US Florida ah naupang donlohna “Child Neglect” tawh Vung Deih Nuam kiman

US Florida ah naupang donlohna “Child Neglect” tawh Vung Deih Nuam kiman

USA, Florida State sung aom nupi khat ata ginatak kemlo in sihsuah ahih manin kiman cih News4Jax pan kiza hi. Tua nupinu minpen Vung Deih Nuam kici ahih manin hih nupinu zong Myanmar, Chin State panin US gamsung apeem Refugee tawh atungkhat hikha ngelngel dinghi.

Vung Deih Nuam pen kum 24 aphakhin khat hi a, apasal minpen “Khad Kab” ci’n Reporter te’n gelh uhhi. (A pasal zong Kawlgam panmah hikha theiding) Hihte nupa in tanu khat nei uh a, amin Hannah Htoo kici hi. Atanu uhpen khakhat bek phapan hi. Abeisa March 24 ni in atanu uh khuaphawklo in San Marco Apartment sungpan kimu a, tuazawh asawtlualo in atanu si ahih manin, asihna vaitawh anupen ki muangmawh pahhi.

Investigators te tungah Vung Deih Nuam in agenkhiatna ah atanu pen ihmu sakdingin luaisung ah kasial ci a, nainih khitkhawng ciangin atanu naknawnlo ahih manin 911 te kasam cihi.

Tuaciang in atanu Hannah Htoo pen Wolfson Children’s Hospital ah kipuakpah a, tua zato mahah March 29 ni in simawk hi.

Department of Children and Families te ii genkhiatna ah hih naupangno ii sihzia pen pongman hilo a, Detectives te’nzong aki gencian theilo liamna “Unexplained injuries” tampi nei ci uhhi.

Hospital Personnel te’nzong naupang ii pumpi tungah ki kuihkhakna leh aguh kitahkhakna hangin aguh akhaang “Bone Fractures” tampi om cimawk uhhi. Tuaban ah akhuaksung ahzong si om cimawk hi. Tuateng hangtawh anu Vung Deih Nuam pen akimanpah ahihi.

Jacksonville Police te genkhiatna ah Vung Deih Nuam in ata pen kiatsuah hiding ci uhhi.

A pasal Khad Kab kici ii genna ah amahpen zingsang pan nitakdong nakasem cihi. Azipen nasep neilo in naukem in inn ah aomcip cihi.

Vung Deih Nuam pen athu akikan ciangin abeisa 2014 kum inzong naupang donlohna “Child Neglect” tawh Florida, Lake City ah thu anei ngeikhat cih Arrest Report tungtawn in kiza hi.

Also read: USA, Florida aom Nigh Club khatah thau kikap, mi 2 si, 16 liam

Tusungteng US gamsung thuthang ah Myanmar gammi te hongki limhelpian mawkin, “Good News” hibeekleh ahoihding hiven, thusia tamzawmawk ei. ZD Sawltak #zomidaily