Socrates, Plato, Heraclitus, Augustine te theory leh Eugene Nida ii dynamic equivalence ~ Pau Do Lian

Socrates, Plato, Heraclitus, Augustine te theory leh Eugene Nida ii dynamic equivalence ~ Pau Do Lian

Laisiangtho Pasian kammal hi’ ci-a a umte adingin akiteisawn (translate) ciang akhiatna (meaning) leh kammal bulpi (source) thupi kasak na tamlo in hongkup pih nuam ing. Hih tawh kisai in Socrates, Plato, Heraclitus, Augustine te theory leh Eugene Nida in azatmahmah dynamic equivalence tawh enkak in Laisiangtho kammal Christian te adingin thupit zia hih article ngimna lianpen ahhihi.

Laisiangtho Manglai, Zolai leh Kawllai tawh kasim kakciangin a kammal bulpi (original meaning) cihtha dah Manglai (NKJV) bangtawh acihnopna kigamla thei ahihciangin tuate lunghih kamawhna hang ahihi. Thu-um mite zungthuk khakna dingin Pasian kammal lotawh hitheilo ahihman in kammal bulpite’ khiatna akipelhciangin thu-um tezong apaikhial suakhi. Eugene Nida muhna tawh enphot ni.

Eugene A. Nida

Oklahoma City, OK ah November 11, 1914 insuak a August 25, 2011 in Spain ah sihi. Amah pen dynamic equivalence mu khiapa hi-a tuhun Laisiangtho letna ah akizang mahmah model ahihi. Nida in Source (Pasian kammal bulpi) Message (tua lungdamna thu) leh Receptor lungdamna thu angah/ngaimi cihbang in khenthum in khen-a, tua thumte S. M. R te avekin athuneihna (authority) kikimsak hi. Pasian kammal bulpi (source) in M. R. tetungah thuneihna (authority) aneiding hina pi in Nida in athum in (S.M.R) kammal khiatna kikim (dynamic equivalence) inzang ziau hi. Hih model telnop ahih manin dynamic equivalence cih kammal pen mitampi in iplah in zatnuam kisa hi. Ahizongin, mipil masa Socrates, Plato, Heraclitus leh Augustinete zat ngaihsutna (concept) tetawh enkak lenghang koi thukzaw hiam cih kimu hi. Tuate atom no-in enni.

Socrates

Socrates in Pasian bawlsa nakhempeuh cingtaak takin ihtheih nading in kammal (Logos) lotawh piangthei lo hi cihi. Banghang hiam cihleh akhiatna (meaning) pen abulpi (source) ah ki nga ahih man in, tua a bulpi (source) pen kammal (logos) lotawh akhiatna (meaning) kimawk laihthei loding hi’ cihi. Tua logos pen thukhat peuhpeuh midangte tungah ihhilh sawnna ahi-a, teisawn na(translation) ahizongin akisam mahmah zatzia (principle) ahihi, cihi.

Tuabang mah in Heraclitus inzong kammal ih cihpen akhiatna athupi pen hi-a, tua akhiatna aman/dik theih nadingin abulpi (source-original) tawh kikhen theilo dinghi’ cihi. Plato in zong conventionalist theory cih amuhkhiatna ah kammal khatin acihnopna pen thukhat peuhpeuh akhiatna (meaning) a bulpi (source) tungah kinga hi’ cihi. Nida ii dynamic equivalence leh Socrates te’ zat (principle) kibanglo hi. Nida in ahihleh Pasian kammal ih tei/letciangin thungai or zami (audience) te’ ngeina (culture) tungah kammal khiatzia ding kinga hi’ kammal bulpi (source) tungah hilo hici hi.

Abulpi (source) sangin aza mite muhna, deihna thupi zaw thupi zawding mah ahihiam? Ngeina (culture) kibanglo mite lakah thukhat ihgen ciangin amau (culture) bulphuh in akhiatna gending hileng Logos (thubulpi) akiman na omnawnlo in ihthugennop leh akhiatna pen thungei mite’ deihbang in letsak kulding ahihi. Hihpen Socrates in manlo hi cihi. Ahangpen hongkipat khiatna bulpi tungah kinga keileh tua thu (message) pen thuktak in kigen thei ngeilo dinghi cihi.

