US Federal Kumpi nasep (US Federal Job) thu tomkim

US Federal Kumpi nasep (US Federal Job) thu tomkim

Atheih huai U.S Federal Kumpi nasep (Federal Job) vai them khat hong pulaak khia nuam ing. US gam ah Gamdang te tawh kibanglo in Federal Kumpi nasep (Federal Job) pen standard sang mahmah aa, ngah ding hamsa mahmah hi. US gammi asuak khinsa sung pan sangman (degree ngah) te mi 1000 bang interview alutna pan average in mi 50 kiim khawngbek akitelkhia ahi hi.

Interview bang thum vei kiim akilut ahi hi. US kumpi nasep pen “competitive job” leh “professional employment” kici in ngah ding ahamsa mahmah khat ahi hi. 2010 kum ka sang man (B.S Electrical Engineering tawh) phet in interview ka lut aa, mi tul tampi lak pan hong kitel khia ahih manin Pasian min ka phat hi.

I. US Federal Kumpi nasep (Federal Job) i cih ciang in:

US Federal kumpi nasep (Federal job) leh nasem (Federal employee) i cih ciang US Federal Government (Executive branch) ii Department (Agency) 15 (https://www.usa.gov/executive-departments) te ah na asem te akici ahi hi. NASA, CIA, Postal service (USPS), Social Security (SSA), OPM leh Peace Crops cih te pen independent agency kici aa, atungaa department 15 lak ah kihel lo uh hi.

Federal employee – civil service ah Military (Galkap) te kihel lo hi. (** Galkap tumte atamzaw pen high school man khit ciang atum kitam aa, tu aa i gen nopte pen Degree man khit ciang kumpi nasep direct aa alut te (professional employee) i gen nopna hi zaw hi). Federal employees ah Contract/contractor tawh asemte zong kihel lo hi. State leh local employees te leh State sung tek aa palik (police) te kihel lo hi.

II. US Federal Kumpi nasep lut/ngah theih nadingin (Qualifications):

• 1) US gam mi suah kul hi.
• 2) Amau cian tan pilna (degree/diploma) neih kul hi.
• 3) Security clearance (atawm pen Public Trust) neih kul aa, background check leh drug test cih te awn (pass) kul hi.
• 4) Interview khempueh awn (pass) kul hi.
• 5) Amau cian tan qualifications/standards khempeuh neih kul hi.

III. US Federal kumpi nasep pattuamna (Benefits):

1) Job security om hi – hong kitel (hire) khit leh hong kikhawlsak ding hamsa mahmah hi.

2) Competitive salary – Khasum hoih in saang (high pay) hi.

3) General Schedule (GS), Grade systems (GS level 5-15) tawh pai in Zakhan ding ol hi. Record hoih peuh leng Kum khat khatvei ta Za leh Kha sum te khang den hi.

4) Health, life insurance, leave benefits te hoih mahmah hi.

5) Thrift Saving plan (e.g. 401K tawh kibang pian) cih nei uh aa, Sum kholna leh sum maat bawlna system te hoih mahmah hi.

6) Retirement (Pension) hoih mahmah hi.

7) Flexible Schedule kinei hi – nasep hun deih bang kitel thei hi. Inn pan zong na kisem thei lai hi.

8)Nasep siamte, acitak te leh record hoih te pahtawina tuamtuam pia uh aa, Bonus zong pia uh hi. Nung deuh aa ka ngah “Bronze Medal award” bang US kumpi te piak Medal lak pan asang pen medal khat ahi hi.

IV. Thu khupna leh hanthotna:

US federal kumpi nasep ngah ding leh qualify ding hamsa hi mah ta leh Zomi Khangthak ten i hanciam ding hoihsa mahmah ing. Tuciang ciang ei Zomi lak ah federal kumpi sung nasem kitawm mahmah aa, zong tam kiom nailo phial bek thamlo Sang (University/College) kah Khangno zong tawm tek tek hi hang. Kei nasepna (Department of Commerce) ah bang Zomi akici kei bek ka om pan aa (Falam lam te 2 khawng om), adang Department 14 sungah (Galkap te lo siah) zong asem Zomi kiom nai het lo phial hi.

2010 kum in US Federal nasep ka na lut aa, kum 8 sung ei Zomi kua mah kibehlap lo phial hi hang. Tua hi aa, khangthak mipil (sangman) Zomi te laak pan mailam hun ah US Federal kumpi sungah nasem mi i tam semsem nang lunggulh huai leh deih huai mahmah hi.

(Hun ngah ciang zom to to lai ni ei..)

Thomas On S. Mung (Thomas Mung Guite)
Washington DC