USA, California State sung khuahun siagawp in, mi 4 sikhin

USA, California State sung khuahun siagawp in, mi 4 sikhin

USA, California State sung aom San Diego leh Los Angeles khuate ah huihpi guahpi in nasiatak in nawkgawp ahih manin mi 4 in sihlawh cih Yahoo News pan kiza hi. Los Angeles khuasung aom lamzikpi khatzong lampi laizangah Sinkhole ci’n kuahawm lianpi khat pianga, anuai ah Meter 6 (Pi 19 val) bang thuksuk cihi.

Tua kuahawm sungah mawtaw khattawh numeikhat kiasuk sawnsawn a, Emergency Services te atun mateng taikhia theilo in, leisung ah awkcik hi.

Los Angeles Fire Department te atun ciangin honkhia theipan uh a, tua leisung ah a awkcipnu ii genkhiatna ah asi tading kakisa ci’n laulua mahmah hi. Firefighters te ahonkhiatding a hu ging azak ciangin lungdam mahmah hi.

Hih huihpi leh guahpi hangin tuikhawnggawp, buannawng piangin leitolh cihte banah huih hatlua in, Electric Power zong kisiacip cihi. Mi 4 peuhmah in sihlawh khinding cih kiza hi.

Los Angeles Police te’nzong pasal kum 55 aphakhinkhat Electric datlaih in si cih genkhia uhhi. Tuaban ah Los Angeles khuasung aom mi 60,000 bangin Electric Power ngahlo in, cimawh mahmah uh cih genkhia hi.

Highways leh Railways tezong avekin kikhakcip ci’n National Weather Service te’n genkhia hi. California State bupsung khuahun siamahmah cih Los Angeles Meteorologist te’n pulakkhia uhhi.

Guah zulo in gamkeugawp ahih manin tuahangin khuahun asia hiding in ki ummawh hi. Khatveivei guah zulo in akeucip ciangin Flood tuicim tawh kizomthei cihi.

Nungkum December khasung inzong USA, Texas ah lamzikpi khat kuavang piangin mi 2 kia a, khatin sihlawh ngeikhin hi.

More: US Texas ah lamzikpi kuavang piangin mi 2 kia, khat si

National Weather Service te’nzong 1995 kum khitzawh Southern California sung anawk huihpi guahpi lakah ahatpen, akhauhpen hiding ci’n genkhia uhhi. ZD Sawltak #zomidaily