. Sawltak #zomidaily