US News Update: September 02, 2021 ~ Thomas Mung

US News Update: September 02, 2021 ~ Thomas Mung

1. US GAM SUNG COVID-19 DIN MUN: Tulai tak Covid-19 Delta variant natna pen USA gam sungah khang lai aa, tu nipi sung natna ngah thak leh asi te Worldometer te suahsak na tawh kizui in anuai aa bang in kimu thei hi.

• ~ September 01, 2021: Natna ngah thak – 184,420; Asi – 1,480
• ~ August 31, 2021: Natna ngah thak – 156,002; Asi – 1,232
• ~ August 30, 2021: Natna ngah thak – 119,642; Asi – 589
• ~ August 29, 2021: Natna ngah thak – 121,635; Asi – 514

2. AFGHANISTAN AH U.S GALKAP 13 SI:

Afghanistan gam ah Pu Biden in US Galkap te asap khiat zawh ciang Taliban migilo ten gam teng la kik uh aa, Muslim upna tawh gam uk sawm kik ta uh aa, ISIS migilo te gam sungah hong khang kik uh hi. August 26 ni in ISIS migilo te in Kabul vanleng tual ah bomb tawh sim uh aa, US galkap 13 si in 18 liam in Afghan mi tampi zong si uh hi. Pu Biden in ISIS te sim kik dingin genkhia aa, ahi zongin zekai lua ta hi. Abeisa Taliban hun sung in ISIS te in Afghanistan gam sungah noptak in phual sat uh aa, US leh apawl ten asim khit zawh ciang tawlpi khat sung hong dai uh ahi hi. Tu in Pu Biden in US galkap teng alak khiat zawh lian ciang ISIS te hong laang kik aa, leitung gambup buai sak kik thei ding ahih manin mi tampi in Pu Biden nakpi tak in mawh sak uh hi.

3. PU BIDEN KUMPI PAN PAIKHIAT DING NGETNA KINEI:

Afghanistan gam ah US Galkap 13 sihna leh kum 20 khit zawh gam abuai sak kik na, Afghanistan gam vai a let zawh lohna hangin US House and Senate pan Representatives leh Senators tampi in Pu Biden Kumpi pan atawp nang ngetna nei uh hi. Adiak diak in Republican makai atam zaw in Pu Biden mawhsak uh aa, kum 20 sung gamdang ah US galkap tam asih pen ni hi ding ahih manin Pu Biden in mawh puak hi ci uh hi. Former President Pu Trump in zong hi vai tawh kisai Pu Biden mawh sakna pulak khia aa, hi vai pen a pianglo ding apiang sak ahih manin Pu Biden in mawh puak hi ci hi.

Hi vai tawh kisai belh White House pan bangmah dawn kik na bawl nai lo uh hi. House Minority Leader Kevin McCarthy in zong Afghanistan thu piang hangin mipi te in Pu Biden pen muang zo nawnlo uh hi ci in pulaak khia aa, hih vai tawh kisai House ah “emergency session” sap dingin House speaker nu kiang ngetna nei hi. Hih thu piang khit zawh Pu Biden pen mipi muangna kiam in approval rating 44% ah kiam suk hi ci uh hi.

4. BIDEN KUMPI IN AFGHANS REFUGEE TAMPI TUAHKHIA:

Biden kumpi in Afghanistan gam buaina hangin Afghans mi 24000 val nipi nih sung US gam ah Refugee dingin tuah khia aa, tua lak ah US gam tawh nasem khawm te leh anuntakna uh ala huai te kihel hi ci in Department of Homeland Security in taangko khia uh hi. Afghanistan gam buaina hangin August kha sung bek bek in mi Tein khat (100,000) val gam pan pusuak uh hi ci uh hi.

5. IRAQ LEH AFGHANISTAN AH GAL SIM NA HANGIN ABEI ZAH:

Iraq leh Afghanistan gam ah gal va sim na hangin US gam in sum tang $ 8 Trillion bei lawh in mi 900,000 val sih lawh hi ci in The Boston Globe kipawlna in taangko khia uh hi. Tua misi lak ah September 11, 2001 ni in ISIS te tatsiatna hangaa asi mi 3,000 val zong kihel hi ci uh hi.

6. TEXAS STATE IN NAU PHIAT VAI KHAM TA:

Texas State in nau paai te a nau no ii alungtang kisaai (heart beat) a zak nat leh nau phiat (abortion) bawl thei nawnlo ding hi ci in thu khun bawl uh aa, tua pen Gov. Abbott in sign thu na nei in kipsak in zang pah uh hi. Tua nau phiat theih loh nading thu khun pen “Heartbeat abortion law” cih min pia uh aa, US gam sungah Texas State pen nauphiatna tawh kisai thukhun bawl in akham masa pen State hong suak ahi hi. Tua thu khun tawh kizui in nau paai zawh nipi 6 apha khinsa ten zong nau phiat thei nawlo ding uh ahi hi.

Pasian thu um tampi te leh nauphiatna alang pang mite, Pro-life organization te in lungdam in aih bawl uh aa, ahi zongin Pu Biden aa kipan Democrats/Liberals lam ten nakpi tak in lang pang pah uh in, Supreme Court ah khiat toh ding vaihawm pah uh hi. US gam ah nauphiat theihna (abortion) vai pen kum tampi sung politics ah abuai pih mahmah thu khat zong ahi hi.

