Malaysia pan Singapore zuanin apai Express Bus khat tuahsia, mi 3 si
Malaysia gamsung Johor Expressway lamzikpi tungah tuni Sunday zingsanglam in Bus golpi khatleh Trailer mawtawpi khat kinawkkha cih Bernama pan kiza hi. North – South Expressway kizi lamzikpi ii Kilometer 138 munah atuahsia hi a, hih tuahsiatna hangin mi 3 in sihlawh uhhi.
Tua Express Bus pen South lamsang zuanin apailaitak Pagoh Toll Plaza gei ah zingsanglam 2:30am hunpawl in atuahsia kici hi.
Muar District Police Chief Zaharudin Rasip in agenkhiatna ah tua atuahsia Express Bus pen Kuala Lumpur panin Singapore zuanin apailaitak atuahsia cihi. Asi mi 3 te lakah mi 2 pen amin ki pulakkhiapah a, Lim Siew Kee leh Lai Moon Ching kici hi. Adang asi khatpen pasal hi a, amin kitheician nailo ahih manin ki pulakkhia nailo hi.
Tua Express Bus tungah Passenger mi 25 leh Driver 2 atuang uh ahihi. Tualak ah mi 14 liam uh a, tua aliam tepen Muar aom Sultanah Fatimah Specialist Hospital leh Batu Pahat aom Sultanah Nora Ismail Hospital te ah zatui kibawlding in kipuak uhhi.
Thunei te genkhiatna ah Express Bus in Trailer mawtawpi khat ii ataklam nawkkha in, tuapanin tuahsiatna akipan hiding kici hi.
Tuabangin akinawkkhak ciangin Express Bus sungpanin Passenger mi 3 kilawnkhia uh a, tualak ah khatpa pen aphual ah sisuakpah hi. Tuaban ah adang akilawnkhia mi 2 tezong Hospital ah kipuakdingin aki paipih laitak in lamkal ah si uhhi.
More: Malaysia, Johor Baru datsisai ah mulkimhuai takin kithahna makaipipa kimanta
Trailer mawtawpi ahawlpa pen kum 28 aphakhin khat hi a, amahpen bangmah liamna neilo hi. Ahi zongin Express Bus ahawl kum 54 aphakhin Zaharudin kicipa pen liam cihi. Police te’n hihvai tawh kisai in athu akanciansan laitak uh ahihi. Sawltak #zomidaily
Comment piaknop aomleh...