ZAM Thupuak :: 21 Apr 19 (UN vai thutuamtuam)
June 13, 2018 in UNHCR zumpi pan in Chin State pan hong pai galtai te khempeuh pen December 31, 2019 ni ciang bek UNHCR in panpih na kinei lai ding hi cih thupulak na hong nei uh hi. Hih thu pulakna hong om ciangin ih om mun tek pan in ih sep theih dandan tek tawh mapangin kisem khawm ciat hi. Zum lam tawh kisai te in zong zum lam pan a hih theih tawp in kisem a, Pasian nasem te leh mipi in zong thungetna tawh nasia tak in mapangin kisem khawm ciat hi.
Hih bangin lungkihual in ih hih theihna mun ciat panin mapangin ih sep khopna te tungah “Note nih leh thum ki thutuak in thu nong nget uh leh kong dawn ding hi” a ci Pasian zong lungkim in, ih thungetna, ih thum ih tauna te hong dawng in 15 March 2019 ciang in Chin State pan hong pai galtai te vai hun hoih khat hong vaihawm sak kik na kimu thei hi.
Hamsat beidongin lametna bei in ih om laitak in kithutuak in mapang khawm a, thungen khawm in ih om mah bangin ih thum ih tauna te Pasian in hong dawngin ih vai te hong kihon kik ciangin zong lungdam kohna pawi kikham kik hi.
Hih lungdam kohna pawi pen ZOMI’ TANGMI THUGEN PAWL te makaih na tawh ZBCM biakinn ah 18 April 2019 (Thursday) ni sun 2:00PM-4:30PM sung kinei thei a, Malaysia sunga om pawlpi tuamtuam pan Pasian nasem siampi te, ZOMI’ TANGMI THUGEN PAWL te, ZAM, ACR, FRO leh DAI pan Community makai te leh Khangno te hong kihel thei hi.
Hih hunsungah ZOMI’ TANGMI THUGEN PAWL pan in Sm Ciin in thu kong hon na leh a gimna uh hong pulak a, ZAM lutangpi Sia Kap Za Khup leh ACR lutangpi Sia Hau Khat Mung@Mungkhat te in zong thungen na hong nei uhhi. Tua ban ah Pasian na sem siampi te in zong thungen na tom hong nei tek uh a, Full Gospel Worship Centre ah Senior Pastor a sem Rev. Cing San Neam in Pasian kammal tawh thapiakna hong nei hi.
Tua khit ciangin hong pai khempeuh khut kilen in lungdam koh na kinei khawm a, hun teng khempeuh a man ciangin danpuak (Briyani) leh a vot tawh hong vak in nuam kisa mahmah hi.
KIDAWM THEI LENG UNHCR te December 31, 2019 ciangin hong panpih nawnlo ding a cihna hong khel in tu-in kum 3 bang hong pia kik uh a, ih lungdam mahmah hi. Ahi zongin amau hong piakna uh tungtawn in ih zat dan ih siam ding kisam mahmah hi. Galtai dinmun a om ih hih leh galtai khat ih din mun tawh kituak in ih om ding kisam hi. Ih khut sung hong tungsa hamphatna te zang kha lo zek khaloin ih va ap kik khak ding kidawp huai mahmah hi.
Nang mahmah in na kam pan na pulak thu pen nang mahmah in palsatin na pulak thu tawh a kileh bulh in na gamtatna in nang bek tungah siatna hong tung hilo a, na mipih tampi tungah zong tua siatna pen a kibang in kithuak khawm ahihi.
Tua ahih manin galtai hi in a ih cih leh galtai khat din mun kho takin len in galtai hi kei ing ih kicih leh zong ih dinmun kho tak in ih letkip ding thupi mahmah hi.
Ut hun ciangin ei thugensa mah palsatin ih gam ih lei ciahin ih ut hunhun ciangin pai kik zel, ih ut ciang ih card renew in ih ut loh ciang nusia zel cih dinmun pen nang suahtakna ahih hangin tua in mi tampi tungah sukha, buaisak tuam mahmah cih ih phawk ding hong thupi mahmah hi.
Ei hong huh nuam hong panpih nuamte hong huhnop semsem leh hong panpih nop semsem na dingin ih sep theih ding leh ih kalsuan theih ding thupi a, ei hong pan pih nuamte a hong muh na ah a panpih huailo ih suak loh ding hong thupi mahmah ding hi.
Thu leh la khat peuh ah a ma hun zui in ih kalsuan ding zong kisam a, a hun ih lap ding leh a hun nailopi in ih ki pei ngawp loh ding zong thupi hi.
