Vondeih Kep Ding – 33 (Pau Khan Kap)

Dear Tawngno,
Zingsang nasep kapai lamkim ding khawng katun ciangin upmawh loh pi guah nasia takin hong zu dihdih hi. Guah bek hilo-in huih tawh kithuah ahih manin ka mawtaw hawlsiam loh tawh patau simsim ing. Freeway ahih manin kei ut thu tawh khawl theih ziau hilo-in, lau pipi, ling kawmkawm samah in ka hawl teitei hi. Brake tuansuk in khawlziauh theih hileh pawh ka khawl nopdan genzawh hi kei! Lau pipi mah in ka paipai a, tua in thu khat hong ngaihsun sak dihdih hi.

“Nuntakna i cih zong hih freeway tung aa mawtaw hawl danmah hitah a maw. Haksa ta leh mainawt kul in, khawlnuam ta leng ei utthu tawh khawl theih ziauh, nungkik theih ziauh hilo-in mainawt kul!Kikhen nuam ta kei leng kikhen hun hong tung in, ut ta leng ut ta kei leng kalsuan phei in nuntakna dingin i mai mah i nawt hong kul vevel hi.”

“ Nuntakna i cih zong freeway tung aa mawtaw hawl danmah hitah a maw,” ka cici hi.

A taktak in cileng na pa zong na nu leh no unau, i pawlpi, i khua i tui, i gam i lei nusia in migam milei ah sum zonga pai ding cih a ut masa hi keng. Nuntakna in hong sawl manin it leh ngaih teng nusia in tuipi gal khat ah a na tung ka hihi. Mi pawlkhatte alawm agual, nih leh thum peuh tawh omkhawm le uh innlam zong phawk lo-in aom na, a tuntun na peuhpeuh ah nuam sa lel uh hi. Na pa zong tuadan aa, aom te eng in ka kisin sin hangin nuamsa thei tuan mahmah keng. Ka kineih neih hangin kineih thei mahmah keng. Siam thei mahmah keng.

Nih leh thum tawh ka om a, a sawm a zate tawh kaom phial zongin tuate lak ah no unau, no nuta teng kihel tuanlo nahih man un ka lungtai thei lo-in, ka maitai zo mahmah lo hi. It leh ngaihte tawh omkhop loh mah nasa bel ing. Thuak hak sa bel ing.

Na pa in hih bangin ka lunglenna te kong gen ciangin na lungkham ngaihsut luat ding ka deih kei a, ‘mi’ khat i thuakna na theihna ding deih in, lawmta khat bangin hong ngaihsun in hong gen ka hi hi. A gamla aom mi khat in innlam a ngaihna, innkuanpih te a phawkna lungsim leh ngaihsutna te nang mahmah in na thuakpih sak theihna ding, na lawmte khat peuh in a lungleng, a khua ngaihnate hong gen ciangin na telsiam sak zawhna ding leh nang mahmah zong hih bang hun na tuak ciangin na kigin kholh theihna ding lunggulhna tawh hong gen hi ing.

Na pa zong ka cidam zawkna dingin tuibual in lamsiau zel ta ing.

Hong it tawntung,

Na pa
Columbus, OH
July 10, 2016