USA, North Carolina, Charlotte pan Lia Niang Sian Muan Kim (Gamngai, Phiamphu) in hongnusia

Mangpha Lia Niang Sian Muan Kim, Kum 11 (Phiamphu beh)

USA gam, North Carolina State, Charlotte khuapi ateng Lia Niang Sian Muan Kim, kum (11) in abeisa 12/07/2017 ni-in damlohna hangtawh atenna Charlotte khuapi panin mual ong liamsanta cihthu izakmanin Zomi Innkuan USA kipawlna in nakpitakin kidahpih, kilainatpih mahmah hi.

Lia Niang Sian Muan Cing pen Zogam, Tedim uksung, Gamngai khuami Phiamphu beh Pa Khup Lam Dal leh Nu Do Sian Cing te tanu hi-in khangdawnglai, maban limci tampi maingat kimlai a hicibanga ong nusiatna hangin Zomi Innkuan USA kipawlna in pammaihsa leh ki khasiatpih
mahmah hi.

Pa Dal te innkuan pen nuntak khuasakna anuamzawding lunggulhna tawh abeisa 2008 kum in USA ongtung uh ahihi. Lia Muan Kim pen USA leitang tunga ong nusia Zomi sanggam laizom khat hihnatawh dahpihna, lainatpihna, thuakpihna lahna in Zomi Innkuan USA kipawlna in Zomi Innkuan Charlotte makaite tungtawnin Paakkual khattawh mangpha khakna kinei ding hi.

I itmahmah Lia Muan Cing tawh a nunungpen hunzatkhopding pen ong tungding 12/16/2017(Saturday) ni-in Charlotte khuapi a om Zo Baptist Church (ZBC) Pawlpite ngeina zuiin Rev. Lang Suan Pau makaihna tawh a nunugpen hehnep hunbawlna kineidinga tuakhitciangin vui na kinei ding hi.

I it mahmah I nauno Lia Muan Cing ong nusiatna hanga adah akap tanau meltheih, khuapih tuipih khempeuh adiakin anusiat a nu leh pa, asanggam teng tungah I biak Pasian kiangpana ongpai ahehnepna bucing ong tung henla lungnop tawldamna ong guankimtek tahen cih Zomi Innkuan USA kipawlna in thu kingetpih hi.

Dahpihna lianpitawh,

Tg. Kai Lam Thang
Secretary of Genvai
Zomi Innkuan USA,Inc
December 13, 2017