US California ah gamsung meikatna hangin mi 10 sikhin, mi 20,000 val kihemkhia
USA, California gamsung ah gammeikang nasia mahmah in, tuciangciang meikatna hangin asi mi 10 bang phakhin ta cih AFP pan kiza hi. Sheriff’s Office panin agenkhiatna ah Sonoma County sungpan in meikatna hangtawh asi mi 7 hi a, tualo adangzong asi mi 3 omkhin cihi.
Tuaban ah hih gammeikang Wildfire hangin kumpi thunei te’n mi 20,000 valbang ki hemkhiasak khinta uhhi.
Meikuang pen huaisia mahmah in, County 3 sungpan in Building bekbekzong 1500 bang meikangtum khinta hi cihi. Tua ahuaisiat diakna County tepen Napa, Sonoma, Yuba sungteng hi a, San Francisco Bay ii leilu lamteng ahihi. Meikuang ahuaisia phadiak mun 14 bangah om cihi.
California’s Fire Service te genkhiatna ah hih gamsung meikatna pen lenggah kiciinna Wine Production kuamsungteng hiphadiak a, akigawm in 49,000 acres (20,000ha) sungbang ah mei kuangziahziah cihi.
Santa Rosa sung ah meikuang ageinai panin amukha AFP correspondent witness khatin agenna ah Gas Lines, Gas Tanks cihte paninzong meikuang tawh apuakkham tamveipi kamukha uh cihi. Mendocino sungahzong Firefighter mi 410 bangin meiphelh in buaimahmah uhhi ci’n Sheriff’s Spokesman khatin CBS News Network te tungah genkhia hi.
Nupi naupaai kha 8 aphakhin khatzong meikatna hangin aneih alamteng uh nusia in, ataikhia hi a, ka inn kalo uh vutlehvai suakkhinta hi. Bem panin kaki patkikzel uh kulding hi ci’n khasiat huaitak in genkhia hi.
Related: Madeira tuikulh tungah gammeikang nasia mahmah, mi 3 sikhin
US gam ii nitumna Western United States lampen khuakhal, khuakeu, Hot Summer hunciangin gammeikang piangnuam mahmah hi. Gammeikang aom ciangin huihtawh kithuah in, huihin mutgawp sawnsawn ahih manin, thakhatthu in kilawhmang thei a, lauhuai mahmah hi.
Video: Wine Country Wildfires Torch California Homes
Nungkhasung inzong Los Angeles sungah meikanggawp in, mi tampitak cimawh dongtuak in om uhhi. Huihpi leh guahpi, Hurricane tuamtuam te’n nisuahnalam Caribbean kuamsungpan nawkzel. Nitumna lamahlah gammeikang in nawkzel. US gamsung ah cimawh dongtuak tampi kibehlap semsem khading hi. Sawltak #zomidaily
Comment piaknop aomleh...