ZOMI TE THUNGET KHOP DING ZAKSAKNA 2019 kum sungin Malaysia leitang tungah om Zomi te kha 3 val deuh sungah luang 11 bang ih nuntakna bei a, ih dipngekna in zong hong khasiat huai mahmah hi. Tua ahih manin Zomi bup lungkihual in adiakdiak in Malaysia om Zomite ading ih biakinn ciat pan in thunget khop hun khat lak dingin ih kizasak nuam hi. Ei te kipum khat in ih thunget khopna ah Pasian in lungkim in na lamdang hong sem ding hi. Anuai a hun bangin kipum khat in thungen khawm dingin ih kizasak phapha hi.
- Ani : April 21, 2019 (Sunday)
- Amun : Zomite Biakinn Khempeuh ah
- Ahun : Eima kikhop hun sung ciatah (Easter Sunday ni ih pawlpi hunsung ciat ah hun limcii khat la ding.) (Note: Sabbath ni biakpiakna a neite a’dingin April 20 ni hiding)
Ngimna leh Thunget Dingte:
- 1. Zomite cidam khansau na ding (pilvang a i kikep siam nading)
- 2. Malaysia gamsungah Zomite i sihnotloh na ding,
- 3. Zomite Zumvai mabante ah mazan kim nading leh isepna ciatah lawh cin nading,
- 4. I maikaite panpihna leh amaute tawh pankhopna ah i kithutuah na ding! (A geelkhia-Zomi Genvai Tanute “ZSM-2019”)
ZAM ZUM AH HONG HAWH Zampi Khua mi Galilea pawlpi -Kawlpi Founder leh Senior Pastor a sem Rev. Thawng Do Thang pen 15 April 2019 (Monday) ni-in Zomite a it avei na tawh kizui in ZAM zum ah hong hawhin zum vai tuamtuam kikup khopna, tha piakna leh thupha piakna hong nei ahihmanin kilungdam mahmah hi. Amah pen Malaysia ah tawmvei sung hong zin pak ahi hi. Topa’n anuntakna hong zang sem sem tahen.
UNHCR ZUM PAN PHONE HONG KISAP CIANG UNHCR zum pan in phone hong kisap ciangin hong sapna mun (RSD,DSU/RST/RSC/OPE, DHS..etc) dong hamtang inla, bangvai tawh hong sam cih zong dot ding mangngilh kei in. Phone hong kiho ciangin zong hoih takin kiging kawmsa in dawng kik inla, thudot hong neih leh zong na zum vai tawh akipelh loh ding hoih tak ngaihsun kawmsa-in dawngkik hamtangin. Kam khat I dawn khialh na tawh supna tampi piang thei hi. A diakdiak in hong sapna Department I theih kei leh zum I pai ciangin nawn kai na tampi om zelzel hi.
KIDAWM CIAT NI Malaysia om Zomipih a kua ma ciat I omna gam huih nun zia tawh kizui in kidawm ciatni cih hong zasak phapha ung. Kimat kihen hong tam mahmah in, a munmun ah oparasi hong lut pahpah ahih manin vaksuk vaktoh, hawhsuk hawhtohna ah kidawm ni. I om na veng kim veng pam ah zong kidawmsa in om ciat ni. Kiim leh pam a om mite in hong muh khialh loh dingin I om dan I khawl dan te kikem siam kawmsa in om ciat ni. Vai thupi mahmah lobuang zong vakvak kei zaw leng hoih zaw ding hi. Grab tawh na vak leh zong na tuan ding motor hawlte hoih tak telsiam lecin nang a ding hoih pen ding hi. A diadiak in mitam na munte ah tam vak kei leng ei ading hoih pen zaw ding hi. A zenzen in kimat kihen na khat natuak leh ZAM zum ah hong zasak pah in. Contact – Sia Tuangpu 016 254 4093 – ZAM hotline 016 293 9027
ZATO LAM TAWH KISAI :Zato lam tawh kisaiin vai khat peuh na neih leh Contact :Sia Mungpi 018 3122 957
DAHPIHNA PULAKNA Voklaak khuami Pa Pau Do Nang leh Nu Niang Suan Nuam te tapa Tg. Vungh Sian Thang (Kum30) in a lup na pan ihmu suak in hong nusia hi. ZSM hong lut kha lo ahih hangin Palik vai teng ZAM pan a kivan khin a, innkuanpih te lunggulhna om bangin aluanghawm Kawlgam ah 20 April 2019 ni-in kipuak ding hi. Sanggampa Vungh Sian Thang hong nusiatna hangin adah akap khempeuh Topa Khasiangtho in alamdangin hehnepna hong piaksak tahen. ZAM/ZSM pan in zong dahpihna ih pulak khia hi.
