Australia Immigration a thuneipenpa UNHCR ah hawh
February 26, 2015 ni-in Australia Immigration leh Border Protection tawh kisai a lianpenpa Mr. Peter Dutton in UNHCR omna Malaysia ah hawhna va nei hi.
UNHCR thuneipa Mr. Richard Towle in a genna ah “Australia gam pen UNHCR aa dingin huhna tampi hong piak banah vai tampi ah hong panpih mahmah gam khat ahihi.
2010 kum akipan galtaai mi 4,300 val amau gamah hong laksak khin uh ahihman in amau tungah lungdamna lian mahmah hi” ci hi. Mr. Peter Dutton in UNHCR ah a hawh sungin kum tampi a semkhin Staff teng tawh holimna aneih banah UNHCR nasepna mun teng va pha kawikawi hi.
Richard Towle genna tungtawn in galtaai mi 150,000 a omna lakah 93% pen Kawlgam pan hi in, a diak in Rohingya te sunga om numei naupangte in huhna leh kepbitna kisam phadiak uh hi ci hi. “Galtaaite hi lo, galtaaite akem Malaysia gam mahmah in zong haksatna tampi tak tuak hi. Tua bang hunte ah Australia gam in nong nungheisan lohna uh pen ko aa dingin thupi in vaihawmna khat peuhpeuh nuamtuam mahmah hi” ci in Mr. Richard Towle in gen tangtang hi. Source : www.unhcr.org.my
Malaysia a om Zomi te theihhuai thu pawlkhat
Malaysia khuapi sung a om, ka Zomi pihte aw theih sasa ahi zongin athei khinzong ki omding ahi zongin athei nailo tading aki genphapha hihang.
⦁ Khua sung navak ciangin zatep, niin, cil te mawkpaih mawksiat kei in. IC /Passport/ UN Card natawi zongin khuasung thukham nazuih kei leh hong ki liausak veve ding hi.
⦁ Khua sung vakna ah mi hingte paina ding a kahlei kibawl te tung pai hamtang zaw in. Mawtaw lam nakan khak leh agal khat pan naban pan hong kikai ding a leitung natawt loh manin dangka hong ki liausak ding hi.
⦁ Khua sung vaksuk vaktoh nate ah Taxi tawh napai nopna munte hoihtak lotngah sawm in. Leihsa (address) kiging tawntung in la Taxi na tuan ma-in license nei maw neilo sittel masa inla license omlo ahih leh Taxi dang zongpah in. Licence omlo te atamzaw mi gina hilo uhhi.
⦁ Khua sung ah vaksuk vaktoh nate ah deihloh pen in Palik/Rela ahi zong kimat khat natuah ciang in sum hongnget zahzah uh piakpah ding hilo hi. Thumthum phot inla Malay pau natheih kei leh zong ZAM pupi te ahi zong naihuai sanggamte tung huhna ngen in Palik pawlkhat ten RM3000/2500/2000/1500/1000/500/300/200 hong ngen masa hamtang ding uh a, na thumsiam a nagensiam leh RM3000 pan tuak suksuk kiam suksuk in RM200 ciang bangtawh kitan thei hi. ZAM ahi zongin kipawlna Card limlim aneite.
⦁ Pawl khat ten Palik te hong nget zahzah apiakha zong Zomi te sungah ki omkha ding hi. Nasep lemlo tadingin napha mahmah hi. Palik te tawh ih kituahkhak ciangin hong hopih nate uh zong zahtak takmahin hopih ding kisam hi. Pawl khat ten thusimlo zahtak bawllo uh ahih manin Palik te heh uh a dangka tampipi tawh kitan sakzong ki om hi.
⦁ Palik te tawh lampi ah nakituah ciangin lau laplap linglawnggawp sekei inla zahtak takin hongdot thute dong hiathiat inla avallua in pau sese khaken. Na phone sung khawngah numei leh pasal omkhop nate ahih theih leh koih peuhmah kha kei un dangkaa tampi hong liau sak ding uhhi. Tua bek thamlo thong zong kumtampi kikia thei hi.
⦁ Khua sung navak ciangin nameltheih ngeiloh pi khawngin hongsap leh enzong enkenla natup namun pai mengmeng zaw in. Tuadan munte ah napai khak leh thu hongdong ding uh a pau nasiam phat kei leh nangpen emsa nahi ta hi.
