Upna tawh itna kingah

Upna tawh itna kingah

1Cor. 13: 13na ah, “Tu laitakin a om lai thu thumte pen upna, lametna le itna hi a, tua thumte sung panin itna mah a thu lian pen ahi hi” ci hi. Hih leitungah ih zuih zawh loh thukham ih lawh zoh loh itna pen vangtung gamah ih upna tawh ih lo siang zo ta ding hi.

Vangam ih lut zawh nading midik ih hih kul hi. Midik ih hih nadingin thukham sawmte genbaang lo-a ih zuih zawh kul hi. Itna genbaang lo ih neih kul hi. Tua ahih leh itna genbaang lo ih neih zawh loh banah thukham zui zo sitset vet lo ih hih manin a zuizo sitset pa Khrih sisan tawh hong kisawpsiangna ah diktang mi ih hih phot kul hi. Tua Jesuh Khrih sisan tawh ong tatkhiatna pen upna bek tawh kingah a, itna (thukham) tawh hi lo hi.

Tua banga ih up theihna nangawn Pasian letsong hi lai hi. Mawhnei mi ih hihna pan’n ih kisap hotkhiatna sangin Pasian’ ong hotkhiatnopna thu lianzaw hi. Hebrews 2: 3na ah a lian mahmah, a tangzai mahmah hotkhiatna (so great salvation) a cihcih pen tua hi. Nang kisam na kisakna sangin Pasian in ong hotkhiatnopna le ong teelkhiatna thu lianzaw hi. Jesuh in mawhneite deih hi cih thu bek hi lo-in, mawhnei ka hih manin Jesuh ka kisam hi ong ci thei sak upna ih ngah kul hi.

Nang lam pan’n na mawhna hanga na kisap hotkhiatna le Pasian ong hotkhiatnopna thu kigawm khawm pen a lian mahmah a tangzai mahmah hotkhiatna ahi hi. Vantung gam ah upna le lametna cihte om nawn lo ding hi. Ki-itna siangtho bek om ta ding hi. Ahi zongin tua vantung gam-a a genbaang lo ki-itna siangtho pen tu laitaka ih upna le ih lametna tungtawn bekin a piang thei ahi hi. Upna pen itna madawk hi-a, vantung gam-a Pasian’ itna tu-laitaka ih upna tawh kingah bek ding hi.

Upna le lametna kahlei dawlte siklsan lo pi-in kuamah in a thulian pen itna lo zo ngei lo ding uh hi. Upna tawh itna kingah bek hi. Ih ngah khit ciang bekin kinei thei pan a, ih neih khit ciangin kipia khia thei pan hi. Hong kipia itna hawm khia in. Na itna, it zo na kisakna tawh vangam kiluah hi masa lo-in upna tawh vangam kiluah ding hi bek hi.

Evan. Suang Dal