Augustine ii theory Philip Cary in apuahpha, ‘expressionist semiotic’ leh efficacious external means of grace’ theory zong thupi mahmah hi. Expressionist semiotic theory tawh Laisiangtho ih letciang mihing hihzawhna (inner self) tungpan in Pasian thuthuk zonsawm na hi-a, hih theory bulphuh in Laisiangtho let ahihkei leh Christian nuntakna kingasak dinghileng pen lim (sign) tawh Pasian thu tehkakna ahih keileh khensatna ahihi. Kammal dangin cileng Pasian thuthuk hoihtak in ihtel theih nadingin mihinglam pan (inner self) hanciam natawh theih sawmna ahihi.

Akhat leuleu (efficacious external means of grace) ahihleh mihing hanciam na hilo in Pasian in honghehpihna sungah ki-ap in tua amah vangliatna tepomleng ei mausunga mawhna (inner-self-sin) te hongmu sak ahih man in mawhsutna hong neitheisak hicihna ahihi. Hih anunung theory pen Martin Luther bulphuh upna ahihi. Inner self (sunglam bek) cihpen Western lamte’ lunggulh mahmah Buddhist meditation namkhat tawhzong akibang ahihi. Ei lungsim sungbek focus natawh avanglian Pasian thuthuk theihzawh nading ahithei mah dinghiam?

Martin Heideger (German philosopher) in, mihingleh nadangte a kilamsak pen kampau (language) ahihi cihi. Kampau or kammal in hongki gawmsak thei a hongkikhensak theizong ahihi. Zomi nahih hangin Zokam khatzong pauthei keile teh Zomi telak ah nuam nasa keidinga Zomipih te’n zong kamkuppih theilo dinghi. Namdang te’pau natheih leh amaute tawh nuamtakin na kikhawl thei dinghi. Banghang ahizongin ei tawh paukibat pihte mah nuamkisa a zong kithei siamzaw hi. Heideger ii genpen man mahmah hi.

Tua tawh kizawi tawn in atunga Socrates te’ theory tawh ending hileng Nida in azat mahmah dynamic equivalence ii tha nemna tampi hongpho lakhi. Tua te in bang hiam cihleh, mihing te ngeina (culture) leh abulpi (Pasian kammal) thuneihna kikim lo ahih lam honglangsak pahhi. Pasian kammal vanglian in Leitung leh vantung piangsak anungta kammal leh mihing te ngeina kizakim bek hilo-in Pasian kammal akhiatna mihing te ngeina (culture) tawh leptuah leh khiatziau theihding Pasian kammal hilo hi. Hihpen Socrates, Plato, Heraclitus, Luther te muhna tawh kituaklo Laisiangtho letzia ahihi.

Augustine inzong Laisiangtho thuktaka letna in minuntakna kikhelsak zobeka tua hikei leh lim (sign) tawphah upna ahih manin picing tungzolo ding cihi. Tua lim (sign) pen tulai inzong Zomite sungah akinak zatmahmah model khat ahihi. Haksatna tuak leng kuakhialhna aitam? Mikhat accident tuakleh tua’ hang hi ci in sign tawh anungta Christian tampi ki-om gige hi. Augustine leh Luther te inbel mit amuhtheih ahilo, Pasian vangliatna bekin asungtawng dong (Pasian kammal) honghilh zobek hi, tualo in ‘buffet style Christians’ “anlim tata ne in deih omna teng ah atai kawikawi tawh kibanghi” cihi.

