USA gam Florida State sung aom Night Club khatah thau kikapna piangleuleu a, mi 2 si in adang mi 16 bang liam cihthu Fox News pan kiza hi. Fort Myers Police te Monday ni zingsang Statement genkhiatna ah mi aliam te lakah pawlkhat pen huaisia simtham ahih manin a nuntatna alauhuai zahdong agim om cihi.
Hih thau kikapna tawh kisai aki ummawhkhat zong kimankhin cihi. Hih buaina apianna munpen Club Blu Bar & Grill kicihna gei ah hi a, hih Club ah kumtawmlai te vive kihelna munkhat cihi. Sunday zan in thubuai kipan a, zingsanglam 12:30am pawlin Police te’n ko hongkisam in Parking Lot ah thau kikapna piang cih hongkigen ci uhhi.
Palik te atun uhciang in pawlkhat akikapliam tawh, pawlkhat akihepna ataina pan atuk in aliamtawh mipawlkhat na om phengphang uhhi. Tua aliamte pen tuakiim aom Hospital te ah kipuakpah cihzong palik te’n genkhia uhhi.
Hih buaina munlo adangkhat ahzong thau ging kiza, thau kikapna om cih palik te ki zasak a, asi aliam aomloh hangin mawtaw pawlkhat thautang in akhakna kimu cihzong kiza hi.
Palik te genkhiatna ah hih thaukappa kua cih akikansan laitak hi a, hih akappen mahin amundang ahzong na gamta hikhatheiding cihzong gen uhhi.
Syreeta Gary akici khatin Fox 4 Now te kiangah agenkhiatna ah atanu leh alawm pen thautawipa amuh uhciang in taigawp uh cihi. A tanu thautawh akikapkhak lohhang in alawmnu pen thau in kapkha in akhe liam cihi. Tua alawmnu pen zato ah kapuak ci a, damkikding in lamen cih genkhia hi.
Numei khatin agenna ah hihmun ah thauging 30 veibang kaza cihi. Adang mitmuh khat ii genna ah mikhempeuh ki taikekgawp in, mite khatlehkhat alawmte uh bang acihiam cih ki otsan in lungzinghuai vengvung mahmah cihi. ZD Sawltak #zomidaily
Comment piaknop aomleh...