Vaikin tampi kinbawl huai

Vaikin tampi kinbawl huai

“Vai nunung guahsia in lap.” A beisa kum nih leh alang, 2015 kitel gualzo kumpi thuneihna, thuzekna kipat leh tu kikal i et ciang, hak gega a i ki thatang nial hang i lawmte tawh tong le lam in kikhai khin hihang.

Len nupa vai a kipan thudang khempeuh ah zong ong naupang nopneh leh hak gega in ong ki naupang zawhthawh mahmah hi. I muh i theih gega ahihman in kinial tantan se kei ni.

Kitel kik ding peuh gengen na ve hang in, tua kitel tektek sese sang a kinhuai zaw thu tampi om sa ing. Kitel ding kum 2 valdeuh omlai a, ahih hang tu a kumpi’ thuneihna, thuzekna hun ding kum nih leh alang omlai hi. Tu ta i zilhsuak leh Hih kum nih leh alang sung in pangbet tawsuih bangzah i tuak laidiam ki ngaihsun ngamlo phial hi.

Kum 5 term khat sung bekbek in tong leh laam bek hilo, van leh lei zah, delhphak zawh nawnloh ding zah in kikhai ding hihang. Mi sang i niamzawk leh ong kisimmawh, ong ki nenniam ding cihna hipah lel hi.

Kitel ding pen gamla mahmah lai lel. Tuazahpi in zong thupi masa pen khol kei. I sepding i geel ding a kin zaw, a thupi zaw nak tamlua sa ing.

Mi sang thuneihna ah thanem zaw i hihman in i kal manlang zaw ding kisam hi. Politics i cih mipi’ tha hi. Mipi ki-huai, ki pumkhat ding kisam hi. Mai nawt ding kisam hi.

Lubawk i kituh niloh leh miksi lubawk a lawm a gual lak ah a gualheu hang khutme muk tawh mekkhat tham nangawn cinglo hi. Lubawk kituh in buai sesu nawn kei tapeuh dih ni. Sawt i khawl leh hun tomno sung in a nawhtat mahmah ong kul ding hi.

Sawt i ihmut leh nakpitak thasan a gim mahmah, khua-ul tampi luang a i sep a kul hun ong tung ding hi. Tua lo in i minam mite’n ong valhtum a, a survive zolo ding dinmun i tun khak ding ngaihsut kholh huai luata hi.

Tu nangawn in zekai lua khinta hihang. Thawh hunta, ni sangta, vai kuanhun luata hi. Vai nunung guahsia in lap thei hi. Pau Khat Suan

Politics leh Mawhsakna

Politics gengen a Mawhsakna a thuaklah phadeuhte pen ama’ mimal angsung hamphatna ding a tua nasep a semsemte ahi hi.

Tuabang mite in ama’ cihbangbang Amen aci lote gal in nei pah a, makai dinmun ah a omkhak ciang Newin’ hunlai sang suuksia zaw uh hi. Ama’ deihbang in Thuneihna neithei hileh Adolf Hitler bang khading uh a, tuaban ah hithei hileh tanglai kumpite’ thuneihna bang lunggulh lai khading uh hi..

Tuabang mite’ khateh nengkai lam-etna tawh a pumgupte bel mihai taktak ahi hi. NB: Hunbit biakna nasem lak ah zong hihbang lungsim om zen hiven.

Mawhsakna leh kimakaihna

Mawhsakna i thuakngap kei leh politics seploh hoih zaw ding hi. Banghang hiam cih leh muhna leh deihna kibat loh man a mawhsaknate ahi zong in, deih luatman/ deihsak luatman a mawhsaknate mah in lam honglak ding hizaw hi.

Ataktak in politics a sem khat in a langpang a a mawhsak nilohte nangawn galgik zenzen lo a apawl ding a athuzawh sawm ding hizaw hi.

Tuabang mah in makai khat in a lungsim a ahuamtan bek makai thei hi. A lungsim in Kipawlna huang ciang bek a huamzawh leh tuaciang bek mah a makai hipah a a valkan va makaihsawm seloh ding hipah hi.

Kipawlna leh pawlpi ciang, party khat ciang, gamke khawkkhat ciang, gambup ciang, minambup ciang….. makaite a lungsim ngiat in koiciang huam hiam? A lungsim in a zawhloh pi OR a lungsim in azawh zah valkan a makai va sepsawm teitei tantan pong pen amau lah gim, mipi lah hamsia hi. Pau Khat Suan