Vietnam gamsung ah tuikhanggawp in mi 12 in sihlawhkhin

Vietnam gamsung ah tuikhanggawp in mi 12 in sihlawhkhin

Vietnam gamsung ah tuikhawng letgawp in mencim leitolh kawikawi ahih manin, mi 12 takin sihlawhkhin cih AFP pan kiza hi. Officials te’n tuni Sunday ni in agenkhiatna uhah tua Flash Flood tuikhawnggawp pen Central Vietnam kuamsungteng ah ci uhhi.

Tui tamlua mahmah ahih manin, tua Central Vietnam kuamsung tengah ateengkha khuate nawksiagawp in tuihual tawh taikhiagawp hi. Cimawh dongtuak mitampitak om ahih manin, kumpi thunei te’n galkap te ahuhding in kuankhiasak uhhi.

Abeisa hunsungteng in Central Khanh Hoa Province sungteng ah guahtui tamlua mahmah ahih manin hibangin atuahsia ahihi. South China Sea panin Toraji kici Tropical huihpi in nawkphei ahih manin, hihbangin khuahun asiagawp hi a, mencim leitolh zong muntuampi ah omkawikawi ahih amnin inn tampitak siatlawh dikdek hi.

Provincial Disaster Office te’n agenkhiatna ah cimawh dongtuak te hotkhiattheih nadingin ki hanciam in, kizong kawikawi a, tuciangciang misi pen 12 bang ki mukhia khinta hi ci’n AFP te tungah genkhia uhhi.

Galkap Army Troop tampitak cimawh dongtuakte ahuhding, khuasung ninlom gampa te ahahsiangding in ki kuankhiasak hi cihzong thunei te’n genkhia uhhi.

South Vietnam leh North Vietnam kizopna Highway lamzikpi zong ki khakcipphot a, meileng lampi “Railway Routes” tezong pawlkhat ki khakcip hi. Photo pawlkhat aki khahkhiate ah innpawlkhat tepen ninlomkawm bulak ah ki vuknelhcip in khasiat huai mahmah hi.

Pawlkhat agei ah amukha khuasung mite genna ah inngeinai aom mualdawn panin mencimsukgawp in lei tolhsuk ziahziah a, ginngaih mahmah in lauhuai mahmah hi. Suangtum golpipi atuksuk ciangin ki patau in ki taikhia ngeingai hi ci’n genkhia hi.

Asawtlo in khuasung aom inn tampitak ki siacipgawp hi ci’n Nha Trang City Resident khatin genkhia hi. Khanh Hoa akicihna khuapen tuipinawl aminthang “Popular coastal resort city” akici Nha Trang City aomna hi a, abeisa kumsung inzong Typhoon Damrey kici huihpi in nawkngei ahih manin, tuahunlai inzong mi 27 takin sihlawh ngeikhin uhhi.

Vietnam gamsung pen ahunhun in huihsia leh guahsia in nawkthei zelzel hi. Adiakdiak in Typhoon Season akicidiak May kha leh October kha kikal sungteng ah huihsia guahsia in nawkthei phadiak hi.

More: Vietnam ah mopi dingin apai mawtaw tuahsia, zineidingpa leh adang mi 13 si

Tukum January kha akipan Vietnam gamsung ah Natural Disasters in anawkna hangin misi bekbek pen mi 185 tak phakhinta uhhi. Nungkumsung inzong Natural Disaster hangin asipen mi 389 bangin ki ciamteh hi. Tuaban ah tuahsiatna zong $2.6 Billion bang phadinghi ci’n Official Figures ciaptehna kinei hi. Sawltak #zomidaily