Nang le nang tha kipia in (Self Motivation) ~ Rev. Dr. Thuam Khan Thang
Leitung ah minam nih om a, amah leh a mah tha a kipiak siam leh, amah leh amah a ki-enneu dente ahi hi. Ei mite lak ah a diakdiakin ei le ei ih kineu-et thei pha deuh hi. Anuaia bangin enkhawm ni.
1. David Amah leh amah tha kipia hi (1Sam 30:1-6)
Pasian kammal Lai Siangtho sungah, David nuntakna enkhawm dih ni. David agalten khemin, alangpan a simding kineih a, alang lampan buk hi (ISam. 30:6). Gamsim ding akuat khiat kalin, a langlam pan aten akhua naluhin, van khempeuh lamangin, mi khempeuh tonpih mang hi. A khuaah haltum lai hi. David zi le tate galmatin kipaipih hi. David kiangah kamtai hong tung hi. David nakpi takin dah hi.
A galkap mangte zi le tate zong kiman mang ahih manin, David tungah heh uh hi. Suangtawh David den sawm uh hi. David panpih ding om lo hi. Tua hun laitakin David kitha khauhsak a, amah leh amah tha kipia in, galte idelh ding hi. Ih zi le tate ih hon khia ding hi ci-in a galkapte thapia hi. Galte delh uh a, avekun honkhia kik hi. David tungtawnin tha neempen hun in, ei le ei tha kipiakna hong hilh ahi hi.
2. Ei le ei ki-neu-etna (Inferiority complex)
Ei mite in, midangte tawh ki-ettehin, ei le ei ih ki neuet pha deuh hi. Midangte apha lo, midangte nuai a om, deuhin ikingaihsun hi. Hakha Falam te inban zokei hi ici phadeuh hi. Amaute tawh ikithuah ciangin, mau lampan zong ei ban lo hong kisakna uh na tam mahmah hi. Tua ahih manin, ih bat loh khatpeuh tawh kitehin, ei le ei iki neu-etna in ilungsim hong neusak mahmah hi. Ih bat lohte ettehin, idem ding, ihanciam ding hizaw hi.
3. Ei le ei Kithupi ngaihsutna (Superiority complex)
Ei le ei kineuet na langkhat ah ei le ei kithupi ngaihsutluatna zong a kidophuai thu hi leuleu hi. Mi pawlkhatte, amah leh amah kithupi ngaihsut lua-in, mite tungah a sangdeuh, atheideuh, apildeuh, a siamdeuh, midang ten apha zo lo-in kisang ngaihsut deuh uh hi. Hihzong ngaihsut khialhna mah hi leuleu hi. Ei hihzah val a kingaihsutna in, lam hong khialsak hi. Midangtawh kithuahthei lo, na semkhawm thei lo, cihte in amah leh amah kithupi ngahsut lua, midangte neu-ette hi uh hi.
Thukhupna:
Ih nuntakna ah nisimin, haksatna, tuahphatna, daupaina, tuahsia kisakna cihte ituak den hi. Ei ngaihsut bangin hong pian lohhun a om mah bangin, ih ngaihsut kholh loh thu zong tampi ih tuak thei hi.
Hih leitung nuntakna ah ih gualzawh nangin, ei le ei kingaihsutna thupi hi. Kineu-et luatna in hong thanem sak hi. Ki thupi ngaihsut luatna in lam hong khialsak hi. Ih thanem ciangin ei le ei tha kipiaksiamna thupi mahmah hi. Midangte apha lo a kingaihsut denna in hong tha nem sak hi.
David bangin ei le ei tha kipiaksiam ding kisam hi. Midang taawh kitehin thanemsak kei ni. Midangte zong enneu in neubawl kei ni. Nang, Pasian in nang dingin hong bawl hi. A gualzo dingin hong bawl hi. Amen. Rev. Dr. Thuam Khan Thang/ The Tedim Post
Comment piaknop aomleh...