ZAM Thupuak
ZAM :: Zomi Association of Malaysia
November 21 ni-in UNHCR-CDU makaihna tawh UNHCR Conference hall ah kipawlna makai te khasim kimuhkhopna leh letmat thuhna kinei kik thei hi. Hih hun sungah UNHCR-CDU panin Brittocia Franklin (Assistant Community Service Officer) in hong makaih in kipawlna makai tengin khutlam in kiciamna kinei hi. Kiciamnate anuai a bang ahi hi.
Gambel/galtaai khempeuh leh UNHCR in abuaipih mi khempeuh zahtaakna tawh deidan omlo in ka panpih ding hi.
Keima mimal nuntaakna tawh leh ka nasepna tawh UNHCR min le vaang kemin ka lamsang den ding hi.
Mipi in UNHCR a muanna a khan semsem theihna dingin zum sung nasepna ah hita leh keima mimal thu ah buaina bangmah ka piangsak kei ding hi.
Mikim in kilem takin na a sepkhop theihna dingin keilam pan ka naseppihte zahtaakna leh telsiamna neih ka sawm dinga, mi tawh nasem khawm thei khat suah ka sawm ding hi.
Nasepna hong lawhcin theihna dingin nasem mimalkim in lungmuanna cidamna leh lungnopna a neih uh kisam masa ahihna thu tel in tuate ka khanto ding hi.
UNHCR ah nasem ka hihman in ka theih thu khempeuh leh ka zat vante kei mawhpuakna a hihzia telin hoih tak leh picing takin ka kemcing ding hi.
Gambel/galtaai te leh UNHCR in abuaipih mi khempeuh tungah bawlsiatna leh ameet dawhna cihte a om lohna dingin khaktan in kado ding hi.
Kumpi thukham palsatna, a kilawmlo haitatna leh UNHCR belmang a zuut thei tatsiatna tawh kipelh ka sawm tawntung ding hi.
Kampau gamtatna tawh ahizongin mihing pumpi leh mihing lungsim bawlsiatna nam limlim leh nasepna munah deihsaktuam nei a nasepna, kilauphawnna cihte limlim tawh kipelh ka sawm ding hi.
United States Ngeina le Dan Thusinna Khutzat Laibu : ZOMI
Khen Thumna (azom)
Vanlengtual pan dinkhiatna
Khualzinkhiat nading vanleng tualah IOM zum nasemte in honghuh ding uh hi. Tua zum nasemte in vanleng letmat leh adang zumlai thupite nang hongpia ding uh hi. Tua lai thupite pen IOM ciaptehna lim a tuang saphuklai-ip sungah om ding hi. Tua ip in thupi in America gam luttheihna dinga, a kisam lai tampi om hi. Lai-ip honkhak loh ding ahi hi. Ip sung a laite zong khemna pan kidalna ding a ciaptehna kibawl a hi hi. Na khualzin sung tawntung tua lai-ip mun khempeuhah keng in. Tua ip vanleng tung ahi zongin, vanleng tual khat leh khat kikal ah ahi zongin na tungah kem tawntung in.
Na ap ding ip gol sungah koihkei in. Tua ip a kilangin na khaina tungtawn in na khualzin sung tawntung IOM zum nasemte in nang kua cih hong khentel theisak ding hi. IOM ip mangsak kha kei in. Tua iplo tawh America gam na lut thei kei ding hi. Na zinkhiat nading vanleng tualah vanleng a lenkhiatma nai tawm vei sung ngak kha ding ci-in lamenkhol in. Tua hun sungin hehpihna tawh na innkuanpihte tawh omkhawm in. Nu le Pa na hih leh na naupangte vanleng tual sung taisuk taito a kimawl cihte a omlohna dingin hoihtak kem in.
Vanleng letmat
Galtai mi khat in vanleng tung kahna letmat khat tek ngah dinga tua letmat tungah vanleng letmat leh tut na ding mun cih bangin theih dinga kilawm thupite kihel ding hi. Vanleng tung nakah ciangin vanleng tual a semte in vanleng tung kahna letmat tum khat kem ding uha tumkhat nang hong pia kik ding uh hi. Tua vanleng tung kahna letmat pen na tungah kem den in. Na van mang kha zenzen adang buaina hong om khak zenzen leh tua in nang hong huh ding hi.
Vanleng tawh khualzinna
Mi a tamzaw a dingin khat veivei vanleng tawh khualzin pen a diakdiak in a khat veina ahih leh lau thei uh hi. Ahizong vanleng tawh khualzinna in a lung muanhuai mahmah khualzinna hi cih theih ding ahi hi. Vanleng tawh nai tampi sung khualzinna hangin tawldam huai mahmah hi.