Abeisa hun ah Pu Trump in abortion (nau phiat na) tawh kisai aphal loh te khempeuh Pu Biden in la khia in nauphiatna deih dan dan in kibawl theih nang lampi hong hi ci uh hi. Pu Biden pen hih nau phiatna vai hang in abeisa hun te ah RC Phungzi pawl khat te in Siangtho pumpi (communion) piak ding nial khin uh ahi hi. Nau phiatna aa azat uh Planed Parenthood akici zato te huhna piak kik ding vaihawm ding uh hi ci hi. Planed Parenthood ten zato (clinic) US gam sungah 600 val nei uh aa, Federal kumpi in kum khat $530 million ta huhna pia in kum khat sung nau suak nailo tul tampi phiat khia in that lum uh ahi hi.

7. SUPRREME COURT IN TEXAS ABORTION VAI NIAL LO:

Texas state in “Heartbeat abortion law” akici nipi 6 apha khinsa nau phiat theih loh ding thu khun abawl zawh lian leh Liberals/Democrats lam te in Supreme Court ah thu tunpih pah uh aa, Supreme court in vote khia in thu khensatna nei uh hi. Supreme Court ah Justices 9 aom na pan 5 pen conservatives lam lek uh aa, 3 pen Liberal lam lek uh ahi hi.

Chief Justice John Robert pen akihei kawi kawi khat hi aa, tu aa abortion vai tawh kisai zong Liberal Justices 3 te gum in pang hi mah ta leh conservative justices te ii vote tam zaw ve ve ahih manin Texas state ii “heartbeat abortion law” thak pen kham (block) zo tuan lo in Texas state zo sak uh ahi hi. Abeisa US election vai ah zong Chief Justice John Robert pen Democrats te lam lek in gum ahih manin “mail-in-ballots” vai thu kikupna kinei thei nawnlo aa, Republicans leh mipi te akilungkim het lo ahi hi.

8. VACCINE SUN LO TE KHUAL ZIN KEI UN:

Tulai tak US gam ah Covid-19 natna hong khan kik na tawh kizui in Covid-19 Vaccine sun lo te peuhmah Labor day weekend sungin khualzin loh dingin Centers for Disease Control and Prevention (CDC) Director Pi Walensky in taangko khia hi. US gam ah Covid-19 natna kilawhna pen Holiday weekend sung teng ah alom alom in kilawh ahih manin kidawp tek ding pulak khia hi. US Federal leh State kumpi sungah na asem peuh mah in vaccine sut tei tei ding thu khun bawl uh aa, private company ten zong vaccine requirement bawl ding vaihawm ta uh hi. US gam ah tulai tak Covid-19 akilawh te ii 95% pen Covid-19 vaccine sunlo te hi uh ci in CDC in pulaak khia hi.

9. US GAM STATE PAWL KHAT AH IDA HUIH PI NUNG:

US gam state tampi ah Hurricane Ida huihpi hangin mei sia in mi tampi zong si hi. New York state sung teng ah zong tui khang in mi 8 si aa, New York state governor Kathy Hochul in state of emergency taangko khia hi. Akizom in New York ii veng state khat ahi New Jersey state governor Phil Murphy in zong State of emergency taangko khia hi.

10. VIRGINIA TECH UNIVERSITY IN VACCINE SUN LO TE SANGKAH SAK NAWNLO:

U.S gam sungah Engineering leh Technology Sang min thang mahmah khat ahi Virginia Tech University in Covid-19 vaccine sun lo sanggaupang 134 te sang akah na uh pan khawl sak uh hi. Virginia Tech dan mah in University leh College tampi ten zong sangkah ding sangnaupang peuh mah in Covid-19 vaccine sut tei tei ding thukhun bawl uh ahih manin ei sung pan University leh College kah ding I om leh Covid-19 vaccine I sut tek ding thupi mahmah ding ahi hi.

11. VIRGINIA SUPREME COURT IN TRANSGENDER VAI THU KHENSATNA NEI:

Virginia state sung aaom Leesburg Elementary School ah a physical education teacher asem Pu Byrun Tanner Cross in Transgender akici “numei/pasal van laih” tawh kisai Sang te policy thak May 29 ah akibawl Loudoun County Public School District school board meeting ah nakpi tak in nial in langpang ahih manin Sang thu nei board ten nasep them vei tawp sak uh hi. Tua Sang te policy ah Transgender akici “numei” van laih pasal khat pen Pasal cih sam hamtang ding ci aa, tua pen ama ii Tapidaw upna – Christian faith tawh kituak lo ahih manin ka nial hi ci in Pu Cross in genkhia hi.

Pasian in Numei te numei aa hong bawl hi aa, Pasal te pasal aa hong bawl hi in van laih cih te pen hong bawl pa Pasian alangpang I hi aa, Pasian deih loh hi ci in genkhia hi. Hi vai Virginia Supreme court ah thu tun uh aa, Supreme court in Sangsia Pu Cross lam panpih in nasepna amanlang tak a kipatsak kik ding in Loudoun County Public School District school board te thupiak na nei uh hi.

More: Zomite i ki-it i kingai takpi mah i hihiam? ~ Thomas Mung

Thu um mi tampi in hih gualzawhna pen ei Tapidaw thu um mi te gualzawhna leh hong bawl Pasian hong panpihna hi ci uh hi. Ref: Epoch Times, Breibart News, Worldometers, CDC, Catholic News Agency (CNA) ** Zing nitak (Firday) nai 8:30pm kiim in US & Kawlgam News update “LIVE” khah khia ding i hih manin kimu tek ni… Thomas On Sian Mung (Thomas Mung Guite) Washington D.C September 02, 2021. MOMNO Media & Museum