Vondeih Kep Ding – 116 (Dimno’ Pa)

Tawngno,
Banghang ahi tam thei keng. Tu sungteng ka lungsim ah bangmah om lo-in, na dang mahmah sem lo hi ing. Laikhak ding gelh sawm in ka kithawi zel hangin pankhia zo mahmah lo-in, laibu sim dingin kithawi taleng zong ka laibu tawi ka phen ma-in ka khut tung panin kia khin ta hi. Lai sim hita leh na gelh hita leh na khat peuhpeuh i lawp deuh hun om leh kilawm sa ing.

Ka hun mawk bei sa ing. Hun mawk bei i cih pen zong hun hi lo-in, i nuntakna a mawk bei na hi gige hi. Banghang hiam cih leh i nuntakna pen hun tawh kibawl in ciangtan khat bek a nei hi mawk hiven!

Maidu Indians minam (Native American ) te neih creation story khat kong gen nuam ing!

‘God the Earhtmaker in buan san tawm la-in, tua pen tui tawh hel in, a hoih mahmah pasal leh numei in hong bawl hi. Amau nih pen hoih mahmah napi uh in, ahi zongin a khut ding uh om nai lo ahih manin, Earthmaker in adang a bawl khitsa nuntakna neite kiang, ‘koi cidan in hih mite a khut ding uh bawl sak leng hoih ding hiam?’ ci-in hong dong hi.

Tua leh Sumkuang in, “Kei a danin bawl sak in. Tua hileh kei danin tuizam siam ding uh hi,” hong cih leh, Keeivom in hong dawn kik a, “Hi kei! Kei a danin bawl sak in. Tua hileh amau kei danin taihat ding uh hi,” hong ci hi.

Earthmaker in tawlpi khat hong lung ngaingai in tua khit ciangin, “Na vekpi tung ah ka lungdam hi. Ahi zongin hih mite khut ding pen Kei a tawh a kibang in bawlsak ding khensat khinta ing. Tua hileh amau zong Kei dan mah in nate bawl thei ding uh hi,” hong ci hi.

Mi nu leh mi pa khutte pen Earthmaker khut tawh hong kibangta ahih manin amau pen a kibawl nuntakna nei khempeuh lak ah a hoih penpen hong suak hi. Banghang hiam cih leh a khut uh tawh na dang tampite hong bawl thei uh hi.’

Maidu Indians minamte in, Pasian in ama khut tawh a kibang in i khutte hong bawlsak ahih lamtak thei uh ahih manin na hoih lo, asiate seploh ding thei uh hi.

Mi thanemnate, mi hoihlohnate zungkawkna in i khutte zang lo-in, mi bawlsiatna in zang kei ni. Mi suksiatna dingin zong zang kei ni. A tukte phottohna in zang in, dah in a kap mite khituite nulna in nei zaw ni. Mite a liam sak hi lo-in, mi liammate a bawl sak khutte hi sak zaw ni.

Tua bang danin Ama tang in khat leh khat a kihuh theih dingin Pasian in i khutte Ama khut tawh a kibang in hong bawl sak hiven!

Hong it,
Na Pa
June 16, 2017