Khualzin van-ip
Kilogram 23 a gik na van-ip pen na zinkhiatna vanleng tualah ap ding cih phawk in. (America na tun masiah tua van-ip na mu nawn kei ding hi). Ahi zongin kilogram 5 a gik na ipneu (khutkhai-ip) a hihleh nang tawh na pua khawm ding hi. Vanleng tungah na tutna ding mun na muh khitteh tua khut khai-ip na lutung a van koihna ding a kibawl mun leh na mai a tutphah nuai-ah koih ding ahi hi.
Tutphah kawnggak
Na tutna tung natun ciang kiat khak ding kidalna kawnggak tawh nakawng gak in. Vanleng na tuan sung khempeuh kawnggak gakna in nang adingin a hoih pen ahi hi. Tutphah kingapna in zaalsak, tangsak cih bangin nunglam mailamah kikhin thei hi. Tutna tung akhut ngakna-ah a khin nading aneu khat om hi. Vanleng tung nakah leh nakum ciang tutphah kingapna a tangin koihkik ding hi.
Vanleng Tanu/tapate
Vanleng tungah vanleng tanu/tapa tampi om hi. Amau nasep in khualzin mite huh ding ahi hi. Tui, nautawdap, vanleng vanzat tawh kisai huhna nget ding kisuan ngaihsut lo ding hi. Tutna khut ngakna tungah mek ding aneu khat om a tua mek in vanleng tanu/tapate kisam thei hi.
Nektheih
Leitungbup khualzinna ah vanleng tung an le tui man piak kullo hi. An tawh kisai in a ki ciangtan a om cih phawk in. Tua an hong kipiak hun a nek ding ahi hi. Annek hun ma in na gil akial khak zenzen leh nek theih dingin khut khai ip sungah nek theih pawl khat adiakdiak in naupangte a dingin pua in. Gam sung khualzinna vanleng(America gam sung khualzinna vanleng) ah an a mawkna in hong kipia lo hi cih zong theih ding ahi hi.
A tui tuamtuamte
Pumpi sung tui dat bei khak loh na ding dalna in vanleng tuan sungin a tui te dawn huai hi. Dawn ding tui vanleng tanu/tapate in hong hawm zelzel ding hi. (Annek hun leh annek hun kikal ah). Ahi zongin tawmbek hong kihawm ding hi.
Zu
Leitungbup khualzinna vanleng tungah dawn theih a tui tawh kisai in zu zong kihawm thei a man piak kullo hi. Vanleng tung a zu dawn pen zu dawn ngeina tawh kibang lo in kikham baih zaw hi. Zu in pumpi sung a tui dat bei sak hi. Hih thu te hangin galtai mite in khualzinna ah zu a kihel tui peuh mah dawn loh ding ahi hi.
Khut le khe gamtatna
Vanleng tung a nop sam hang tutna kinai thei mahmah hi. Tha a zang (giklo) theih nadingin galtaite tutna pan dingkhia kizia in, vanleng sungah kileh kawikawi ding cihte vanleng tungah bawl zelzel ding ahi hi. Na tutna tungah zong kizia in khutte khete tangsak zelzelna tawh kizan thei hi.
Huih tha kilamdanna
Huihtha kilamdanna hang in vanleng tuangte khat veivei beng ngong dekdek tawh kibat hun om thei hi. Tuabang ong hih ciangin PK muam (or) suaklu muam, cil valh (or) nak vang khut me tawh hu in bil pan huih pusuaksak cih bang in hih le teh hong veng thei ding hi.
Tutna kituahna
Khualzin mite in vanleng tung a tutphah awngte ah a kituah nop leh kingah hi. Ahi zongin leilak pan Vanleng a len khitciang bekin kituah thei pan hi. Vanleng tanu/tapate phalna tawh kituah ding hoih pen hi.
Ciimphawnna
Vanleng a tam zaw diakdiak in leitung bup khual zin na vanlengte ah ciimphawnna pawl khat om hi. Ciimphawnna ding in daatsian lah na leh la ngaihna tawh cimphawn bawl thei uh hi. Hih a dingin bil ngaih na hongkipia a,tua vante tawh kisai in huhna na kisap leh hehpihna tawh vanleng tanu/tapa tungah huh na ngen in.
