Denver Pan Tulsa International Airport
Denver pan Tulsa pen nai khat leh a lang khawng bek sawt hi. Khua zanta ahih manin koimah ki-khuakha thei meel nawn lo hi. Tulsa pen International Airport acih tei hangin mundang International Airport te zah in lian lua lo in vanleeng zong tam lua khollo hi. Ahi zongin Kawlgam khawng aa ih khuapi penpente vanleengtual khawng tawh tawh tehkak ding bang hi deksuai vet lo leuleu hi.
Tulsa arrival lobby ka tun lian un local time 11:55PM sat hi. Ka nuphalte nupa, Rev CiCinte nupa, Pa Khup (Pa Go Sawm Khup) Pa Dal Mangte nupa (Pa Dal Za Mang + Nu Dim Khan Cing) a u Mungnote nupa leh ka tanu Lun in zankim zankhang ci lo in hong na dawn uh a, hih ka laibu sungpan lungdamna ka ko phapha hi.
LA ka tun uh ciang a, ko tawh hong tun khawm lo ka vante uh zong, bangmah pelem lo in a zing August 15, ni nitak naikhat khawngin ka ngah thei pah uhhi.
Ihmut Cim Ngei Meel Lo
Tulsa ka tun zawh akipan sep ding peuhmah lah a om kei a, ka lupna uh lah pauhlap ding omlo in nuam pha mahmah hi. Sawt veipi tak mah aki-ihmu hi napi’n nipi nih sung bang ka tangpil thei meel kei hi. Ka nuphalpa Lianno kiang ka gen ciangin sun leh zan kilaih ahih manin a tuaci thei mah hi hongci uhhi. (Mang pau in ‘jet lag’ kici hi)
Amah tekhtekh in zong US pan Kawlgam ciahteh bangmah ka ci kei a, Kawlgam pan US ciah leng nipi nih sung phial bang ka ihmut a cim meel kei ci hi. Ama cih bang ngeiingeii bangmah in kei zong ihmut cimlo bangdanin kinavak thei mahmah lo aa ka lungsim ka khuak hi miaimuai den hi. Nipi nih khit zawh khawng ciangin damdam in hong kamh pan hi.
Azom omlai…
Agelh: Awn Za Pau
Comment piaknop aomleh...