US, Tennessee nupa kopkhat in kha 5 aphapan ata uh $3000 tawh Online pan zuaksawm

US, Tennessee nupa kopkhat in kha 5 aphapan ata uh $3000 tawh Online pan zuaksawm

US, Tennessee aom nupa kopkhat in amausungpiang ata uh $3000 tawh zuakding in Online tungtawn in tangko uh ahih manin kiman uh a, Monday ni in Court ah thusitna thuak uh cih Fox News pan kiza hi.

Craigslist kici “American classified advertisements website” tungah zuakding in akoih uh, atangko uh hi a, aleiding te khutsung ah atunma in palik te’n kankhiaman uhhi. Online tungpan azuaksawm ata uhpen kha 5 bekbek phapan hi.

Tennessee Bureau of Investigation te genkhiatna ah ata uh azuaksawm nupa te pen kum 37 aphakhin Deanna Lynn Greer leh kum 26 aphakhin John David Cain te ci uhhi.

Elizabethton Police te’n Friday ni in Online tungtawn in “baby for sale” cih mukha, zakha uh ahih manin, kua in naupang zuaksawm hiam cih kankhiat kipanpah uhhi. Greene County Sheriff’s Department leh Tennessee Bureau of Investigation tezong amanlang in zasakpah uhhi.

Friday ni in Victory Lane, Asheville Highway geinai aom Dollar General Store ah Undercover Officer tetawh ta azuaksawm te kimu in tuapan in aki mankhia uh ahihi.

Greene County Sheriff Pat Hankins kicipa in palik kasepzawh kum 34 phakhinta, hihbang in ta zuaksawm cihmahmah kaphutkhak cilna hi. Naupang khat leiding cihbang, na umthei uhhiam? Ka lungtang hongki tamkham sakdek hi ci’n genkhia hi.

Tua akizuaksawm naungek pen Lynn Greer ii atadang khattawh “Department of Children’s Services” te’n kepsak uhhi.

Naupang zuaksawm te nupa pen “Haley’s Law” thukhun tawh kizui in thukhenna thuakding uhhi. “Haley’s Law” cihpen Tennessee Statute khat ii amin hi a, naupang khat apa leh anukik in abawlsiat gawpna panin Haley’s Law akisuak ahihi.

More: Malaysia ah naupang deihdandan kileithei cizen veh aw

Naupang kum 9 nuaisiah apumpi tungah liamna piangsak in bawlsiatna akineihleh “Class A Felony” in ki ciamteh hi. Hih Online tungtawn in naungek azuaksawm tezong athuakding in baihlothei khading hi. ZD Sawltak #zomidaily