Ekbuk zat dan
Vanleng tungah ekbuk tampi om ding hi. vanleng tung ekbuk neu mahmah hi. Tua ekbuk khan sungah ekbuk khutsilna,satpiang,ekbuk a zat ding lai dalte om ding hi. Ekbuk kongkhak tungah mi om leh om lo lahna a neuno khat pan in ekbuk sungah mi om leh omlo hong lak ding hi. Tua pen a tamzaw in meel (colour) tawh kilak hi. Asan meel pen ekbuk sungah mi om cih na hi a aman dong ngak ding ahi hi. Ekbuk sung na lut ciang kongkhak khak kik in kalh in. (Atamzaw a taal a ki khak). Tua ciangin mei hong taang ding a ekbuk sung ah mi a om lam a pua lam a om te in thei thei ding uh hi. Ekbuk kong khak tawh a hon dan a khak dan na siam kei leh vanleng tanu/tapa te huh na kingen thei hi. Ekbuk tut phah tungah kahto in tu kei in la, tutphah tung a tut bangin hehpihna tawh ekbuk tutphah tungah tu in, Na man ciangin tui zanglo in ekbuk laidal bek zang in. Laidal nazat khit teh tui na honma in ekbuk sungah khiasuk pah in. Vanleng tungah ekbuk tuihon pen ngaih mahmah cih thei khol in. Khut nasil khitciang hehpihna tawh ekbuk a thanghuai loh na dingin na pusuah ma in hoih tak sittel in.
Nawi ne Naupangte
Nu leh pate in nek leh dawn leh khat vei zat nau tawdapte a kicing ding in puak huai hi. (Vanleng zinna ah ni nih bang sawt thei a hih manin khual zin hun sung a ki cingdingin puak dingcih theih kul hi. Nau tawdap laih theih na ding sabuai pen a ngeina ah vanleng ekbuk pan kingah thei hi. Huhna na kisap leh vanleng tanu/tapa te kiang ah huhna ngen in,Nau tawdap a nin te ninbung sungah paiden ding hi. Ekbuk sung ah khiacih bang zang vet kei in. Nau ante na lumsak kik nop leh vanleng tanu/tapa te tungah huhna kingen thei hi.
Naupangte
Vanleng tawh khualzin hun sunga naupang ta a dingin nu leh pate in nek theih moh puak huai hi. Vanleng len kik ding ngak laitakin na naupangte ihmu kei leh hoih pen hi. Vanleng tung bek ah ihmu sak in. Ahi zongin vanleng tungah uk in lam siau zelzel sak in.
Vanleng khamna/Lungapna
Vanleng tung i tuan ciangin vanleng kikham thei hi. Atamzaw in kham lo hi. A zenzenin vanleng khamin na luak a suakleh na tutna mai a tutphah a nunga lai-ipte kizang thei hi. Zopzop lai ding…
Tukal Palaai te buaipih diak teng
Pa Pau Suan Kham (Mualpi) te tapa ading JPN kumpi zum panin nausuak lai kilakpih in UN card zong hong ngah thei.
Tg. Thawng Kim (Tungzang) ah ki buaipih.
Dal Kop Mung (Sawbua), Sian Lian Hung (Sawbua), Khup San Muan (Sawbua) thong ah a ki buaipih laitak.
Kham Suan Lian, (Vanglai), Hang Khan Mang (Vanglai), Thang Lian Lal (Vanglai) 19 November ni-in Subang Balai Polis ah ki buaipih.
Niang Ho Nuam (Saizang), Thang Muan Khai (Ngalbual) 17 November ni-in GHKL ah ZWO min tawh vehna kinei.
Man Sial Mang (Lailo) leh Cing Sian Kim (Bapi), 19 November ni-in ACTS leh Ampang zatopi ah ki buaipih.
Thang Muan Khai (Tungtuang), 17 November ni-in Tzu Chi ah ki buaipih.
Theihding:
ZAM pan ki buaipih mipawl khat in hehpihna tawh Thupuak ah hong suaksak kei un hong ci ahih main ki suaksaklo hi.
Lenggeng Camp ah November 19 ni thong kiate kiveh thei
UNHCR-OPI phalna leh theihpihna tawh nung kha sungin Samenyih camp ah kihawh thei-in ki lawh cing mahmah hi. Tua mah bangin December 10 ni ciangin Zomi thongkia KLIA camp a omte kiveh kik ding ahih manin Lengging camp a meltheih thongkia anei te’n amin leh body numbat pia nailo te’n ZAM zumpi ah hong pia un.
UNHCR-EDU tawh a 3 veina kimuh khopna
November 21 ni mahin UNHCR-EDU nuai a om sangte siapi khempeuh leh EDU teamte a 3 veina kimuh khopna KLBC biakinn ah kinei hi.
UNHCR-EDU lampanin kum 18 nuaisiah sangkah thei ding khem peuh, nu leh pa ten hanthawn in sang kahsak kim ding hong gen uh hi. Kumthak ah kipawlna sang tuamtuam pana zawh khitciangMalaysia sung a University ah sangzop theih nang nakpi takin mapan na kinei cih hong gen uh hi.
Natel kei leh genpah in
RSC zumah Zomi ahilo namdang Zopau tawmtawm a thei kamphen te in Zomi interview te kamphen sak thei ahih manin tua dan natuak khak a leh na tellohna sianggen pah in. Kamphen nu/pa in kapau tel kei Tedim kamphen ngiat mi nong pia thei uh dia ci-in huhna ngen pah in. Nang ading hoih zaw ding hi.
