Itna bulphuh upna maw?

Itna bulphuh upna maw?

Itna a bulphuhte in 1 Cor. 13: 1,2,3na ah, “Mualte kin sak zawh nading upna ka neih hangin itna ka neih kei leh ka kimanna bangmah omlo hi” cih siksan uh hi. Hih lai munah Paul in kamtuam pau le vantung mite’ pau khawng thupi saka kinei-in itna a nei lote a mawkna ahihna a gen ahi hi. LST in itna thu a gen teh a thuneu hi lo hi. Itna pen sepna le sih ngamna ciang bek hi lo-in, nuntak ngamna le lungsim puakzia maanna pen itna taktak hi zaw hi ci-in na gen zaw hi.

Mawhna thaman sihna, sih loh phamawh sih ngamna pen a singtho itna hi lo a, sihna tawh kipeng thei hi napi-in mawhnei nang le kei ahong it man a mawhnei lo pa’ sih ngamna pen itna genbang lo hi a, a siangtho itna taktak ahi hi. Lai Siangtho in itna thu a genteh thukham sawm tawh na kikim sak linlian hi. Matthew 22: 37na ah Jesuh in, “Na Topa Pasian na lungsim khempeuh, na nuntakna khempeuh, le na pilna khempeuh tawh na it ding hi, cihna ahi hi. Hih pen a masapen, a lianpen thukham ahi hi.

A nihna pen…nangma pumpi na it bangin na vengte na it in cihna ahi hi. Hih thukham nihte tung panin thukham dang khempeuh le kamsangte’ thuhilhna khempeuh ahong mengkhia ahi hi,” ci-in a dawng hi. Tua ahih manin itna pen thukham sawm cihna hi. Love=the Law.

Ci le sa ki-itna hi lo
Eimau bangkua, eimau innkuan, eimau behteng, eimau sunghta putu teng le eimau bawng teng ki-itna in hih ih leitung a buaibuai sak ahí hi. Eimau teng ki-itna mah hi hong um lah sak… Lasiam Pauno in, leitung mite ki-itna in sum le pai bek hi a cih mah bangin, ci le sa ki-itna in hong bawlsia hong sukham hi. Tua ahih manin leitung mite kuamah in Pasian’ mai-ah midik a tang sak zo itna nei lo uh hi.

Kuamah in thukham sawm a zuih zawh loh mah bangin kuamah in zong itna genbaang lo nei zo lo uh hi. Ei le ei vangtung gam lut zawh nadingin Thukham kizui siang zo lo hi. Itna kineisiang zo lo hi. Ci le sa ki-itna tawh hi lo. Itna tawh gupna kimasuan zo nawn lo a, upna tawh gupna a kingah bek ahi hi. Tua upna in itna maan ong nei thei sak pan ding ahi hi. Itna bulphuh upna pen a piang thei ding hi lo a, upna bulphuh itna pen a piang tawntung ahi hi.

Evan. Suang Dal