ZAM Thupuak :: 14 December 2014

ZAM Thupuak
ZAM :: Zomi Association of Malaysia

Malaysia a om Refugee leh Asylum-seekers tengin ih omna gam i azuih thukhunte zahtaksak ding UNHCR in pulak khia

KUALA LUMPUR, Dec. 8 : “Rome khuapi ah na om leh Rome mite gamtat dan mahin na gamtat kul hi” cih paunaak om mah bangin UNHCR in zong ei Refugee leh Asylum-seekers teng in ih om pakna Malaysia gam in a zuih thukhunte zahtaksak dingin hong deihna pulak khia hi.

UNHCR panin milian khat ahi Yante Ismail in a genna ah “Malaysia gam sungah thukhun tawh ki pelhin siatna abawl Refugee leh Asylum-seekers te tungah Malaysia kumpi in thukhun omsa tawh ki zui-in khauh takin thu hongkhen ding hi. UNHCR leh Malaysia thuneite khut kilen a nasem khawm ahih mah bangin Refugee leh Asylum-seekers te lakah thukhun zuilo a gamtatsia te tungah a kilawm a kituak a kumpi hong gamtat theihna dingin UNHCR in huh theih zahin huh in panpih ding hi” ci hi. Tunai kaalnih sungin kithahna tuamtuam tawh mattuak kawlgam mi 15 kiman khin uh hi. Penang ah lawmta ki semnenna hangin khutkhial hi dinga upmawh mi pawlkhat kiman khin a, amau tengin UNHCR Card na tawi ciat uh hi. Malaysia thuneite lampan in mi matbeh lai ding maw matbeh nawnlo ding cih thu tawh kisaiin Yante Ismail in kuppihna nei nailo hi.

Tukum November kha bei ciang dong UNHCR sungah min khumsa ciaptehna angah mi 150,460 pha khin a, tua lakah Kawlgam panin mi 139,200 pha khin hi. Chin State panin mi 50,620 in ciaptehna ngah khin uh a, Rohinygas,070, Myanmar Muslims 12,160, Rakhines leh Arkansas leh adang teng kigawm 7,440 cing khin uh hi. Kawlgam sim loh gamdang panin Refugee leh Asylum-seekers kigawm pha zah pen 11,260 pha khin uh hi. Refugee leh Asylum-seekers teng khempeuh lakah pasal pen 70% hi a, 32,710 pen kum 18 nuaisiah vive te a hi uh hi. Source : BERNAMA National News Agency of Malaysia

Teacher’s Certificate Presentation and Appreciation Event-Kuala Lumpur, Malaysia

UNHCR-EDU makaihna tawh amau nuai a om sang 120 sung a khasum piak sangsia mi 200 valte (Teacher’s Certificate Presentation and Appreciation Event (Sangsiate letmat piakna leh pahtawina piakna) December 11, 2014 Thursday ni-in Pusat Komuniti Sentul Perdana ah nasiatakin kibawl in sang khempeuh pan ahih theizah kipai ngeingei in sunan lim mahmah tawh hongvak uh hi. ZEC sangte panin anuai a bangin pahtawina tuam-tuam kingah hi.

1. Thawng Sian Kham (USA)
LIFETIME ACHIEVEMENT AWARD 2014

2. Hau Suan Khai
OUTSTANDING CONTRIBUTIONS
TO LEARNING CENTRES 2014

3. ZEC-Talalla pan Sia Gin Khan Tuang
(Top 3 OpenEMIS Reporting Award)

4. ZEC-Cheras pan Sianu Nuam Khan Huai
(Longest Teacher Award)

5. ZEC-Sungailong pan Sianu Nian Ngaih Lun (Best Fire Plan Award)

6. Sangsia khempeuh letmat piakna cih bangin kingah hi. Hih banga Zomi min a tawisang ZEC sangte a thahat semsem na dingin thapia ciat ni.

United States Ngeina le Dan Thusinna Khutzat Laibu : ZOMI (Azom)
American gam tangthu atomkim a etna

American mi masate pen leilu American (North American) ateng mi namte hi-in, tuhunteh US mi za-ah-khat bang bek phata uhhi.