⦁ Khua sung hita leh vaksuk vaktoh nate ah napum tunga napuak vante hoihtak keemcip in. Thungkuah te zong namailam mahah kuah ngiat inla na nunglam nakuah ciangin navante a kimin na om nawnlo thei hi.
⦁ Khua sung navak ciang sum atawmpen RM100 pua hamtang in RM100 in nanuntakna hong honkhia zothei ding hi. Palik te tawh ih kituahteh huhna ih nget takciang sum pek (1) RM1 zong neikei lecin bang tawh hong huhding nang sum na neihlohpi hong ciding a nalawmte anaa takin samin ci-in hong sawl ding hi. RM100 nanei in na kem khaziau leteh vaisiang baih mahmah hi.
⦁ Inn ngak inn nupi te pasal nasep kuankal khawng theih ngeiloh nu mei pasal ahizong in,kong hong hon in,hongki cihleh honloh ding thupi hi.Atam zaw mi ginalo mamiah hizaw hi.
⦁ Omna peuhpeuh ah mi gam ahih mah bangin omdan tatdan siamkul mahmah hi. Ih veng ih paam te huat ding peuhmah in gamlum gamta khalo ding hihang. Atamzaw gamlumna pan ih veng te’n Palik tetung hongkhia in gilbeem atung zong ki om hi.
⦁ Lawm leh gual te van ahi zong mite vanzat ahi zongin guksak ding cikmah hunin ngaihsun kha ngei kei in. Guta, mibuan cihte hongki man kha leh thuak zawhna ding baihlo ding hi. Asilo bek in hong kikoih ding a Palik te hong ki ap pan ding hi.
⦁ Mailam ah zomtoto lai ni ei. Zomi te mi gam mi munah gamtat hoih kidem ding hihang. Zu khamsa khawng vaksuk vakto kei ni. Zu khamsa khawng nasep kuan nainai kei ni. Zomi hing ih ki cih leh atawntung in siangtho sitset zawh nading akua mapeuh in hanciam ding hihang.
Zomi te Pasian in thupha hong piaciat tahen!
Pau Lam Thang
Malaysia ah Zomi Nam Ni siim phei- III
Leitung mihingte in muhnop a sak uh nam nih om a innkong mai a naupang tualbual leh pak huan a pak hoih pak dimdem. Zomi leh Zogam in a ngak dimdem Zomi naupangte inEden Huan Thak i Zogam nuamla hong sak uh ciangin mipi in pakta lua in khut kibeng ziahziah hi. Lasa bek hilo in ZEC Kota Damansara sangnaupangte in khut leh khe vik in pumpi kihei pelpel in hong kituak diamdiam uh a, nakpi takin muhnop in lungsim hong lawng… Read more >>>
Malaysia Kumpin gamgi bitsak sawm
Malaysia gam sungah gamdang mi a guuklut tamluat na hang cih bang, vankham tawh sumbawl, kumpitheihpih loha Diesel, Motor, Antang, zuak theih van tuamtuam alut, apusuak tamlua ahih manin Malaysia kumpin kumkhat in RM7 billion bang suplawh uh hi.
Tulai tak in Malaysia Kumpi thunei te’n gamgi dalna bangci bawl ding, bangtan sangsak ding, sum bangzah bei ding? Akul a leh mei tawh a datlaih(electric) theite, koici vilding cihbang a geelgeel laitak uh hi a tukumOctoberin geelna(survey) abawlkhit uh teh Kumpi lam a thukhensatding te kiang puakding uh hi. Malay-Thai gamgi sauna Tai 415, Malaysia-Indonesia, Brunei, gamgi tai 1,000 gamgi khempeuh Tai 1665 bang sau hi. Source : The Star News
ZSM laibu lente tungah hopihna
2015 kum ZSM lutna laibu kem khua makai te leh Pawlpi tuamtuam panin makai, sia/ma te in March kha beima in ZSM lutna laibu te zum ah nong puak kim nangun kong thum uhhi. Tu aa nakep uh laibu hawmkhatna pen March kha ciang ding hi a, tua khit ah laibu a la nuam lai te leh member lutnuam te in athakin laibu nong lakkik nangun zahtak na lianpi tawh kong zasak uhhi. Banghang hiam cih leh na laibu let sung panin member hong lutsa khatin deihloh penin tuahsiatna hong tuak kha zenzen leh zum ah amin sazian kikhum nailo ding ahih manin vaisah mahmah ding hi. ZSM lut nailo ih pawlpi mite, ih khuapih te deihsakna tawh genpihin ih lutsak ding pawlpi makai sia/ma te leh khua makai hausa te tungah kongthum phapha uhhi. Zomi sungah damna omta hen.
