YouTube etna alem mahmah NewPipe (Android)

Android Phone zangte ading YouTube etna alem mahmah NewPipe

YouTube pen ih theihsatek mahbangin Internet tungtawn in Video etna, Music ngaihna alem penpenkhat ahihi. Mobile Phone sungpan in YouTube ih etnop ciangin Internet Browser tungtawn in aki ettheih samhangin YouTube App mah zangleng nuamzaw hi. Ahi zongin YouTube pen namnih in kikhen cihtheih hi a, Free leh Premium ahihi.

Sumpiakloh YouTube Free ihzat ciangin ads tamlua mahmah a, Video leh Music te ihngaih laitak in hong nawngkaisak mahmah hi. Sumpiak YouTube Premium zangleng Internet omlohna ah etding Video ki Download thei, Ad-free hilai, Phone khaksa Background Play kizangthei hi. Ahi zongin tua YouTube Premium pen khakhat in US$11.99 ta piakkul zel hi.

Tua YouTube Premium tawh Feature akibang, amanlang zawlai App om a, tuapen NewPipe kici hi. NewPipe pen 2015 kum pekpan in aki bawlkhia hi a, Android Phone zangte adingin azatnop mahmah Media Player App khat ahihi. YouTube te ii Official App sanginzong lemzaw kicitek a, Privacy hong zahtaksak uhhi.

NewPipe version athakte ah YouTube bekthamlo, SoundCloud, MediaCCC, PeerTube, Bandcamp cihtezong kihong, kingai theihi. NewPipe pen Free and Open Source hi a, English bekthamlo kampau namtuamtuam tawh zattheih dingin kibawl, kiletkhia a, tulaitak nam 98 bangtawh zattheih ahihi. Tuaban ah GPL 3.0 License tawh kituak in akibawl hi a, GitHub panzong ki Download theileh Source Code te ki enthei hi.

NewPipe pen YouTube anei ahi Google Company te ii zatsak nopzia “Terms of Service” tawh kituak in akibawl hilo a, mipi phattuam nadingin akibawl ahih manin, Google Play Store ah kikoihlo hi. Ahi zongin NewPipe na zatnopleh amau website ahi https://newpipe.net pan .apk file tawh ki Download thei a, F-Droid azangte’n zong Repository sungpan in kiguangziau theihi. (F-Droid pen FOSS akici “Free and Open Source Software” Application ahihi).

Zandiak in NewPipe 0.23.1 athak ki Release a, Perfomance hoihzaw, Playback leh Seeking tezong lemzawtham hi. Background Playback banah Offline in ettheihding Video te ki Download thei in, Google Account neihsese lohhang inzong Channels te ki Subscribe theihi. Video leh Music te na ngaih ciangin Ads hongsuak daldalloh mahmahzong anop penpen Feature khat ahihi.

More: Twitter, Facebook, Instagram leh YouTube te gamtatzia tawh kisai President Trump in thupia

“YouTube Alternatives for Android” kici Google Company te ii YouTube App tektek zatkullo in YouTube ettheih nading akibawl App pawlkhat om a, tuate lakah hih NewPIpe pen tulaitak azatnoppen, alempen leh ahoihpen in kigen hi. NewPipe nazatnop a, hamsatna naneihleh Comment ah ki kuptheih hi. ZD Sawltak #zomidaily