ZAM Thupuak :: 29 November 2015

Roundtable : “Challenges and Opportunities for Protecting Refugees in an Urban Environment in Malaysia”

November 26 ni zingsang nai 9am pan nitak 6:15 ciang UNHCR vaihawmna tawh Park Royal Hotel ah Malaysia a om gambeel mite hamsatna leh hamphatna te thusunna ki nei thei hi. Hih thusunkhopna sungah Japan, Thailand, New Zealand leh Malaysia pan UNHCR ulianpi te kihel uh hi. Malaysia gamsung uliante leh NGO’s tuamtuam panin mimal gawm vekpi 182 kihel thei uh hi.

Hih thusunkhopna ah Malaysia sang naupang bup tangin Zomi Education Center (ZEC) panin Zomi hong telkhia uh ahih manin angtang huai mahmah hi. Thusunna ah Malaysia gamsung a om gambel sang naupangte dinmun, phutkhak hamsatna teng leh ngah khak hamphatna teng ki sungkhia thei hi.

Resettlement Outreach tawh Pastorte leh makaite numei te kimuh khopna
November 24 leh 27 ni-in Resettlement Uliante leh Pastorte leh leh kipawlna numei makaite kimuh khopna ki nei thei hi. Hih kimuh khopna sungah anuai a teng laidal in pia uh hi.

17 August 2010 ma UNHCR card ngahte (Chin, Kachin, Mon, Karen, Shan, Arakanese leh Kayah) sung pan gamthumna leng thei nailo honkhat om lai uh a, tua te gamthumna a lunggulh lai takpi mah uh hiam cih thu UNHCR in limtak in a kan khit uh ciangin gamthumna a lunggulh lai te’n tukum 2015 December 31 ni ma limlim in UNHCR zumpi ah pulaak hen cih khentatna bawl uh hi. 2007 pan 17 August 2010 kikaal a UNHCR Card ngahte pen gamthumna leng thei ding vive ahi uh hi. Gamthumna a lunggulh lai te’n UNHCR ah na pulaak uh leh US kumpi in USA na tun theihna ding un ong panpih ding uh a, 31/12/2015 khen khit cianga pulaak panpan te ahih leh na tangthu uh limtak hong kisitsak dinga, gamthumna ngah huai maw ngah huailo cih pen ngaihsun phasan pan ding uh hi.

Email pan gen nuamte adingin <[email protected]> ah lai kikhak thei hi.
Na kipulaak ni un Interview ni ding atuam in hong pia ding uh hi. (Interview pah ding cihna hilo hi.)

Gamthumna lunggulhna a pulaak theite:

• 1. 17 August 2010 ma a UNHCR Card ngahte bek.
• 2. Zi or Pasal neiten UNHCR card na ngah ni un na gen uleh bek lutpih thei lai. Tua hunlai a Zi or Pasal nei nai lo, tudong mah nungak/tangval ahilai te leng thei lai ding hi.
• 3. UNHCR card ngah ni a innkuanpihte min na File sungah na hel leh zong kingah lai hi.
• 4. 17th October 2015 khit UN a na innkuan sazian sung a omlo te na lutph a leh P2 tawh lem nawnlo hong suak hi.
• 5. Onhold a hong kikoih lai leh zong hong pai vet dah in. Na File pen ki aap khin ahilehzong pai kul nawn lo hi.

Telkhialhna khatpeuh tawh reject tuahtheihna dotnate (ahih kei leh) Mangngilh kik theihloh dotna, dawnnate

ð “Na gam ah kumpi in hong simmawhna a om hiam?” cih dotna dankhat pen, a cilin zaisalua ka hih manin dongpha kikkik pah hi’ng. Katheih tak ciangin, etpak theih zawkdeuh, ih porter puakna, ih tangtha kuanna cihte gending ahih gige lam phawkpan hing. Tua pen, dotna zailua savat in, a om pipi “Omkei!” khawng va ci leng, simmawh ana thuaklo khat kisuak pah lel hi. Cihnopna ah, officer in, porter na pua ngei hiam, tangtha na kuan ngei hiam, cihdanin hong dong peuhmah lo hi. Hong ki simmawh zia, ih thuakzia khat leh khat aki batloh mah bangin, officer te in zong hong theihpih nailo mah hizaw aa, hong dotna dan uh pen akhial hilo hi.

Lungdamkho Ni Thupi takin kibawl

28 November 2015 ni-in ZAM Hall ah nasiatak in Zomi Thanksgiving Day kibawl hi. Khua maikaite, Pawlpi siate, Zolia & Zotaang te, Zomi Idol te leh Zomi tampi tak a khual a tual panin hong kihel thei uh hi. Zomi Global Idol (GZI) Sia Mungpi zong hong kihel in la hongsa thei hi. Adiak in Malaysia gam sung a Zomi te Pasian hong kepna, ZAM kum khat sung hong kalsuan pihna leh ZCD in gualzawhna hong ngahna Pasian tungah lungdamkohna kinei hipi pen hi. Hun man ciangin a lim mahmah Daanpauh (Briyani) tawh kham takin mipi an kivaak zihziah hi.