DAHPIHNA PULAKNA Suangsang Khuami, Thangum beh Pa Gin Dai Thang leh Nu Zen Ngaih Dim te tanu Nu Cing Lam Lian pen Nilai veng ann sai khatah a pasal tawh nasem in om laitak a lungam in tuk ahih manin aman langin Zato kipuak a, ahi zongin a nuntakna kilap zo nawnlo hi. Amah pen ZSM zong na lut man nailo hi se mah leh innkuan pih te hong zasakna tawh kizui in ZAM zum pan in kidelh a, avai te kivan sak hi. Sanggam nu luanghawm pen 20 April 2019 ni-in Kuala Selangor han ah kivui ding hi. Sanggam nu hong nusiatna hangin a dah akap khempeuh Topa Khasiangtho in hong hehnem tahen. ZAM/ZSM pan in zong dahpih na ih pulak khia hi.
2019 ZSM LAIBU TE HONG AP KIK TA UN 2019 ZSM laibu te I hawm khiat zawh kha 4 bang hong cingta ahih manin March kha bei ah ih laibu khempeuh Zum ah ih puak kikna dingin ih ki zasak hi. Hong ap kik khin zong tampi mah ki om a, hong ap man nailo zong zong ki om lai ahih manin in a manlangin nong ap kik nang uh zong hong zasak ung. Mapang khawm in ih sep khopna te hang in tuni ciang a kalsuan zo ih hihi. A lut man nailo ih om leh zong aman langin ZSM ih lut tangtang ding zong kong zawn phapha uh hi. Ei adingin a lut ih hi masa kei aa, a kisam te adingin panpihna a pia ih hi zaw hi.
NA CONTACT NUMBER TE UH HONG UPDATE UN ZAM card tawi member te in ZAM zum ah na phone no. te uh update hong bawl hamtang un. Phone No. kilaih tam ahih manin ih phone No. te update ih bawl ham tang ding kisam hi. A zenzen in UNHCR lam pan vai khat om leh na contact No. aman lopi tawh bangmah hong kisam thei lo ding ahih manin update ih bawlna ding hong zasak ung.
WELCOME TO ZAM Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang in thapiakna leh idea tuamtuam piakna nong neih na dingun kong zawn phapha uhhi.
ZAM ZUM AH KILEI THEI ZAM zumpi ah I ngeina van tuamtuam ahi Zopuan Design tuamtuam, Zoniik Design tuamtuam, Puanten, Puandum, Zodial(Silk), Puanlai san, Zokhi, Tanghciin, Khephiau, Zolukhu, Zothungkuah, Zodial cihte akipan naupang puan tuamtuam te deih zahzah kilei thei hi. Tua bek loin khui tuamtuam leh anuai a laibu te zong kilei thei hi.
NA UN VAI NAKAN NUAM HIAM? Na UN vai lunghimawh in kannop dotnop khat peuhpeuh nanei hiam? UN Department tuamtuam ah laigelhsak nop na neih leh ZAM Member te ading mangenlo in ZAM zum pan lai kigelh sak theiden hi.
ZAM member I cihpen ZAM Card bawl ngei cihbek hi loin UN card a neih khit hang in a renew/hingsak den te pen member hiden cihna hi. Refugee na kicih sam hang UN Card naneih naikei leh UN ten kami hongci tuanlo hi. Tua a hih manin Zomi nahih leh ZAM card bawl in.
TUKAL SUNG ZATO LAM BUAIPIH TE
- 1. Thang Sian Khup (Khampat) Sungai Buloh zato
- 2. Cing Lun Ciang (Dimzang) Serdang Zato ah kiveh
TUKAL SUNG THONG LAM BUAIPIH TENG
- 1. Pau Zam Thang (Anlangh) Bukit Jalil Camp ah kiveh
- 2. Sian Lun Mawi (Vaivet) Kajang thong ah kiveh
KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kiging sa in om den ding uh hi. Sia Tuang Pu : 016 254 4093
NASEP LAM TAWH KISAI : Zomi nasep neilote in nasep tuamtuam om hi. A lunglut leh dot nop aneite in Sia Khuppi— 016 3838 014, 011 3563 2059
LUNGDAM KOHNA 1. Hau Kim Khual RM50 Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi danin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hongpia tahen.
Comment piaknop aomleh...