Zasan ~ Hau Za Cin

Zasan ~ Hau Za Cin

Thak seisai napi lim kisa mahmah hi. A lut leh a pusuah ciang zasan ahihna lak tawntung hi. Sun khat zankhat thu in a hihna kheklo hi. Ann nekkhat pakan khat tawh a hihna zuaklo hi. Tui buak in sathau tawh kikang taleh zasan mah hilai veve hi. A pianpih hihna mah a tawpdong kengsuak hi. Thankik bangin a lut lam thak, a pusuah ciang dau’ cih bang hilo hi.

A min mahmah zong lamdang hi. Pawlkhat in thaksik ci, pawlkhat in malta ci; kala te’n mircha ci, mikang ten chilli ci, a dang min zong omlai inteh. Thaklua kisa lei bang tawnsak zalzal thei ahih manin ‘hot and spicy’ ciin ahihna kigen a, nungak lawphuai deuhte zong laigelhte in tua mah na ci thei uh hi.

Meh ah khah leng mehtui limsak in, nek kawmin i lei so sak a, i cilphul in i kamlim hi. I kham ding nangawn hong khamlo sak thei a, i duhloh nangawn hong duhsak thei hi. Nene phot leng alo in ki omtheilo a, a om ciang ong lungdamsak hi. A ne ngeilote adingin lah thaklua leuleu in annek ding nawngkaisak in i kam so sak hi. A lut ngeilohna theilua ahih manin zingsang hong phong baih mahmah a, a om ngeilohna room sungah sawt om nuamlo in khuavakma in pusuak nuam in hong kiko gamgam thei hi.

Amah bek pusuak ding maizum ahih manin a kim a kianga teng tawh tonkhawm dingin zawn hi. A pusuak uh ciang lungdamlua in paikhia ngeungeu cih omlo a, phurrr… ciin lenkhat suah uh hi. Tamnek pian leng a pusuak masa ding kituh in a lengkhia masa ding kituh thei laizang uh a, “lawhpi dawh leng malkhat zong tulo” kici hi. Tua zahta in kimeltheih neisak uh a, a theih ngeilohna uh pan lah nawh pusuak nuam uh hi.

America pan hong kipan hi kici hi. Tua ahih leh ei kiang hong tun pen American missionary te hong tunzawh hikha thei hi. Missionary masate amau tenna khua peuh ah mehteh mehgah ciing den uh ci ahih teh tua lai a hong puak uh hikha ding hi. Missionary masate hong puak ahih kei leh zong amau maia hong pai masa gamkekte hong puak hikha ding hi. Tua ahih kei leh zong tuate ma-a sumbawl, tembaw tawh a zinte hong puak, hong zuak hikha ding hi. European mi lak ah Christopher Columbus in America a tun ciang a mu masa pen hilai kici hi. America ah tua hun in kinene ta hihtuak hi.

A hoihna zong tampi om kici hi. A sungah om chemicals namte pen capsaicinoids kici a, tua sungah 8-methyl-N-vanillyl-6-nonenamide pen a thaksak pen hi. North-East India pan Sap Malta/Naga Jolokia/Raja Mircha akici pen leitungah a thak pen hi a, a thakna pen 1,000,000 SHU ahi hi, Guiness World Record. A thakna pen in thagui nasep hatsak kici hi. Nek khit phet in khuak ah a thakna hilhpah a, manlangsak mahmah hi. Filipines, Korea, Japan gamte ah zasan teh, a gah hilo a teh (leaves) pen mehtui in kihuan hi kici hi. Ne ngei nai keng.

Cidamna ding in luna, cithak, thabei cih bangte in ne leh hoih ci a, tam nek luat leng lah gilpi in lel ahih manin gilpi meima sak thei hi. Khuak ihmusaklo (alert) ahih manin khualzin ciang tawmtawm nek sialo hi. Vitamins A, B, leh C ban ah electrolytes Magnesium, potassium leh Iron hong pia hi. Iron tam ahih manin sisan siangthosak lai hi. Si-ha…

Mihing in lim i sak mahmah hang ganhing in duh mello a, vasa hunna, lungno hunna cih bangin kizangthei hi. Mehteh mehgah tungah zasan vui theh leng lungno in a teh ne nuamlo kici hi.

A ne photte lah zongsang, a ne ngeilo te lah ‘thaksa lua’ zel. A limna a thei photte’n annek sim meh nuam, a thei nailo leh a duhlote’n lah ngillah se lo. Ne leng lah sialo, ne kei lenglah sia tuanlo. A lamdang meh, zasan meh bel himawk ei. Sing leh zasan gawi meh leng lim, a gei ah aksa Zohuan khat kilui tuah leh lim diak, Tonsim lam pai lamto kheng khin lian, nitak annek hun pawl hilai leh a limdan kigenzo nawnlo. Hau Za Cin (Phuitong Liim)