Zaipi leh saupi ngaihsutna tawh geelhuai ~ Pau Khat Suan

Zaipi leh saupi ngaihsutna tawh geelhuai ~ Pau Khat Suan

Zogam ah kuanglui ding leh Zogam taangmi MP ding duhthusaam i gen ciang, Zogam a tengngiatte bek mah in taangmi ong sem leh.. cih ngaihsutna pawlkhat kisung khia zelzel, kiza zelzel hi.

A hi mahmah leh a hoih mahmah ding tawh a kibatna ciang zong om veve hi.

Ahi zong in, tua ding bek a limit i thuah leh Zogam leh Zomite’ mailam saupi pen Zogam pualam a om Zomite tawh a kisaina omlo ding a, i Minam vai i cih a huang ong toi mahmah khadiam maw?… cih zong ngaihsut huai kha ding hi.

Galkap kumpi in ASSK mimal khat khaktan nopna tawh a kikhel theilo ding thukhun a khun dan in, mimal khat le nih pampaih nopna leh hun tomno khat ading geelna tawh minambup lungsim puakzia i suih khakloh ding thupi ding hi.

Khantoh lam a manawh hih leitung ah mi pil mi tei, a ma a phuzo leh vai tampi a saizo mi tampite munkhat khuakhat bek ah kibilhcip hetlo ahih lam phawkkawm sa in, koi koi ah i teng a i khuasa zong in i sisan kilaih theilo a, i nam kikhel theilo ahihman in, tom ngaihsut beihbaih, toi ngaihsut ciaucuau lua lo in, zaipi leh saupi ngaihsut kawm ding a lunggulh huai zaw khadiam ka ci sim giugiau hi.

Lee Kwan Yew in a gammi hilo bek thamlo, a nam kibatpih zong a hi beeklo Mangkangte leh Japante’ pilna zang in Singapore lamto a, buannawng lak pan vandawn ah khaito hi. A vek a ciing pah ding cihna ahih loh hang etteh huai tampi on kha ding hi.

I lunglut masak ding

Kitelna leh MP/ Hausa kuanglui vai, kua in kuanglui sawm?…. cihte i lunglut zah in….

“Bang hang a kuang luisawm, banghang a MP ut? Bang hang a hausa ut?… ” cih lampang lunglut masa zaw in, tua thu buaipih masa zaw lehang… Zomite i minam, i khua i tui mailam khuavak zaw khading a, i meh zolzaw in, i tu i tate mulmam zaw khading hiveh aw..

Kum 5bek liuliau sang kum 5+50 buaipih zaw lehang i ngaihsutna in zong kum 5 khualna ii azah 50, 100 ong huamto pah ding hi. Pau Khat Suan