Vondeih Kep Ding – 160 (Dimno’ Pa)

Vondeih Kep Ding – 160 (Dimno’ Pa)

Dear Tawngno, Tukum phalbi hong tung baih leh kilawm sa ing. Zanhal ni khua hun en khol lo-in puanpan khat tawh na sep ka kuan leh khua dam sa-in ka na sepna mun ah tonlum dek liang ing. Ei kiang lam khuahun bang ci ding bel thei kei, hih lam ah bel puanlum a kisilh hita mai ei!

Kong genngei sa mah bangin khual na zin ding leh puanlum leh laibu khat leh nih khawng pua hamtang in. Nisa in khua a lum leh bel phamawh kei zaw in lametlohpi in khua hong dam zenzen leh na silh dingin puanlum khat peuhmah pello na puak hamtang ding hong deih ing.

Mite neihsa a gugu khat Guta pa, ci-in sam leng deih lo ding a, mi tawh a kitawng den khat zong Gilo pa, ci-in sam vava leng a deih het loh ding pen lamdang lua lo hi.

Amau zong a deih a a teel masak uh hi lo ahih manin khat peuh thanemna pholak in tua tawh va zawhthawh kul se lo hi. Ei zong i hoih lohna tawh hong kici leh kinui zo khol lo hi. Ih hoih lohna hong kici leh nop sa lo i hih manin mi hoih lohna, mi thanemna zong va cihcih kul lo a, na khat peuhpeuh ei dingin kibulh zel leng hoih pen kha dingin um ing.

Gen kizom loh, lawm na ngaih ding leh Sang siamah sem te ngai lo ding, ci uh. Ahang in tuate in a pasalte pen a sang naupangte dan in ngaihsun in thuhilh den tawntung uh, ci! Tua bang a thu hong hilh ding, hong puah hong zun nuam ding te tawh heuh kingai thei le cin ka cih hiven ah, nang e bang ci na ngaihsut a? Hong it, Na Pa (October 10, 2019, Columbus City, US)