Vondeih Kep Ding – 13 (Pau Khan Kap)

Vondeih Kep Ding – 13

Tawngno,

Khanglui te’n “ Hakai pahtak, lungheng” acih kammal mah bangin Tawngno aw, na nau tawh veng leh paam in hong pahtaak laitak in misiat midaina khat peuh nong neih khak ding uh na pa, ka om na panin patau mahmah ingh.

Mi in hong pahtaak mahmah kimlai in zukham sa khawng in biakinn ah kikhawm le cin bang cidan in hong mu tam! Sun tangpi khawng in zukham sa-in lamdung khawng ah, “ hong ngappeuh hong pai, kihtak khat zong nei kengh! Pilna hi ta leh neihsa lamsa hi ta leh” ci-in peuh awng in, ku zanzan le cin mi in bangci hong mu tam! Na pa, patua mahmah ingh.

Tangvalno hih ta nahih man un numei hoih lo khat peuh in,“ pai o, video va en khawm ni! Beer vadawn lo ding ih hia” ci-in hong zol in hong zawn zongin pilvang in na om paukhankapding hong gen kholkhol nuam ingh! A diakdiak in numei tawh kisai, zawlthu tawh kisai ah minsiat mindai na, na neih khak ding mahmah napa kalung hi mawh ngaungau pen hi! Tuni ciangciang na unau un na nu hong cih bangbang, na pa kong gen bangbang in hong mang lai-in, hong zui lai na hih man un ka lungnuam tuam hi! Ahi zongin nahawh naciah na khempeuh vauh ko na nu leh na pa in hong zuisuk hong zuito zolo ka hih man un a zing ah na om a, a mial ah na om zong un hih kong gen thu te na man ngilh kei un maw! “ Thusia in mual kua khum , thupha in kongbiang kang lo” ci hi. Hih bangin kong gen ciangin na lawm na gual te tawh kithuah lo-in nopna hita leh dahna hita leh pai lo-in, ‘inn ah om cip in’ hong ci hi tuan kengh. A kilawm a kituak ciangin gamta-in na om ding hong deih hi zaw ing. Na pa zong ka khangno lai-in gualnop na hita leh dahna hita leh zanhak na ding aom leh zanhak in, gualnop na ding aom leh zong lawmte mah tawh a gualnuam thei pen dingin om ingh. Ahi zongin a hoih bek khat ciangin om ingh. No unau zong tua dan mah in om le uh cin hong deih ingh.

Lengna khat peuh ahi a, khual panin zing leh leng khat peuh ih neih ciang ahi zongin milak ah na nu kampau te khawng, na nu hong thugen te khawng dawng lawklawk in, nial lawklawk kei un maw. Tua bangin dawng lawklawk le uh cin mi’n “ hih te unau in, a nu uh hai bawl si e, zahtak kei tak ei” hong ci-in hong en-neu ding uh hi. Khanglui te’n “ Nu leh Pa thumang, a nahlawh peek” ci uh hiven! Na nau tawh milak khawng ah kitawngtawng le uh cin, “ nute hilh loh, pa te hilh loh hi’n teh maw” hong ci lel ding uh a, nalawm na gual un zong ‘hih te unau, nu’ thumang lo, pa’ thumang lo’ ci-in lawm dingin zong hong deih nawn lo ding uh hi.

Tua bek tham loh in khanglui te’n “ Tanu pahtaak, zawlgai” ci sawn sawn lai hi. Gamtat lukhek na khat peuh ah pilvang in na om un. Khanglui te kampau te pen a na mawk pau uh hilo in, a sin thu uh leh a tuah khak thu uh a na gengen uh hi.

A tawpna ah na pa’n kong vaikhak nop khat in, na nau tawh, “ temta mai a, a kinuh khuaizuu, ciam nuam in liak nuam sese dah un maw” cih hong gen nuam ing. Lauhuai lua hi tua te!

Hong it,
Napa
Columbus, Oh, U.S.A.
May 16, 2013