1442 kum in Christopher Columbus kici Italy minam, na a kankhiapa pen Spain gam panin pai khia in America gam ong mukhia hi.

1620 kum in ‘Mayflower’ tembaw zui mi 102 te pen Europe minam a tung masa te hi-in 102 pan 50 pen England gam a Anglican pawlpite bawlsiatna pan a, biakna lam suahtakna zong a a taikhia/zinkhia (Pilgrims) te ahi uhhi.

1775-1781: England te in British kumpi ukna, thu neihna omlo pi-in siah a lakna hangin America gamkekte in England deihlo in lehdo in zo hi. 1781 kum teh British te’n America pen ko a hi a cihna panin daita uhhi.

1776: Thomas Jefferson in gamkekte’ khutnuai mite aitangin suahtakna tangkona lai hong at khia hi. Hih a thupi mahmah laibu in tuni a Americante kipawlkhopna ding lamlak/makaih a suak hi. Hih tangkona lai sungah mikhempeuh pen a kikim/kibang a ong ki piaksak/bawl hiin mi khempeuh in nuntak, suahtakna leh lungnopna a kibang zang thei kim ding hi. July 4, 1776 pen Suahtak Ni ci-in tangko in kumsim suahtak pawi a kham den uhhi.

1787: US gam i thukhunpi, thuletpi kipsakna nei-in, tua in US kumpite ading a thupaipi, a gahpi ong hi-in, US kumpi leh gamkhen tuam-tuam te, America gammi khat leh khat ki-uk, kizopna ding lam hong sialsak suak hi.

1789-1797: George Washington pen US te kumpi masa pen hi. Amah pen a tang pi ‘I gam i pa’ (“Father of our Country”) kici hi. Ama lim pen dollar pek khat leh piasawmnih leh nga tang tung kimu thei hi.

1776-1898: Hih hun sung tengin US te’n a gamgi uh keekin, gamdang mi zong a awn (tulza 10) a sim hong lut uhhi. 1848 teh US te’n gamkhen/neu tuamtuamte pemta uhhi. 1867 kum in Alaska gam pen Russia te tungpan lei-in, 1898 kumin Hawaii behlap uhhi. Hih gamte tungpan lei-in, 1959 ciangin gamkhen 49 leh 50 na hong suak hi.

1861-1865: Hih hunsung teng America gamah gamsung gal nasia takin piang hi. Mi ukna nuai-a om gam 13 pan kipankhia-in mivomte pan Africa pan sila dingin lei uhhi. Sila neihna pen gam leitaw lamte in a zat hangin lei lulam gamte in deihlo uhhi. Hih thu leh thu dang tuamtuam hangin leitawlamte’n a mau gam a tuam a neih ding utin kikhenkhiat ding hanciam uhhi. Hih thu hangin gamsung mi kidona gal hong piang hi. A lang nih un tampi suplawh, beilawh, sihlawh khit ciangin leilulamte in gal hong zo uhhi. Hih tualgal pian laitak hunsungin kumpi a sem pen Abraham Lincoln hi-in, American kumpi lakpan in mikim theih pen suak hi. Amah pen silate a suakta sakpa ci-in kithei hi. Ama lim pen dollar pek nga dal leh pekkhat tang tungah kimu thei hi.

1917-1918: US te’n kitanau leh kipumkhatna tawh leitung galpi khatna lai-in Germany do uhhi.

1919: American numeite in me piak theihna a khuan ngah hi. Leitung galpi masa sungin galkap a pai pasalte munah pawlkhop nate ah numeite panmun hong neih semsemna tawh ki zui-in 1919 kum teh numeite in zong me piaktheihna khuan ngah ta-in azuih ding uh thukhun hong suak ta hi.

1941-1945: Leitung galpi 2 na lai-in US te in England, France (Piantit) leh Soviet Union (Russia) tawh kipawl in Nazi Germany, Japan le Italy te do in zo uhhi.

