“US Travel Ban” hangin Malaysia US Embassy mai ah lungphona kinei

“US Travel Ban” hangin Malaysia US Embassy mai ah lungphona kinei

President Donald Trump ii makaih US kumpithak in Muslim gam 7 panin Muslim te US gamsung ah lutsak nawnloding cih Travel Ban bawl ahih manin, Malaysia gamsung aom Muslim pawlkhatzong hehmahmah uhhi. Hih Travel Ban vaitawh kisai in zanni Friday ni in Malaysia, Kuala Lumpur khuapisung aom US Embassy mai ah NGO pawlkhat leh gamvai avei mi 100 khawngin lungphona nei uh cih Straits Times pan kiza hi.

Lungphona neite sungpan pawlkhat in Banner tawi uh a, tua Banner tungah “#nomuslimban” cihleh “Love Trumps hate” cih lai kigelh hi.

Naikhat sungbang US Embassy maiah lungphona aneihkhit uhciangin paikhiapan uhhi. Apaikhiatma un lungphona aneite sungpan in makai Organisers te’n US Embassy ah Memorandum pia uh a, tuasung ah US President Donald Trump in abeisa 27 January ni in letmah athuhsa ahi Executive Order sung akihel Travel Ban vai phiatkik hen cih kihel hi.

Pakatan Harapan te’n Statement abawlna sungah President Trump in hihbangin Travel Ban abawlpen nawngkaisak mahmah hi. Muslim gam te adingin hamsatna tampi piangsaktuam hi. Malaysia gammi tezong US gamsung ah khualzinna, nasepna leh pilsinna te ah hong nawngkaisaktuam mahmah dinghi ci’n genkhia uhhi.

President Trump ii Travel Ban sungah akihel taktakpen Muslim gam 7 pan hi a, tua gam 7 tepen Iran, Iraq, Libya, Somalia, Sudan, Syria, Yemen cihte ahihi. Muslim gam veve ahih hangin Malaysia gampen Travel Ban sungah kihello cihzong nungkalsung in Kuala Lumpur khuasung aom US Embassy panin genkhiatna neikhin uhhi.

More: US gamsung luttheihloding Muslim gamlak ah Malaysia kihello

90 Days: Atung a Muslim gam 7 panin US gamsung lutkhuan ni 90 sung kikhakcip hi.
120 Days: Gambel galtai tezong US gamsung luttheihnading “US Refugee Admission” pen ni 120 sung ki khakcip hi. ZD Sawltak #zomidaily