Laphuah siam Kapno (Zozaang) ~ Zomi Quavadis

Laphuah siam Kapno (Zozaang) ~ Zomi Quavadis

A minpi Kap Khan Suan hi. A minthang vangvang lo buang dingin laphuah lamsangah Lengtong Pauno zomah ka koih khat a hihi. A la phuahsa tampi tak lakah khat ensuk pak dih ni.

A thulu : “Gamgui khau a kong khih theih loh”

(Amah pen kamsia in a sing puakna ah ling in a kheel sun kha citciat ahihmanin kum nih sung bang tho zo lo in lupna tungah lum cip hi. Tua laitakin a ngaih mahmah a lawmnu cina veh in a khiangah ong hawh hi. Tua laitakin a la taang khatna hong piang pah hi.)

1. Laitual nga bang nong len mel a kong muh ciang,
Ka zaalmang bang e, lailung muang la’ng e,
Tutvum nong khawl a tongdam nong lel ciang,
Taang bang ka dam tuam ding bang e Ngaih aw.

(Tawmvei sung a holim khop khit uh ciangin ni hong tum kuan ta a, a lawmnu lah khua dang a om ahih tawh a ciah kik loh hong phamawh ta hi. Tua ciangin a sakkik hong suak leuleu hi.)

Chorus/
Nun in nuam e nang tawh ih khawl khop hunte lungin ngilh ngei kei ning,
Nang lah siang lam zuanin khau bang ciah ta ding a,
Nua ciang lungzuan sial si ning lianem aw.

(Hun tom sa lua, a hihang tu lai dingin lah kho ngam lo ahihmanin a la taang nihna hong suak leuleu hi.)

2. Tomkaal melmuh hunte holungcim man nai lo,
Gii bang khenna ding sinthu na lel a,
Kei tawh khawl khop hunte lung na siit man hi e,
Gamgui khau a kong khih theih loh hi cia.

(A lawmnu lah a ciah taktak ding hi ta, ciah in hileh cik mahin hong paikik nawn lo ding cih thei khol liang hiding hiam khitui mual tuang kawmsa in hibangin Mangpha khak ta mai hi!)

3. Ngaih aw vangkhua nunnuam tuang na tun ciangin,
Kei sang paal zaw taang lung na tupte tawh,
Va bang na lenna pan hong ngilh ta ni cia,
Ken sen ngaihno ci’n hong lolo ning maw…

Kapno (Zozaang) in phuahsa la tampi nei hi. Lasiam Kapno in pawl khat khui sungah khum sak khin himah leh sumlehpaai haksat manin tudong kihawm khia zo nai lo hi. Ih thungetna ah phawk tek ni.

Amah tawh na kimuh nop leh Zozaang (Kawl) khua ah hawh lecin, zan khataang silsial nuaiah khuasung a daih khit hun ciangin githa tum a lasa kawm in ama innlam a zuan na mu ding uh hi. U Kapno cile ucin maitai takin “Hoi! Bang a lawm” hong ci pah ding hi. A githa tum pen a pu Dong Khen Dal (phamsa) in a tangvalno lai vua a suihsak ngiat hi in, tua githa pen Electric Githa USD 10000 man sangin zong a it zawk ahihi cih thei sim khinkhian inla, “hong pia ve” ci kha peuh mah ken maw!!! Zomi Quavadis