99% 73% Zawnna Go Lumni

99% 73% Zawnna Go Lumni

Thupatna:
(I Tim 5:8 ) Mi khat in ama mite, ahi takpi gen leeng ama innkuanpihte, a kep kei leh, thu-upna nial a, a um lo mite sangin a gilo zaw hi.

Kawlgam sungah State & Division 14 aomna sungah Chin State azawngpen 73% hi ci-in, 7Day News ah hong suah khia hi. UNDP leh Kumpite kipawl in Research abawlna uh ahi hi. Ahi lopi hih bangin suaksak lo ding uh ahih manin, lungdam huai kasa hi, zum huai tawh akibat hangin i tawkheng theina leh hong kitheih pihna ahih manin, hehna leh maizumna in i lak leh zawng semsem ding hang a, i zumna leh i hehna met bawl thei leng zawnna ki golum zo ding cihna ahi hi. Na khat peuhpeuh ahoih lam-in la leng ahoih i ngah ding a, asia lamin la leng asia mah i ngah ding hi.

1.I PU I PATE GAM EI GAM I NUSIAT MAN:

2011 kum-in Chin Future ci-in Panda Hotel ah workshop khat om-in, tua munah thugen ten agenna ah Chin mibuppi leitungah 1100000 omin, Chin State ah ateng lai 350000 bek teng lai hi ci hi. Township te ah khuanote ateng aom nawnlohna khua tam mahmah ta hi. Tua ahih manin, 73% zawnna pen Chin vekpi zawnna hilo-in ateng laite zawnna hi i ci thei hi. Kuakua zawnna ahi zongin, i minbel hoih lo mahmah hi, i gam i lei i nusiat hang ahi hi. I gam i leiah ciah kik in, puah ding tu mahmah in kipan pah ni.

2.PA SIAN MIN DAI SAK I SUAK HI:

A nungta Pasian a bia 99% aomna Chin State zawngpen cih i minthanna hoih lo khat ahih manin, Pasian min dai sak asuak hi hang. Pasian thupha ngah ing i ci thei ding hiam? i cih leh zong ei leh ei a kici hi bek ding hang a, kawlte’n bel hong ci lo ding uh hi, bang hang hiam? cih leh zawng pen ci-in hong ki tangko khinta hi.

3.I KIPAWL KHOP THEIHLOHNA HANG:

Pasian khatbek abiakhawmte, minam khat, gam khat, khua khat, hi na pi hangin, kipum khat theilo tua pen i zawnna ahang bulpi khat ahi hi.

“En un, sanggam bangin mite pumkhat suakin a tutkhawp ciangun, bangzahin hoih in nuam ahi hiam? Late 133: Pasian mai ah hoihlo a etlawmlo bek tham loin, thuum lote’n hoih, etlawm hongsa hetlo ding hi. Sum zon nate ah semkhawm thei leng i khamkhop ding leh i khantoh khopna ding hong vaihawm sak thei Pasian nei-in, bia-in, um-in, muang a, a nungtate hi lo i hi hiam? Bang dingin zawng i hi hiam? Puakhawm leng zang a, nekhawm leng lim hi.

4.PASIAN SANGIN GAMDANG MITE TUNG LAMET ZAWK MAN:

Hih pen i khantohna hong khaktan gige khat a hihna i tel siam ding thupi mahmah ding hi.
Zeisu in, Ke’n aman takpi kong cih-in ah, kei hang ahi zongin, Lungdamna thu hang ahi zongin, a inn, a sanggampa, a sanggamnu, anu a pa, alo a nusia leh, tu lai takin a zah zakhat innte, sanggampate, sanggamnute, nute, pate, tate, lote, bawlsiatna tawh ngah a, nung ciangin hong piang ding hunah nuntak tawntungna ngah lo ding kuamah a om kei hi. Marka 10:29-30

Hih Pasian kammal i um, i zuih a, i nuntakpih nak leh zawnna ki golum zo taktak ding hi. Gamdang mite huhna hehpihna i lamet a, i nget leh amau hong piak zahzah bek kingah ding a, bang tan vei hong pia ding cih gen theih omlo a, azah zakhat amau ngah kik ding uh ahih mannin, amau khantoh semsem nang i vaihawm sak sangin, ei khantoh nangin, azawngpen i gawhlup zawh nangin, i neih zahzah pia-in sem-in, zui takpi leng hau takpi-in thupha sang takpi ding hi hang.

I lametna Pasian kiangbek ah koih in, thupha i san theih nangin i thupha sak leng, mimal zawnna bei ding hi. Muh theih thupha i san nop takpi leh muh theihloh Pasian maiah i thu phasak takpi peuh leng thupha kisang ding a, azawngpen pan ahau pen ah i tungzo ding hi.

5.NGIMNA I NEIHKHOLH LOH MAN:

Mi kangte’n vailian khat i gelkholhna(estimate) man leng nasepna i 50% aman hi ci uh hi. I khua i gam Pasian thupha hong piak theih na dingin, kalmasa ah gelkholhna estimate neih tek ding kisam hi.

Pasian aw thupha hong pia in cih pong tawh thupha kingah theilo a, huh theih lian dingin abaih sa-in i lungsim leh gelkholhna kician neih ding ahi hi. Pasian in Eden huan abawl khit ciangin, Adam bawl pan hi. Adam abawl khitteh Eve bawl pan hi. Paunak 29:18.

Hih tawh kizui-in Community Development Education Centre C.D.E.C tentan kah ding thupi hi, tua hi leh estimate bawl dan ding pilna, kingah a, i khua leh i gam khantohna ding ahi hi.

THUKHUPNA:

I GAM I LEITANG PAN THUPHA LAMETNA NEI-NI:

Ei gam ei leitang en puah kei leng, en pi muh kei leng, ei ut kei leng, kuan hong puah ding hiam?

I leitang tungah SINGNO Niangteh, Coffee, Leenggah, Telhawng, Thawhbat, Zawngtah, Nailung, hoih mahmah hi acre khat ah teng20 bang kisam bek hi. Gamhoih pente ahi hi. GANHING Sial, Bawng, Kel, hoih mahmah hi.

Hih atung ate asem takpite tu zawh kum 10 teh zawng nawnlo ding hi. Mi gam milei ah, hau-in na nop sak hang, natate natute amanthan nang thu vaihawmhawm na hi khading hiam? Ngaihsut huai mahmah ding hi.

Rev. Paul Sawm Lian Pau