Vondeih Kep Ding – 89 (Dimno’ Pa)

Dear Tawngno,
Asawt nailo khat in facebook panin hong minthang ahi Zomi CCTV pu hong hawh in thu tuamtuam mah kikum zel ung. Amah bel na pa dan banglo-in thukhel nono leh i ngaihsut khak hetlo ding thu tuamtuamte na ngaihsun kha hi. Akhuak manglang in bright mahmah hi.Ciamnuih zong siam lai-in mi pawlkhat te bangin miko na, mi daisakna tawh ciamnuih genin mi anuisak pawl hilo hi.

Honggen thukhat pen, ‘tuhun ah zomi pasal asuudaw (singer) teng pastor te danin Pasian thugen in vakgai a, numei teng bel pasal nei om mello-in apeugyi (nungak pi) in om gai uh,” hong cidih laizang hi. Ka ngaihsut kikkik leh hisa peuhmah ing. Hih thu tawh kisai zong Zomi CCTV panin ciamnuih tawh kagen nuam lai, ci ahih manin na pa bangin aman’n hong koici gen tam, cih ana ngak khikhe hi ing.

Tuhun pen acihtak mah bangin nidang bang nawnlo-in higawp tamai sa ing. Lasa siamte Pastor te danin Pasian thugen in vak kawikawi ta-in, Pastor te ahih leh inn ah om in apawlpi tawh buai simsim uhi. Evangelist te lah dollars bek tawh thu hong gen ta-in, Crusade maw Camp maw khat peuh i bawlnuam zongin dollars ahoih khop khat mah i neih phot kei leh amaute thugen dingin akisam zo dingbang hinawn lo hi.

Leitung paizia damdam in hong kisia sia ta hi.

‘Pasian mai-ah kamciam in a kilethat nupa te, a kiletthatlo te bangin kikhen ziauziau uh-a,
A kiletthatlo te lah a kiletthat te bangin omkhawm in lumkhawm ta uh.’

‘Gangingte pen mihing te bangin puan kisilh sak in,
Mihingte lah ganhingte bangin puansilh lo-in tangguak peuh in vakvak tamawk uh.’

‘Numeite pen pasalte bangin pasal’ vanteng hong silh in hong kizem uh-a,
Pasalte lah numeite bangin nikbawk peuh teengin hong kipuah ta uhi.’

Kiteng cih ciang male leh female bek om thei ding i sak leh, numei leh numei, pasal leh pasal hong kiteng ta uhi. Nuuta (anu le a tapa) peuh, pata (apa leh a tanu) peuh a kiteng zong hong omta-in, tua bek hilo-in inn-a akhawi ganging peuh tawh zong akiteng nangawn hong om ta hi.Gengen ni cileng gen ding bei ke’n cei, tawngno!

Kumthak dawn dingin ka ompih teng biakinn tungkhin gai-in, hihzah hong gelh hi ning.
Happy New Year!

Hong it,
Napa
Columbus, OH
December 31, 2016
Facebook ah Dimno’ Pa Page non na Like sak ve vua!
https://www.facebook.com/dimnopaa/