Zasakna: Zogam Huhna

Zasakna: Zogam Huhna

Singapore a om Zomi u leh nau:

Guah tam luat man in a piang haksatna a tuamtuam hang in cimawh dong tuak in a om Kawlgam leh Zogam ah i mipih te a ding in huhna kisam mahmah hi. Gal khat pan in ei hih pih theih pawl khat om hi. Tua te in thungetsakna leh huhna khak ding a hihi.

Zomi Innkuan (Singapore) pan in Global Zomi Alliance tawn in a beisa 1 Aug 2015 in Ks. 2000000 ki piapah hi. Mimal tung pan a pia nuam tampi om a hih man in ki to lai a tu lian in S$ 7940 ki ngah khin hi. Ki dong lai in S$ 10000 ngah ding in ki hanciam hi. Hong pia khia mimal kim, lawm leh gual tung pan hong kaih khop sak te leh sum hong kaih khop sak Lai Cing Lam Lun (Suangzang) tung ah lungdam hi.

Tua mah bang in Singapore pan in dong tuak te tawh ankuang umna bang khat in deih bawl in ki hanciam in Singapore Myanmar Relief Committee te leh lawm leh gual te panpihna tawh moh leh nek theih tuamtuam S$ 250 man (a taktak in S$ 1000 bang a man ding in ki tuat) kikhak in tu in Kawlgam na tung khin a a sawt lo in zong Tedim dong sum la lo in hong ki puaksak ding a hih man in i lungdam khol hi. Tedim cidam in a na tun theih leh Zomi Youth Association – Tedim hong hawm khiat sak ding hi. Hong vaihawm Nu Cing Suan Lian leh a lawm te tung ah lungdam hang.

I inntek pawlpi Foochow Methodist Church in zong hong lung himawh pih in itna tawh hong tung ding 7 Aug 2015 (holiday tawh kituak) ni in pawlpi mi hong vei leh hong lainat pih te tung pan in puan silh nikten leh nek leh dawn hong kaih khop sak ding uh hi. Tua mun ah ei ki inntek sak in a pai thei khempeuh va pai in lengla va do ding i hihi. 10:00 Am pan in nitak 4:00 Pm sung bang hi ding hi. A kisap leh 8-10 Aug sung zong kisang ding hi. Tua pan i ngah van te a namnam in khen in hoih tak tuam in mai kal sung in van lam a hi zong, tui lam a hi zong khak zawh ding ki hanciam ding hi.

Sum leh pai tawh a kihel nuam peuh in Nu Cing Lian Don (ZIS sum kempi) tung ah bank tawh zong ki transfer thei hi.
POSB account number: 247-41295-6
HP: 93259514 (transfer ciang na zasak hamtang un)

Hih bang hun sung ah ki hel, a phual a om a gim a tawl khempeuh a hi zong, muntuam gamtuam pan in thungetna leh neihsa tawh a huh te khempeuh tung ah ZIS in pahtawina i pia hi. I sep khak, i piak khak bangbang guaksuak lo ding a khat leh nih in na noptuam pih den ding hi. Leitung bup Zomi te tawh zong ma a pang khawm i hihi.

No te tang in,

Pa Khup Khawm Mung
Thuvanpi