Tukal Palaai te buaipih diak teng
⦁ Ngo Ngai Lun (Tungzang) 27 Feb in Ampang zato ah leh IAD ah ki buaipih.
⦁ Dim Khan Huai (Phaileng) 3 March in HUKM ah ki buaipih.
⦁ Khawm Niang leh Lun Vung te 4 March in Cheras Yulek a MCH ah ki buaipih.
⦁ Gin Dal Khai (Malsuangzang) Kajang thong panin UN in tannin UN Card hong ngah thei pah hi.
Thongpan hong suakta thei
March 9 ni-in Semenyih camp pan anuai ateng UN laidalpi tawh hong suakta thei uh hi.
1. Lal Dot Muan (Zozaang)
2. Lo Khan Kap (Pyidawtha)
3. Kap Do Langh (Lailo)
4. Thang Kap Khan Mang (Pyidawtha)
5. Lang Thawn Kim Khai (Dimzang)
6. Thang Cin Lian (Baapi)
7. Cin Ngaih Mang (Pyidawtha)
8. Thang Lun Pau (Singgial)
Pu Thein Sein Malaysia ah honghawh
March 12 ni-in Kawlgam President Thein Sein te nupa Malaysia gamah honghawh in ni nih sung taam uh aa tua hun sungin Malaysia Prime Minister Najib Razak tawh thu kikup khopna nei ci uh hi.
UN vai theihhuai thu pawl khat
⦁ Vai khat peuhpeuh tawh UN ah pai nading naneih leh 8am satma in tunsawm hamtang in.
⦁ Innkuan lutpih ding peuh mahin na nupa un nathu nala uh hoihtak kikum masa hamtang un.
⦁ Nang minlo, nang khualo, nang nu le pa minlo, nang tang thulo tawh UN ngah nahih leh April 1, 2015 ni ma in ki pulak sawm in.
⦁ UN thangthu hoihtak ciamteh in phone tawh hong kidot leh zong na gen theih dingin lotngah sawm in.
⦁ Na thangthu pen na len ni ciang bek kimang ding hilo a na tunna gammi na suah ni ciang zong hong ki dongkik ahih main hoihtak ciamteh in.
ZAM pan dahpihna
Cingpikot khuami Siapi Khen Khua Thang leh Sianu Cingh Lam Cing te tapa thumnaTg. Khup Suan Pum (Kum 23) ZSM-10383, Suante behKota Damansara pawlpimi, pen lungsim thanemluatna hangin utloh pen sihna tawh 7/3/2015 ni zanin Klang veng tawlngakna paakhuan sung panin hong nusiatna hangin Zomi te in ki khasiat pihin ih dah mahmah hi. Sanggampa luanghawm vai tawh kisai anunung pen hunbawl na 10.3.2015 ni in ZCF-Kota Damansara pawlpi ah akineih khitciangin ZSM makaihna tawh Sunggai Buloh hanmual ah kivui thei hi. Sanggampa hangin adah akap khempeuh tawh kibangin Zomi zumpi panin ih dah khawm hi. Topa’n hong hehnem in thahatna hong pia tahen.
Hehpihna tawh hong kanpih un
Thang Sawm Tung (Tauleng) ZAM-22109 Bentong (Pahang) pan a kimuh loh kha khat bang phata in amu leh athei na om khak uh leh hehpihna tawh ZAM zumpi or 011 2884 8134 ah hong zasak un.
Lungdamkohna
⦁ Sia Pau Lian Khai (Shawbuayeshin) RM50, Nu Hau Dim Cing (Tuimang) RM50, Kam Sian Muang (Mualnuam) RM200 te in atung a bangin tukal Thupuak bawl nang hong panpih ahih manin ki lungdam mahmah hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...