KL, Wangsa Maju vengsung ah Motorcycle tuangin sum asuhsakzel guta mi 2 kiman

KL, Wangsa Maju vengsung ah Motorcycle tuangin sum asuhsakzel guta mi 2 kiman

Malaysia, Kuala Lumpur, Wangsa Maju vengsung ah Motorcycle tawh misum asuhsakzel mi 2 kiman cih NST pan kiza hi. Tua sumbawm asuhsakzel “snatch theft” tepen zanni in Wangsa Maju vengsung ah Police te matkhiat ahihi.

Hihvai tawh kisai in palik thunei ahi District police chief Mohammad Roy Suhaimi Sarif in agenkhiatna ah khuasungah Uniform silhlo in avak Patrol Police te’n hih guta vansuhsak te Section 4 Junction ah amuhkhiat masak uh cihi.

Tuaciangin Police te’n muangmawhpah uh ahih manin, anungpan in damdam in sulzuihzuih uhhi.

Tua guta mi 2 tepen Yamaha 125lC khattuak atuang uh ahihi. Uniform silhlo Police te’n zuizui in, Petrol Station geikhat atun ciangin muanmawhna nei uh ahih manin nehphei uhhi.

Tuaciangin Police te’n amauleh amau aki pulakkhiat uhciangin tua guta mi 2 tezong taikhiatsawm uhhi. Ahi zongin Police te’n delhhuan, bawhhuan in mansuakzo uhhi.

District Police Chief in agenbehna ah tua yamaha Motorcycle atuang guta mi 2 te lakah khatpa ii anambat “Vehicle Registration Plate” pen tuampiandiak cihi. Tuateng tawh aomdan uhzong midangtawh kibanglo ahih manin, Uniform silhlo Police te’n asul zuihzuih uh ahihi.

Tua Motorcycle tezong thunei te’n hoihtak asitcian ciangin aguktawm uh ahihlam ki muhkhiatbeh hi. Hih guta “snatch theft” tepen “Section 379A of the Penal Code” thukhun tawh thu kibawlding cih kiza hi.

More: Malaysia, Ipoh khuasung innluh guta te lakah palik 3 tak kihel

Hih guta mi 2 tepen kum 22 leh 23 aphakhin uh hi a, abeisa inzong Motorcycle gu ngei, midangte sumbawm suhsak, guihtheih khamtheih vankham tuamtuam zang cihbangin Record hoihlo aneikhin uh cih kiza hi. Sawltak #zomidaily