1945-1980: Leitung galpi nih khit ciangin American leh Soviet Union (Russia) leitung ah, thahat pen gam nih ong suak uhhi. Hih gam nih te i gamvai ki lamdanna pen (Democracy) mipi a tamzawte deih na, thu neih na tawh ki ukna leh (Communism) mimal neih tuam omlo a, na khempeuh kumpi khut nuai-ah om a tua pan a zeekkhiat ding uh thupi neih na, hih thunih te i huzapna hanggam khat leh gam khat ki demna hong khanglian mahmah hi. Hih hunsungteng pen a simtham a ki dona, kimuhdahna hun hong suak hi.

1961-1975: US te in vietnam gal hongdo in, hih gal dona do uhhi. Hih Vietnam gal hangin Asia ni suahna leh leitaw lam kikal (Southeast Asia) gam te ahi (Vietnam mi, Lao mi le Cambodia mite) tampitak galtai in US ah pem (lal) uhhi.

1964: US tualgal ven takciang mi sila khawina pen hong beita hi mah leh Africa pan a mivom te pen tuambawl, neumuh in US mitak in ngaihsun zolo uhhi.1960 kiimin Martin Luther King, Jr. makai in Africa mivom te mikang te mah tawh a kikim a etna leh aki bangbang nasep theihna dingin gal hongdo in 1964 kum in gualzawhna agah hongat uhhi. Tuapen Africa mivom te leh minam neu te zong a kibang a etna leh a kibang a sep theihna dingthu khunpi hong kipsak uhhi.

1969: American Rocket tuansiam Neil Armstrong leh Buzz Aldrin khapi tung tungmasa, lam siau masa pen te suak uhhi.

1980: Soviet Union kicip in, gam tampi in khenthang in, tua in a simtham a kigal neihna, muh dahna beisak hi.

2001: September 11, 2001 ni-in ahang omlo pi a mi suam/that te in sumbawl te vanleng zawhthawh thu tawh New York khuapi leitung sumbawl na phualpi (World Trade Center) leh Washington DC a galvan phualpite kapsak uhhi.

2008: November kha in Barack Obama pen US kumpi dingin kiteel hi. Amah pen US te tangthu ah mivom kumpi sem masa penpa ci-in kiciamteh hi. Zopzop lai ding…

ZEC Siateng thusinna kinei

ZEC Teachers Workshop: UNHCR vaihawmsakna tawh December 9 ni zingsang nai 10 pan nitak nai 4 dong ZAM Hall ah “ZEC Teachers ” tentan siapi Patrick Helson in hong neihpih a, ZEC sang 5 pan sia/sianu 13 kipha in tha kingah mahmah hi.

ZAM zumpi pan dahpihna

Kapteel khuami Pu Cin Khan Do Songput beh leh Pi Ning Khan Dim te’ tanu tapa te sung pan a guknaPa Thang Sian Mung(Kum 49) @ Ta Mung/12/2014 ni Sunggai Buloh zatopipanin a it a zi leh tate nusia in tawlngakna van innpi ah hong ciahsan ta hi. Pa Ta Mung pen tuma kum (4) laipek pan ZAM palai te’nbuaipih den khat hi a, kum (3) sung tawntung damlo te ki kepna innpi Batu arang Shelter ah kikem ahihi. Damlo koihna thunei te thukhun ahih leh damlo kepna innpi (Shelter) pan a si te luanghawm pen amau ngeina bangin mei tawh hal ding a hihi. Ahi zongin ZSM palai te hanciam pihna tawh hamsapi in aluang ki ngen a, mei tawh haallo in, Zomi te ngeina bangin 09/12/2014 ni in Sunggai Buloh hanmual ah lungkim huaitak in kivui thei hi. Pa Ta Mung tungtang ah adah akap te khempeuh tawh kibangin Zomi zumpi panin ih dah khawm hi. Topa’ hehnep na athakin hong tungta hen.