Veng makaite thusinna pia
UNHCR-CDU makaihna tawh UN Conference hall ah veng makai teng kizopna (Communication) tawh kisai thusinna kinei a, ZAM panin veng makai pawl khat kihel thei uh hi. Hong tung ding nipi khuavak ni zong neilai ding uh hi. Hih thusinna sungah mipi theih dinga kilawm thute:
Kipawlna ah makaite bek hithei lo a, mipi in zong azuih uh kul hi.
Phone tawh ih kiho ciangin mel ki mulo a kiho ih hih manin ih awsuah kitel sak ni. Ih awsuah lungnop awsuah leh dah awsuah, ki thusim loh awsuah cih bang omthei lai hi.
Mi tawh maitang kimu a na kiho ding ciangin na maipuak leh na mit hahdan kidawm siam in. Kammal hoih, awnem leh siamna in khat leh khat kizopna picing in thupisak thei hi.
Mi thu kikup nawngkaisak buaisak selo ding. Thu kikup laitak ih kiim ah mi hong paupau uleh nawngkai thei hi.
Mi kiangah ahih kei leh Zumah lai na khak ciangin na min leh na vai kitel takin gen inla, thuumna awnem (hehpihna tawh) zangh in lungdamkohna tawh khup hamtang in.
Zomi Cup 2015 kihel ding khuate sazian kipiapia ta
Zomi Nam Ni pahtawina kumsim i neihden Zomi Cup kibawl hun ding hong tungto ding hi leuleu. 2010 in Team (8), 2011 in Khua (19), 2012 in Khua (26), 2013 in Khua (40) Team (41), 2014 Khua (43) in Zomi khangno sungah ki lawmtatna picing takin i neikhinzo hi.
Zomi Cup 2015 a (6) veina ading pen kum dang te sangin kipat baih zawk ding geelna kinei hi. Bang hang hiam cih leh 2015 Sen kum thak pen Zomi Nam Ni tawh kituak ahih manin tua ni ma in zawh siang teitei kul ahih manin akihel nuam khua kipawlna khempeuh in ZAM zumpi ah sazian nong piak na dingun kong zasak uh hi. Khua min tawh a lutnuam khua kipawlna khempeuh kisang ding a, sazian pen November 30 nitak nai 5pm ciang kisang ding hi. Tu ciangciang khua 30 val in piakhinta uh hi.
Lungdamkoh ni kibawl ding
GlobalZomi Alliance (GZA) makaipi Rev. Dr. S. Pau Khan En hong vaikhakna kizui-in Malaysia a om Zomi khempeuh in GZA ni leh November Nipi nunung pen mun tuam gam tuamtuam a om Zomi khempeuh in lungdam kohni a izat ahih mah bangin tuani pen “lungdamkohna leh thungetkhopna” November 29 ni mahin ZAM hall ah kibawl ding ahih manin Zomi akua mahpeuh nong kihelna dingun zahtakna lianpi tawh kongzawn uh hi.
Anei te’n hongla un
Than Khuah Tling (UNUHCR Ref. 791-13C12460) card leh Hong Leong Bank card kimu ahih manin zumah hongla in.
No Te na UN card kimu hi zumah hongla in.
ZAM Hall ki kawmthei
ZAM Hall pen hun khat (nai 4 sung) RM200 kila ding a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Drum Set 1, Wired Mic 1, Wireless Mic 2, Usher Counter leh adang tuamtuam.
ZAM ah Ngeina van kingah teng
ZAM zumpi ah ih ngeina Zopuan leh vante ki leithei hi. Aki ngahthei van te:Zopuan: a bantawng leh a bansau (pasal), Zoniik nam tuamtuam (numei), Puandum, Zodial, Zodial naikhau (silk), Puanlaisan, Tanghciin, Khephiau, Zokhi, Zolukhu, Zothungkuah etc…
Dotbehnop aom leh ~ Ngaih Hau 010-823 0571
Kimat kihenvai & Thongvai
Sia Tuangpu : 016 254 4093
Sia Thaa Mung : 016 646 5375
Sia Kimpu : 016 993 3759
ZAM Card tawi Zomi te ading nasep
Port Klang setzung ah nasem ding Zomi citak 10 kideih.
Klang seafood sai a sem ding Malay pau thei mi 2 kideih. Khasum RM900/. Omna leh anpia. Alunglutte kizopna ding: Mangpu 019 510 6413
Lungdam kohna
Thang Kim Khai in tukal Thupuak bawlna ding RM10 hongpia khia ahih manin ki lungdam mahmah hi.
Michael Mung in tukal Thupuak bawlna ding RM20 hongpia khia ahih manin ki lungdam mahmah hi.
Gamsung gampua leitung muntuamtuam pan ZAM nasepna te tha napiak nopleh lungdamtak in hongkisang ding hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...