Na kikhenzak het kei un maw ~ Dr. L. Lam Khan Piang

Zogam Kawlkumpi ukhna nuai a omkha Zomi teng pen tawlpi khat minam vai tawh kisai bangmah sem thei-lo in om a, tua ahih manin buaina ding tampi in hong ngak mah bang hi. Democracy leh mipi telcing kumpi deihin hah panin i pang hi. Hih pen ki-ukhna dingin a hoih pen bangin a kingaihsut hangin, minam picing leh lianzaw te vaihawmna hong hi lel dih hi. Tua ahih manin, amaute in a ukhna uh a kipna dingin minam tawmzawte hong khenzak sawm den ding hi. Mikang kumpi’n hong ukh lai-in zong hih bang policy—divide and rule—pen limhzat mahmah in kigen thei zel hi. Mikang kumpi hong ukh lai a, hong piakziau uh identity—Tedim-Chin—cih pen tuhun ciangin hong huam kim zo kisa nawnlo ahih manin ngaihsutna dangdang hong piang hi. Tua hun lai-in Tedim-Chin a cih uh ciangin, Sihzang, Thadou (Thahdo), Zou (Zo/Yo), leh adangdangte(adgte.) hi a, sanggam dangte (Khalkha/Falam) cih bangte tawh i ki-etkak ciangin hoih mahmah bang hi.

Tu hun ciangin hih bang tawh kipumkhat thei nawnlo i hih manin lampi dang zon huai hong suak hi khong hi. India lam a omte zong nidang lai-in Kuki hong kici in, sanggam Thadoute ahi zongin Luseite dong pen Mikang kumpi in Kuki a cih ziau ahi hi. Ahi hangin 1953 kumin India Kumpi in Backward Classes Commission cih minvawh in India sung a tribes (minamneu) om tengteng list bawlding cih vai hong sawm hi. Tua ma-in Manipur bangah pen kuamapeuh Kuki kihikhin vek lel hi. Hih commission report tungtawn in India kumpi in Manipur a Kukite pen minamneu 16 takin hong khen ziau hi. Behkhat nangawn minam tuam hong suaksak ziau-in, amite in tua pen midel-sialkhaulet lai zawsop hi. Tua ahih manin, Kuki min tawh kiding khom thei ngei nawn taktak lo hong suak hi. Hih hong kikhenzak manin metna omvet lo-in supna vive hong piang hi.

Tulai takin Kawl Kumpi ukhna sunga om Zomi laizomte sungah hih bang kikhenna census hangin hong piang ding bang ahih manin lunghimawh huai sa mahmah ing. Kikhen pen baih mahmah in kigawmkik pen piang mengmeng lo hi. Ka thuzak a dik leh minam neu min dingin—khuano, sihzang, Tedim, leh a dangdang ci-in hong kikhen sawm hi ziau lel hi. Hih pen dah huai ngauganu hi. Manipur a Zomi namte in a tuahsa ahih manin, Chin State leh a kiim a Zomi omte tuah ding kong deihsak hetkei hi. Hih pen dodal ding hoih bek hilo in kiphamawh/kisam mahmah hong suak hi.

Ei Zomite-in i minam tungpan na tampi lamen ihih manin kikhasiat ngeingai kha hi hang. Minam tungah nekngah nang omlo hi cih tel masak dingin hoih hi. ‘A Zo te in Tedim kam zangte bekin uun khin’, Ahih kei leh ‘a sihzang lamte laisiam tam uh in, na teng huai khin’ cih bangin kigensia ngeigai pong hi hang. Hih bang mah Manipur a Zomite zong. Minam tungah mimal in hamphatna kilamet nei lo zaw-in, ka minam leh ka Zogam a dingin bang ka hih thei hiam ci tek le hang kuamah kikhasiat manlo ding hi hang. Minam neu tiutiau tawh tuhun leitungin ‘globalization’ cih a buaipih lai hunin khantohna hong tunglo ding a, manthatna lampi a tawntawn ki hi zaw ngel ding hi. Hih thupen pelem vet lo ding hi.
Democracy kivaihawmna ah lut ding hi sawnsawn, nambat (milip nambat)kisam hong hi ding, kikhenzak leng midangte (the others) a dingin hoih lua lo ding hiam? Guai! Limhtak kingaisun in i minam makaite cih bangbang a nung zui dialdial le hang, val peuh mah lo ding hi hang. I hih khial phial zongin, i kithutuah nakleh, democracy kivaihawmna ah ihih khialhkhop liailiai na nangawn pen i gualzawhna hong hi zawsop ding hi. Liailiai ahih nak leh lunghimawh ding om lo hi. Dialdial in kamkei bang gial khawm diamdiam leng e, minam picing ihihna hong kilang pan bek ding hi.

Limhtak kiho khawmin, lungsim tuam a neikha i om khak tak leh zong kingaihsun pha thakni. Tu hunin, na khat pepeuh i hihkhialh ngeingei leh bawldik ding haksa mahmah ding, bektham lo-in kibawl hoih thei ngei nawnlo ding hi. Minam min neu nono minkhum ding a sawmkha i om leh kingaihsun pha thak ni.

Lainatna leh deihsakna lianpi tawh,

Dr. L. Lam Khan Piang
Asst. Professor,
Jawaharlal Nehru University
New Delhi, India