Malaysia gamsung ah IS migilo tetawh akizom mi 14 mankhia leuleu

Malaysia gamsung ah IS migilo tetawh akizom mi 14 mankhia leuleu

Malaysia gamsung ah nungkalsung in Islamic State (IS) Terror Group tawh kizomding in aki ummawh mi 14 palik te’n mankhia uh cih theSun Daily pan kiza hi. Tua akiman tepen munkhatbek pan hilo a, muntuamtuam panin aki mankawikawi ahihi.

Nungkalsung amatkhiat migilo tetawh kizomding in aki ummawh te pen Kuala Lumpur, Selangor, Johor, Kedah, Perlis, Perak cih State tepan amat khiat uh ahihi.

Deputy Inspector-General of Police Datuk Seri Noor Rashid Ibrahim in agenkhiatna ah hibang in migilo te matkhiat theih nadingin hongmakaih pen Bukit Aman Special Branch Counter Terrorism Division te ahihi ci’n genkhia hi. Nung March khasung inzong hih Division temah ii makaihna tawh migilo 15 mankhia ngeikhin uhhi.

Tutung akimankhia mi 14 te lakah numei khatzong kihel a, kum 22 leh kum 49 kikalgual pawl ahi uhhi. Tuaban ah akiman mi 7 tepen Private Companies ah nasem hi uh a, adang mi 2 tepen Businessmen ahi uhhi. Adang acianlai te ahihleh Lab Assistant, Labourer, Aircraft Technician, Mechanic, Entertainment Outlet Hostess cihbang ahi uhhi.

Hih migilo tetawh akizom te in Malaysia gamsung ah bang semphadiak hiam cihleh Syria leh Philippines gamsung aom migilo te zatding in sumlehpaai zonsak uh cimawk hi. Tuaban ah Syria gamsung aom Malaysia gammi IS tetawhzong Direct in kizopna nei uh cihi.

Hih akiman te lakah khatpa ii Bank Account zangin Syria gamsung aom IS migilo te panpih nadingin sum khakzel uh cihzong kumpi thunei te’n mukhia uhhi.

Related: Ka Mercedes mawtaw sangin ka nuntakna lazaw un ~ ZD

Tulaitak Malaysia gamsung panin gampualam ah sum tampipi khakding naneihleh kidawm mahmah in. Kumpi thunei te in hong lim etcik mahmah laitak uh ahihi. ZD Sawltak #zomidaily