Gawngmual khua mi,Zenii pianna tunnu Pi Goih Khaw Niang (Kum 66)11/12/2014 ni 11:30am hun in University Hospital, Petaling Jaya, Kuala Lumpurpan in Leitung nuntakna nusia in Van inn ah hong ciahsan ta a, Ni 13/12/2014 ni in MBF Sunway Biak inn ah Pi Goihgah ii luanghawm tawh a nunung pen hun bawl khittehSubang Lutherans Garden ah lungkim huaitak in kivui thei hi. Pi Goihgah hangin adah akap te khempeuh tawh kibang in Zomi zumpi paninih dah khawm hi. Topa’ hehnepna a thak in hong tungkim ciat tahen.

ZEC-Talalla & Maharajalela sangluthun ding

ZEC Talalla leh Maharajalela sangah 2015 sangkah kum ading sangnaupang min sanna 22-23 December 2014 (Mon,Tue) ni nih sung ZAM Hall ah 10am pan 3pm dong kinei dinga, sang ki-ap ding peuhmah in UN card/kipawlna card pello keng hamtang ding hi. Boarder om ding numei 30 leh pasal 35 ciangbek kisang dinga kum 9 pan 15 kikal hi ding hi. Sangnaupang khat ciang Sang lutman (admission fee) RM30, Sangsap (school fee) RM40 leh boarder om dingte boarder fee RM85 hi ding hi. Sangvai dotnop om leh Ph: 011 1076 3234, 010 286 6189.

Tukal Palaai te buaipih diak teng

Suan Khan Mung (Laaitui) leh Thang Muan Lian(Laaitui) Petaling Klang palik zum panin pan Dec. 6 ni-in ki buaipih in hong suakta thei uhhi.

ZAM Card tawi Zomi te ading nasep

Klang seafood leh Mid Valley sai a sem ding Malay pau thei mi kideih. Khasum RM900/. Omna leh anpia. Mangpu 019 510 6413

Zomi Cup 2015 Group khenna

December 08 ni-in Zomi Cup 2015 kihel ding Team/Khua teng ZAM hall ah group khenna anuai a bangin kinei hi. Kimawl hun ding makaite tungah a list hong kipia ding hi.

December 21 ni zingsang 9am-10:30 sung Zomi Cup 2015 honpawi nasiatakin kibawl ding hi.

LUNGDAMKOHNA: UNHCR Lifetime Achievement Award 2014

UNHCR Uliante tungpan lai ka ngahloh zong sawtsimta aa, Malaysia ah Zomi te aa ding hun tampi pia aa ka hanciam theih a om nailoh zong kum (2) valta ci le’ng kikhiallo hi. Ahi zongin, tuma kum sagih khawng pan hanciamnate mawksuak ngeilo aa, tua khaicite a beithei ding zong hinawnlo hi, cih pen November 13, 2014 ni-in UNHCR Uliante tungpan email khat ka ngah teh khatvei ka phawkthak leuleu hi.

“Ong lungdampih ungh. Malaysia na om sung aa Education vai na ma pan’nate leh gamthumna na paikhit teh zong nong veinate hangin UNHCR Lifetime Achievement Award nang tung ong pia ungh. Hihmunah na nasep sungin nasepsa teng, Pahtawina mualsuang tung na Panmunte tawh kidawksak nuam ungh. Na lungdamkohnop a omte video tomno tawh hong genkhia in la November 5, 2014 ma-in hong khak in. Hehpihna tawh, tulaitak aa Sang Sia sem laitakte zong Thapiakna kammal hong gensak hamtang in.” cih laikhak ka muh lai-in ka diip hong sukha zo liang hi.

Lamdang kasak leh ka lungkim teutau khatna-in, leitungah pahtawina tuamtuam kipia omte lakpan mimal aa siamna leh theihna tawh akipiate hilo-in Zomi te beklo namdangte aa ding hanciamna, sepna khempeuh pahtawi taak hong sa uh ahih manin, ka angtang deuhdeuh hi.

