Yangon – Mandalay lamzikpi tungah 2017 kumsung Accident 555 veipiang, mi 116 si

Yangon – Mandalay lamzikpi tungah 2017 kumsung Accident 555 veipiang, mi 116 si

2017 kumsung Yangon – Mandalay Highway lamzikpi tungah mawtaw tuahsiatna hangin misi akigawm mi 116 phahi ci’n Highway Traffic Police Force te’n pulakkhia uhhi. Mawtaw Accident bekbek akigawm in 555 vei piang a, tualak ah mi 116 te’n asihlawh uh ahihi.

Asi mi tampi banah aliamzong akigawm in mi 863 bang pha uhhi. Tualak ah tuahsiatna atamzaw pen Private mawtaw te hangin tuahsiatna apiang hi ci’n Traffic Police te’n ciamteh uhhi.

Abeisa 2016 kumsung in hih Yangon – Mandalay Highway lamzikpi tungah tuahsiatna bekbek akigawm in Accident 774 vei piang a, tualak ah mi 170 in sihlawh in, aliam pen mi 1304 bang pha uhhi. Tua 2016 kumtawh tehkakna in, 2017 kumsungpen tuahsiatna atawmzaw leh misi, aliam cihtezong atawmzawtham suakkik hi.

Highway Police Force ah asem laitak ahi Police Officer Soe Win in agenna ah hihbang in Highway tungah tuahsiatna apiangsak atamzaw pen mawtaw hatsak luatna “Speeding” hanghi ci’n genkhia hi.

Abeisa kum June 01 ni akipan Highway lamzikpi tungah atai Express Bus leh Private Car khempeuh mawtaw sungah kawnggak “Seat Belt” thuah hamtangding ci’n Traffic Police te’n tangkokhia uhhi. Tua thukhun tawh kizui in Passenger leh Driver khempeuh in Seat Belt thuahdet akul ahihi.

Hih Yangon – Mandalay Highway pen asauna 400 Mile bang hi a, nisim in hih lamzikpi atawnkha mawtaw pen 20,000 tabang phaden hi. Tualak ah nisim in Average Accident 7 veibang piangden hi ci’n Highway Traffic Police Force te’n genkhia hi.

Hih Yangon – Mandalay Highway lamzikpi pen Myanmar gamsung aom khuapi te ahi Yangon, Naypyidaw leh Mandalay cihte kikawmna in aki limzat mahmah ahihi. 2009 kum akipan hih Highway lamzikpi akizang hi a, Accident tuahsiatna leh sihna tamlua mahmah ahih manin, hih lamzikpi pen sihna lampi “Death Highway” ci’n min kiphuahsak lianghi.

More: Naypyidaw kisilbuk sungah Dentist khat daihlaih in si

Asian Development Bank (ADB) te’n hih Yangon – Mandalay Highway puahphat nadingin US$100 Million leitawi kongpiading uhhi ci’n honggen uhhi ci’n November khasung in Deputy Minister for Construction U Kyaw Lin in Reporter te tungah pulakkhia hi.

Tua Proposal pen Myanmar kumpi thunei te’n phalna apiakleh puahphat kipanding a, 2020 kumin 40 Miles puahphatding Pilot Project geelna om cih kiza hi. Sawltak #zomidaily