Dynamic Equivalence lotawh kammal dangkhat pan adangkhat ah letzawh nading haksa mahmah hi. Ahizongin kammal letham tangding pawlkhat om a ahici a koihding zong om hi. Gentehna in ‘Baptism’ cih kammal zong Manglai hilo, Zokam zonghilo napi in Zomi te’n ihzang mahmah hi. Let teitei ding hileh akhiatna peng (original meaning omlo) ding ahih manin ahici a koih hoih zaw hi’ cih professor Christopher in hong gen ngei hi. Version khatleh khat, Zolai, Manglai, Kawl Laisiangtho ih etkakciangin akibanglo kammal tamlua ahihman in lunghih mawh huai kasa hi.

Mitheih nopding atei/let leh Pasian kammal thuktak a kep dingin koi thupi zaw hiam? Mite lungsim sungah atheisak ding Khasiangtho hi-a, ei thu-um mite mawhpuak ahih leh ahi bangbanga gen ding ahihi. Gentehna in; Anthropology class a, ka professor pa kadotna, ‘Sia aw, Ko Zogam ah tuu kikhawilo in gampua pai khialo te’n tuu avom maw akang maw cihzong theilo ahih ciang Late 23 leh Johan 10 a tuu cing cihna mun ah athei lote’ bangci hilhding ihia?” kacih leh tuu atheih keivua leh kel cilengzong hithei lel hi’ cihi. Tuu ii omzia (character) leh kel omzia kibanglo in tuu in a gennop (metaphor) tampi zongom ahih lam kathei hi.

Kel in laih ding hileng dynamic equivalence cihna ahih manin akhiatna kicing zolo hi. Tua hi-a, Laisiangtho ihlet ciangin kammal luanzia (wording) thupi mahmah ahih lamphawk huai kasa mahmah hi. Gentehna in Late 23:1 “TOPA in tuu cin’ banga hong cingpa hi a, bangmah ka kisam kei ding hi.” (1977 version). “TOPA pen tuu cinbangin hongcing hi-a, kisapna teng kicing ta hi.” (Bible in Tedim). Hihpen gentehna khatbek hi-a, adang tampi zong omhi. Laisiangtho bu minte: Piancil(Zokam tawh ihzat masak te) Kipatna (Zokam International Version), Maangmuhna (Zokam tawh ihzat masak te) Kilaakna (ZIV) cihbang in kilamdang hi.

Gamvai ah kipum khatna ding leh biakna ah kipum khatna dingin kampau khat ihzatban ah ihzat kammal (version) zong khatmah zangkhawm leng uthuai mahmah hi. Zolai tawh kigelh Laisiangtho tawiciat in kammal kibanglo ihzatciang nuamlo hi. Nampi (English) a hileh bel kammal tangzai pi ahi-in kammal thak zong kumsim in mukhia (invent) den uh ahih manin ahiding mah ahihi. Hihmun ah thanemna namnih ihmu hi. Utbang tekin Laisiangtho ih letciang a bulpi (source) Pasian kammal tawh kigam latetek in akhiatna pengsuah tetek hi. Atelnop dingbek ngaihsutna tawh ihihciang akhiatna (meaning) pengsak ahihlam zong itheih ding kisamhi. Nihna a, version tuamtuam hong omciang in awkai (gentehna: Zo, Sihzang, Teizang) in kikhenna omto semsem in Pasian biakpiakna cihtha dah gamsungah zong etteh takdingin ki-om zolo hi.

Thukhupna

Nida’s model theih nop mahmah napi in Laisiangtho letna adingin (original meaning) acihnopna bulpi pengsak a, Augustine, Socrates te theory, “Logos” zui-in let lehang kammal bulpi ii khiatna kingah hi. Tua ahih manin ‘Nisi per verbum’ ‘Thulo tawh Pasian kitheizolo’ cih bulphuh in Laisiangtho letlehang a original meaning mangtuanlo in kampau dangtuamtuam tawh ihlet zongin akhiatna pengtuan lohi. Sign (lim) bektawh anungta Christian te hilo in; ‘buffet style Christian’ kici, anlim ihduh tebek suak kawikawi’ te hilo a Pasian thuthuk tawh anungta te ihih theih nadingin Topa in asim khempeuh hongtelsiam sakhen. Rev. Pau D.Lian D.Min, (Ph.D) [Haksatna Lo-in Nopna Omlo]