A nihna-in, Malaysia ka omloh kum nih aval khit hangin zong nasepnasate a thupi leh a kisapna, a manphatna hong phawkpih beklo-in, panmun leh sepna teng zong hong phawkpih theilai uh ahih manin angtang ingh. Lai, kimawl, computer ka hilhkhak naupangte leh seppih tengin zong hong phawkpih lai ding cih ki ummawh tuam pah hi’ng.

A thumna-ah, ZEC kipatma leh kipat cillam khawngin zong Education lamah a mi zatzawk deuh uh leh a hanciam namdangte pawlkhat om veve na pi-in, pahtawina hong piak tak teh Zomi te nasepna tangzaizaw cih mu uh ahih manin Zomi khat hong piak uh pen lungkim huai thu ahihi.

Hihbang dan Pahtawina leuleu pen, mimal tungah kipia ahi zongin khat kia gualzawhna tawh kingah thei nam hilo hi.

UNHCR Uliante leh adeuhdeuhin Education Team te tung lungdam hi. Gammi hong panpih khempeuh tung lungdam mahmah hi. ZAM Palai leh ZEC Palai kasep khop sung, a kisam tawntung lungsim thapiakna leh mipihte aa ding hanciam toto zo ding aa sum le pai tawh hong panpih Sanggamte, thu hong ngetsak Nu le Pa tung lungdam ingh.

Adeuhdeuhin, Malaysia paina aa sumbei cihte aa kipan 2008 kum ZAM palai khempeuh ZAM zumsung pan thuneite-in hong mat lai-in, lungkham-lungzin zawkna ding cih a tamlo thong tawngnung ka om laitak, Kipawlna-in sum kineilo ei leh ei kitat kul ding cih sin kham ki behlap laitak, “Na kitatna ding sum na khak nung, nong cidam ding thupi hi.” cih kammal hong zasak leh sum ana khakthei ka sanggampa Pa Go Sawm Khup (Tulsa, USA) te innkuan tung, mipi mai-ah a khatveina lungdam ko ingh.

ZAM a pankhia makai masate, ZAM tha apia mipi akuamapeuh leh ZAM Palai seppih khempeuh tung lungdam ong ko ingh. Lungdam kohnop zia pen tam bilbel ahih manin hun ong la kikkik nuam ingh.

ZEC kipat cil pan aa Sang Siapite leh Sang Sia/Sianu akuamapeuh tung, no teng ii sepna leh ki piakkhiatna tawh, hih bangin Zomi te madawkzo ih hih lam kong tangko nuam phapha aa, na vekpi tung vuah, ih sepkhop khakna khempeuh lungsim takpi tawh lungdam ong ko ingh.

ZEC Sang khat peuhpeuh aa pilna asin Zomi naupangteng tung lungdam kong koh loh phamawh hi. Lai ka hilh khakte, kimawlna lam ka hilh khakte, computer ka hilhkhakte, no teng kong pattah theihna hangin Pahtawina a ngah ka hih lam ong theisak ingh. Zomi te makaihna mah cikawm-in ZEC Sangte-ah naupangte siamsinna a vaihawmsak Nu le Pa te thupi kong sa aa, ih pan- khop’na ka angtang mahmah hi.

Zomi mipihte aa ding lungsim siang tak tawh nasem khat, aki piakhia khatin tua tawh kituak Thupha siangtho ngahkik hamtang hen! A semthei ding aa om peuhmahin hong tha sial kha hetkei un.

Tg. Kham @ Khampi

Khasim palaaite thunget khopna

December 12 nitakin Evan Zir Lian Sanga in ZAM palaaite thunget khopna ah Pasian kammal tawh tha hongpia ahih manin tha kingah mahmah hi.
Lungdamkohna

Ngo Khai (Darkhai) khut keusakna (hand dryer) ZAM zumpi a zat ding hong piakhia ahih manin ki lungdam mahmah hi.

Moses Pum Pau (Sezaang) te innkuan in thong pan asuahtak theih uh lungdamkohna in RM150 hong piakhia ahih manin ki lungdam mahmah hi.

Rev. Joseph Lian (Myanmar Christian Fellowship) in tukal Thupuak ading RM50 hong piakhia ahih manin ki lungdam mahmah hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…